ന്യൂഡൽഹി: ഓൺലൈൻ ഗെയിമിങ് ബിൽ പാർലമെന്റിന്റെ ഇരുസഭകളിലും പാസാക്കിയതോടെ ബി.സി.സി.ഐയുമായുള്ള കരാറിൽ നിന്ന് പിന്മാറി ഡ്രീം ഇലവൻ. പുതിയ നിയമത്തിന്റെ പശ്ചാത്തലത്തിൽ പണം ഉപയോഗിച്ചുള്ള ഗെയിമിങ് കാര്യങ്ങൾ നേരത്തെ ഡ്രീം ഇലവൻ പൂർണമായും ഒഴിവാക്കിയിരുന്നു. പുതിയ നിയമം ഇത്തരം ഗെയിമുകളെ പൂർണമായും നിരോധിക്കുന്നതാണ്. ഇന്ത്യൻ ക്രിക്കറ്റ് ടീമിന്റെ സുപ്രധാന സ്‌പോൺസർമാരാണ് ഡ്രീം ഇലവൻ. ഓൺലൈൻ ഗെയിമിങ്ങ് പണം വെച്ചുള്ളതായതിനാൽ ഇന്ത്യൻ ടീമിന്റെ സ്‌പോൺസറായി ഡ്രീം ഇലവന് തുടരാനാവില്ല. മറ്റൊരു പ്രധാന കാരണം വരുമാനമാണ്. ഡ്രീം ഇലവന്റെ വരുമാനത്തിൽ നല്ലൊരു പങ്കും പണം വെച്ചുള്ള ഗെയിമിലൂടെയാണ് ലഭിക്കുന്നത്. 

358 കോടി രൂപയുടെ കരാറാണ് ബി.സി.സി.ഐയുമായി ഡ്രീം ഇലവനുള്ളത്. 2023 മുതൽ 2026 വരെ നീളുന്നതാണിത്. ഡ്രീം ഇലവനെ കൂടാതെ മൈ ഇലവൻ സർക്കിളും സ്‌പോൺസർഷിപ്പിന്റെ ഭാഗമാണ്. ഇരുവരും ചേർന്ന് ആയിരം കോടി രൂപയാണ് ബി.സി.സി.ഐയിലേക്ക് നൽകുക. ഐ.പി.എൽ ടീമുകളും ഇതിന്റെ ഭാഗമാണ്. ഐ.പി.എല്ലിന്റെ ഔദ്യോഗിക ഫാന്റസി പാർട്ണറാവാൻ 125 കോടി രൂപയാണ് ബി.സി.സി.ഐയ്ക്ക് വർഷത്തിൽ ഡ്രീം ഇലവൻ നൽകുന്നത്.