ബംഗളൂരു: തമിഴ്‌നാടിന് കാവേരി നദിയില്‍ നിന്നും വെള്ളം വിട്ടുനല്‍കുമെന്ന് കര്‍ണാടക മുഖ്യമന്ത്രി സിദ്ധരാമയ്യ. തമിഴ്‌നാടിന് വെള്ളം വിട്ടുനല്‍കണമെന്ന് സുപ്രിം കോടതി ഉത്തരവിട്ടിരുന്നു. എന്നാല്‍, ഉത്തരവിനെതിരേ അപ്പീല്‍ നല്‍കുമെന്നും വിഷയത്തില്‍ സൂപ്പര്‍വൈസറി കമ്മിറ്റിയെ സമീപിക്കുമെന്നും മുഖ്യമന്ത്രി പറഞ്ഞു. ബംഗളൂരുവില്‍ സംയുക്ത പാര്‍ട്ടി യോഗത്തിനു ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു സിദ്ധരാമയ്യ. ഭരണഘടനയോട് പ്രതിബദ്ധതയുള്ള സംസ്ഥാനമായതിനാല്‍ കോടതി ഉത്തരവ് മറിക്കടക്കില്ലെന്നും അദ്ദേഹം പറഞ്ഞു.

കാവേരി നദിയില്‍ നിന്നും പ്രതിദിനം 15,000 ഘനഅടി വെള്ളം അടുത്ത പത്ത് ദിവസത്തേക്ക് വിട്ടുനല്‍കണമെന്നാണ് കോടതി ഉത്തരവ്. എന്നാല്‍, സുപ്രിം കോടതി വിധിയില്‍ ശക്തമായ പ്രക്ഷോഭമാണ് കര്‍ണാടകയില്‍ അരങ്ങേറിയത്. നിരവധിയിടങ്ങളില്‍ അക്രമസംഭവങ്ങള്‍ റിപ്പോര്‍ട്ട് ചെയ്തു.