കൊച്ചി: ആഭരണ പ്രേമികള്‍ക്കും വിവാഹം ഉള്‍പെടെ അത്യാവശ്യങ്ങള്‍ക്കായി സ്വര്‍ണം വാങ്ങാന്‍ ഉദ്ദേശിക്കുന്നവര്‍ക്കും വീണ്ടും. തിരിച്ചടി. സ്വര്‍ണവിലയില്‍ ഇന്ന് വര്‍ധന. ഏകദേശം 400 രൂപയുടെ വര്‍ധനയാണ് ഇന്നുണ്ടായിരിക്കുന്നത്. യു.എസ് ഫെഡറല്‍ റിസര്‍വിലെ ഗവര്‍ണര്‍മാരില്‍ ഒരാളായ ലീസ കുക്കിനെ പ്രസിഡന്റ് ട്രംപ് പുറത്താക്കിയതാണ് ഇന്ന് തിരിച്ചടിയായത്.  കുക്കിനെ പുറത്താക്കുന്നതായി ട്രംപ് തന്റെ സാമൂഹിക മാധ്യമമായ ട്രൂത്തില്‍ കുറിപ്പിട്ടു. 

പിന്നാലെ ഡോളറിന്റെ മൂല്യം (യു.എസ് ഡോളര്‍ ഇന്‍ഡക്‌സ്) ഇടിഞ്ഞു തുടങ്ങി. ഇതിന് ശേഷമാണ് സ്വര്‍ണ വില കുതിച്ചത്. 

ഡോളര്‍ മൂല്യം ഇടിയുന്നത് തുടര്‍ന്നാല്‍ സ്വര്‍ണ വില ഇനിയും കൂടുമെന്ന് നിരീക്ഷകര്‍ പറയുന്നു. യു.എസ് ബാങ്ക് പലിശ നിരക്കില്‍ മാറ്റം വരുത്തുന്നതും സ്വര്‍ണവിപണിയെ ബാധിക്കും. 

 കേരളത്തില്‍ ഇന്ന് സ്വര്‍ണവില 22 കാരറ്റ് പവന് 400 രൂപയാണ് വര്‍ധിച്ചത്.  പവന് 74840 രൂപയാണ് പുതിയ വില. ഗ്രാമിനാകട്ടെ 50 രൂപ വര്‍ധിച്ച് 9355 രൂപയുമായി. 18 കാരറ്റ് സ്വര്‍ണം ഗ്രാമിന് 40 രൂപ വര്‍ധിച്ച് 7680 രൂപയായപ്പോള്‍  14 കാരറ്റ് സ്വര്‍ണം ഗ്രാമിന് 5980 രൂപയാണ് ഇന്നത്തെ നിരക്ക്. ഒമ്പത് കാരറ്റ് സ്വര്‍ണം ഗ്രാമിന് 3860 രൂപയുമാണ് ഇന്നത്തെ വില. അതേസമയം, ജി.എസ്.ടിയും (3%), പണിക്കൂലിയും (335%), ഹോള്‍മാര്‍ക്ക് ചാര്‍ജും (53.10 രൂപ) കൂടിച്ചേരുമ്പോള്‍ വില ഇനിയും വര്‍ധിക്കുമെന്നും വ്യാപാരികള്‍ ചൂണ്ടിക്കാട്ടുന്നു. 

രാജ്യാന്തര സ്വര്‍ണവില ഔണ്‍സിന് 3,352 ഡോളറില്‍ നിന്ന് രണ്ടാഴ്ചത്തെ ഉയരമായ 3,385 ഡോളറിലേക്ക് കുതിച്ചുകയറിയിരിക്കുകയാണ്. ഇന്ന് രാവിലെ ഇന്ത്യന്‍ റുപ്പി ഡോളറിനെതിരെ 14 പൈസ ഇടിഞ്ഞ് 87.72ല്‍ എത്തി. രൂപയുടെ മൂല്യം കുറയുന്നതും സ്വര്‍ണവില കൂടാന്‍ കാരണമാകും.

ഇന്ത്യക്കെതിരായ അമേരിക്കയുടെ പുതിയ താരിഫ് നാളെ മുതലാണ് നിലവില്‍ വരുന്നത്. ഇതും  വിപണിയില്‍ ആശങ്ക ഉയര്‍ത്തുന്നുണ്ട്.

അതേസമയം, അഡ്വാന്‍സ് ബുക്കിങ് ആണ് ഈ ചാഞ്ചാട്ടത്തിനിടയില്‍ ഒരു നല്ല മാര്‍ഗമായി വ്യാപാരികള്‍ ചൂണ്ടിക്കാട്ടുന്നത്. ബുക്ക് ചെയ്യുന്ന സമയത്തെ വില കുറവാണെങ്കില്‍ ആ വിലക്കും വാങ്ങുന്ന സമയത്തെ വിലയാണ് കുറവെങ്കില്‍ ആ വിലക്കും സ്വര്‍ണം കിട്ടുന്നതാണ് അഡ്വാന്‍സ് ബുക്കിങ്. 

gold prices saw a sharp rise today with indications of further increase. experts suggest making advance bookings to avoid higher costs.