കൊച്ചി: അഴിമതി ആരോപണത്തിൽ സംസ്ഥാനത്തെ 40 മോട്ടോർ വാഹന വകുപ്പ് (എം.വി.ഡി) ഉദ്യോഗസ്ഥർക്കെതിരേ അന്വേഷണം ആരംഭിച്ച് വിജിലൻസ് ആൻഡ് ആന്റി കറപ്ഷൻ ബ്യൂറോ (വി.എ.സി.ബി). കഴിഞ്ഞമാസം 20ന് സംസ്ഥാനത്തെ  മോട്ടോർ വാഹന വകുപ്പിൻ്റെ 81 ഓഫിസുകളിൽ വിജിലൻസ് ക്ലീൻ വീൽസ് ഓപ്പറേഷൻ്റെ ഭാഗമായി റെയ്ഡ് നടത്തിയിരുന്നു. ഇതിൽ നിന്ന് ലഭ്യമായ രേഖകളുടെയും  വിവരങ്ങളുടെയും അടിസ്ഥാനത്തിലാണ് ഉദ്യോഗസ്ഥർക്കെതിരേ അന്വേഷണം ആരംഭിച്ചിരിക്കുന്നത്. 

17 റീജ്യനൽ ട്രാൻസ്‌പോർട്ട് ഓഫിസുകളിലും  64 സബ്‌ റീജ്യനൽ ട്രാൻസ്‌പോർട്ട് ഓഫിസുകളിലും ഒരേ സമയമാണ്  റെയ്ഡ് നടത്തിയത്. അഴിമതി നിരോധന നിയമത്തിലെ വ്യവസ്ഥകൾ പ്രകാരമാണ് ഉദ്യോഗസ്ഥർക്കെതിരേ കേസെടുത്തിരിക്കുന്നത്. കൈക്കൂലി കുറ്റത്തിന് 112 മോട്ടോർ വാഹന വകുപ്പ് ഉദ്യോഗസ്ഥർക്കെതിരേ  അച്ചടക്ക നടപടി സ്വീകരിക്കാനും ശുപാർശ ചെയ്തിട്ടുണ്ട്. ആർ.ടി.ഒ ഉദ്യോഗസ്ഥർ ഏജൻ്റുമാരുമായി ചേർന്ന് വിവിധ സേവനങ്ങൾക്ക് എത്തുന്നവരിൽ നിന്ന് കൈക്കൂലി ഈടാക്കുന്നത് അന്വേഷണത്തിൽ വ്യക്തമായതിനെ തുടർന്നാണിത്.

ഡ്രൈവിങ് ലൈസൻസ് നേടുന്നതിന് പരിശോധനകൾ മറികടക്കുന്നതിനും റീരജിസ്‌ട്രേഷനായി ഫിറ്റ്‌നസ് സർട്ടിഫിക്കറ്റ് തേടുന്ന വാഹനങ്ങൾക്ക് അനുമതി നൽകുന്നതിനും ആർ.ടി.ഒ ഉദ്യോഗസ്ഥർ  ഏജൻ്റുമാരുമായി ചേർന്ന് പ്രവർത്തിച്ച് അഴിമതി നടത്തിയെന്നും വിജിലൻസ് കണ്ടെത്തി. ലൈസൻസ് നേടുന്നത് സംബന്ധിച്ച് ഗുരുതര നിയമലംഘനങ്ങളും കണ്ടെത്തിയിട്ടുണ്ട്. 

ശരിയായ പരിശോധന കൂടാതെ ലൈസൻസുകൾ നേടുന്നതിന് കൈക്കൂലി നൽകിയവരെ സഹായിക്കുന്നതിന് മിക്ക ഡ്രൈവിങ്  ടെസ്റ്റ് ഗ്രൗണ്ടുകളിലെയും നിരീക്ഷണ കാമറകൾ പ്രവർത്തനരഹിതമാക്കിയിട്ടുണ്ടെന്നാണ് വിജിലൻസ് പറയുന്നത്. പുനർ രജിസ്‌ട്രേഷൻ, ഫിറ്റ്‌നസ് സർട്ടിഫിക്കറ്റുകൾ നൽകൽ, ലോറികൾക്കും ബസുകൾക്കും പെർമിറ്റുകൾ നൽകൽ എന്നിവയിൽ കടുത്ത അഴിമതിയാണ് നടക്കുന്നതെന്നും വിജിലൻസ്  വ്യക്തമാക്കി. 

അഴിമതിക്കാരായ ആർ.ടി.ഒ ഉദ്യോഗസ്ഥർ വാട്ട്സ്ആപ്പ് ഗ്രൂപ്പുണ്ടാക്കിയാണ് ഏജൻ്റുമാർക്ക്  സേവനങ്ങൾക്കായി എത്തുന്നവരുടെ വിവരങ്ങൾ കൈമാറിയിരുന്നതെന്നും ഏജൻ്റുമാർ വൻ തുക ഇവരിൽ നിന്ന് കൈക്കൂലി ഈടാക്കിയിരുന്നെന്നും ഉദ്യോഗസ്ഥർക്ക് ഏജൻ്റുമാർ സ്വർണമോതിരം ഉൾപ്പെടെ കൈക്കൂലി നൽകിയിട്ടുണ്ടെന്നുമാണ് വിജിലൻസ് പറയുന്നത്.