കൊച്ചി: കോടതിയിൽ കീഴടങ്ങാനെത്തുന്ന പ്രതികളെ കോടതിയുടെ മുൻകൂർ അനുമതിയില്ലാതെ അറസ്റ്റ് ചെയ്യരുതെന്ന് ഹൈക്കോടതി. കോടതി നടപടികൾക്ക് ഉപയോഗിക്കുന്ന എല്ലാ ഭൂമിയും കെട്ടിടവും നിർമാണവും പ്രവൃത്തിസമയത്ത് കോടതിയാണ്. എന്നാൽ വാറന്റുള്ളതോ ഒളിവിലുള്ളതോ ആയ പ്രതികളെ പൊലിസിന് കോടതി വളപ്പിൽനിന്ന് അറസ്റ്റ് ചെയ്യാം. കോടതിയിൽ പ്രശ്നങ്ങളുണ്ടാവുമെന്ന സാഹചര്യത്തിലും അറസ്റ്റിലേക്ക് കടക്കാം. അറസ്റ്റിന്റെ കാരണങ്ങൾ ഉടനടി ആ കോടതിയിലെ ജുഡിഷ്യൽ ഓഫിസർമാരെ അറിയിക്കണമെന്നും ജസ്റ്റിസുമാരായ ഡോ. എ.കെ ജയശങ്കരൻ നമ്പ്യാർ, ജോബിൻ സെബാസ്റ്റ്യൻ എന്നിവരടങ്ങിയ ബെഞ്ച് ഉത്തരവിട്ടു. 

പൊലിസിന്റെ ഭാഗത്തുനിന്നുള്ള നടപടികളിൽ പരാതി ബോധിപ്പിക്കാൻ സംസ്ഥാന തലത്തിലും ജില്ലാ തലങ്ങളിലും പ്രത്യേക സമിതി രൂപീകരിക്കണം. സംസ്ഥാന തല സമിതിയിൽ അഡ്വക്കറ്റ് ജനറലും ഡി.ജി.പിയും ഹൈക്കോടതി ബാർ അസോസിയേഷൻ ശുപാർശ ചെയ്യുന്ന മൂന്നു അഭിഭാഷകർ, എസ്പി, പരാതിക്കാരനായ അഭിഭാഷകന്റെ ബാർ അസോസിയേഷന്റെ പ്രസിഡന്റ് എന്നിവരാണ് അംഗമാവുക. 
ജില്ലാ തല സമിതികളിൽ പ്രിൻസിപ്പൽ ജില്ലാ ജഡ്ജിയും ജില്ലാ പൊലിസ് മേധാവിയും ജില്ലാ ഗവൺമെന്റ് പ്ലീഡറും ബാർ അസോസിയേഷൻ പ്രസിഡന്റും ബാർ അസോസിയേഷൻ ശുപാർശ ചെയ്യുന്ന അഭിഭാഷകനും അംഗമാവും. ഇക്കാര്യത്തിൽ സർക്കാർ ഉത്തരവിറക്കണമെന്നും ഹൈക്കോടതി നിർദേശിച്ചു.