തിരുവനന്തപുരം: യൂത്ത് കോൺഗ്രസ് സംസ്ഥാന അധ്യക്ഷനും എംഎൽഎയുമായ രാഹുൽ മാങ്കൂട്ടത്തിലിന്റെയും കോൺഗ്രസ് എംപിയായ ഷാഫി പറമ്പിലിന്റെയും സാമ്പത്തിക ഇടപാടുകളെക്കുറിച്ച് അന്വേഷണം ആവശ്യപ്പെട്ട് എഐവൈഎഫ് സംസ്ഥാന സെക്രട്ടറി ടി.ടി. ജിസ്മോൻ ഡിജിപിക്ക് പരാതി നൽകി. രാഷ്ട്രീയ രംഗത്ത് ഇരുവരുടെയും നേതൃത്വത്തിൽ ഒരു ക്രിമിനൽ സംഘം വളരുന്നുവെന്നും അധികാരവും പണവും ദുരുപയോഗം ചെയ്ത് അനധികൃത പ്രവർത്തനങ്ങൾ നടത്തുന്നുവെന്നുമാണ് പരാതിയിലെ പ്രധാന ആരോപണം.

പാലക്കാട് നിയമസഭാ ഉപതിരഞ്ഞെടുപ്പ് സമയത്ത് ട്രോളി ബാഗിൽ പണം കടത്തിയെന്ന ആരോപണം ഇരുവരും നേരിട്ടിരുന്നുവെന്ന് പരാതി ചൂണ്ടിക്കാട്ടുന്നു. അതേസമയം ആലപ്പുഴയിൽ നടന്ന സംസ്ഥാന രാഷ്ട്രീയ പരിശീലന ക്യാമ്പിൽ ഈ ഫണ്ട് സംബന്ധിച്ച വിമർശനങ്ങൾ ഉയർന്നപ്പോൾ കണക്കുകൾ ആവശ്യപ്പെട്ടെങ്കിലും യൂത്ത് കോൺഗ്രസ് നേതൃത്വം മറുപടി നൽകിയില്ലെന്നും ആരോപിക്കുന്നു.

ALSO READ: ഓണം പ്രമാണിച്ച് അധ്യാപകർക്കും ജീവനക്കാർക്കും ബോണസ് വർധിപ്പിച്ച് സർക്കാർ: ഉത്സവബത്തയും ഉയർത്തി

വയനാട് ഫണ്ടുമായി ബന്ധപ്പെട്ട് കോടികളുടെ തിരിമറി നടന്നുവെന്ന ആരോപണവും ഉയർന്നിട്ടുണ്ട്. ഇത് 1988-ലെ അഴിമതി തടയൽ നിയമപ്രകാരമുള്ള (പ്രിവൻഷൻ ഓഫ് കറപ്ഷൻ ആക്ട്) ഗുരുതര കുറ്റകൃത്യമാണെന്നും അതിനാൽ കേസെടുക്കണമെന്നും പരാതിയിൽ ആവശ്യപ്പെടുന്നു.

ഏറ്റവും പുതിയ ആരോപണങ്ങളുടെ പശ്ചാത്തലത്തിൽ പണവും സ്വാധീനവും ഉപയോഗിച്ച് വിഷയം ഒതുക്കിത്തീർക്കാൻ ശ്രമിക്കുന്നുവെന്നും പരാതി ആരോപിക്കുന്നു. അധികാര ദുർമോഹവും അഴിമതിയും വഴിപിഴച്ച സാമ്പത്തിക താൽപര്യങ്ങളുമാണ് ഈ സംഘത്തെ നയിക്കുന്നതെന്നാണ് ആരോപണം. കൂടാതെ, ഇരുവരുടെയും സാമ്പത്തിക സ്രോതസ്സുകൾ പരിശോധിക്കണമെന്നാവശ്യപ്പെട്ട് കോൺഗ്രസ് പ്രവർത്തകർ എഐസിസിക്ക് പരാതി നൽകിയിരുന്നു. ഇതുമായി ബന്ധപ്പെട്ട് മാധ്യമപ്രവർത്തകർ ചോദിച്ചപ്പോൾ ആരോപണങ്ങൾ നിഷേധിച്ചില്ലെന്നതും ശ്രദ്ധേയമാണെന്ന് പരാതി ചൂണ്ടിക്കാട്ടുന്നു.

ALSO READ: 306 കാറുകൾ കൊണ്ട് 'കാർക്കളം', ഒരുക്കി ഓണാഘോഷവുമായി എംജി മോട്ടോർസ്: ഏഷ്യ ബുക്ക് ഓഫ് റെക്കോർഡ്സിൽ ഇടം

അതിനാൽ, രാഹുൽ മാങ്കൂട്ടത്തിലിന്റെയും ഷാഫി പറമ്പിലിന്റെയും സാമ്പത്തിക സ്രോതസ്സുകളും വർധനയും അടിയന്തരമായി പരിശോധിക്കണമെന്നാണ് പരാതിയിലെ പ്രധാന ആവശ്യം. ഈ വിഷയത്തിൽ ഡിജിപിയുടെ ഭാഗത്തുനിന്നുള്ള പ്രതികരണം ഇതുവരെ ലഭിച്ചിട്ടില്ല.

The All India Youth Federation (AIYF) has lodged a complaint with the Director General of Police (DGP), urging an investigation into the alleged financial transactions involving Congress leaders Shafi Parambil and Rahul Mankootathil, citing concerns over their nature and legality