തൊടുപുഴ:  ഇടുക്കി തൊടുപുഴയില്‍ കോപ്പിയടിച്ചത് പിടിച്ചതിന് വ്യാജ ലൈംഗിക പീഡന പരാതി നല്‍കിയ കേസില്‍ അധ്യാപകന്‍ ഒടുവില്‍ നിരപരാധിയെന്ന് കണ്ടെത്തി കോടതി. തൊടുപുഴ അഡീഷണല്‍ സെഷന്‍സ് കോടതിയുടേതാണ് കണ്ടെത്തല്‍. 11 വര്‍ഷത്തിനുശേഷമാണ് അദ്ദേഹത്തിന് നീതി ലഭിക്കുന്നത്. മൂന്നാര്‍ ഗവണ്‍മെന്റ് കോളജിലെ ഇക്കണോമിക്‌സ് വിഭാഗം മേധാവിയായിരുന്ന പ്രഫ. ആനന്ദ് വിശ്വനാഥനാണ് പതിനൊന്ന് വര്‍ഷത്തിന് ശേഷം നീതി ലഭിച്ച അധ്യാപകന്‍.

നാടിനും നാട്ടുകാര്‍ക്കും അതിലേറെ തന്റെ പ്രിയപ്പെട്ട വിദ്യാര്‍ഥികള്‍ക്കും മുന്നില്‍ ആ അധ്യാപകന്‍ തലകുനിച്ച് നടക്കേണ്ടി വന്നത് ഒരു വ്യാഴവട്ടക്കാലത്തോളമാണ്. നീണ്ട പതിനൊന്ന് വര്‍ഷങ്ങള്‍. അതും താന്‍ ചെയ്യുകയോ ചിന്തിക്കുകയോ പോലും ചെയ്യാത്ത ഒരു ആരോപണത്തിന്റെ പേരില്‍.

2014 ലാണ് അദ്ദേഹത്തിനെതിരെ വിദ്യാര്‍ത്ഥികള്‍ പരാതി നല്‍കിയത്. കോപ്പിയടി പിടിച്ചതിന്റെ പക വീട്ടാനായിരുന്നു ഇത്. എസ്.എഫ്.ഐ പ്രവര്‍ത്തകരായ വിദ്യാര്‍ഥിനികളാണ് ഇദ്ദേഹത്തിനെതിരെ പരാതി നല്‍കുന്നത്. 2014ലാണ് കേസിന് ആസ്പദമായ സംഭവം. സെപ്തംബര്‍ അഞ്ചിന് കോളജില്‍ നടന്ന എം.എ ഇക്കണോമിക്‌സ് രണ്ടാം സെമസ്റ്റര്‍ പരീക്ഷയില്‍ കോപ്പിയടിച്ച അഞ്ച് വിദ്യാര്‍ഥിനികളെ അഡീഷണല്‍ ചീഫ് എക്‌സാമിനര്‍ കൂടിയായ ആനന്ദ് വിശ്വനാഥ് പിടികൂടുന്നു. പിന്നാലെ, സംഭവം സര്‍വകലാശാലക്ക് റിപ്പോര്‍ട്ട് ചെയ്യാന്‍ പരീക്ഷ നിരീക്ഷകനെ ചുമതലപ്പെടുത്തുകയും ചെയ്തു. എന്നാല്‍, പരീക്ഷ നിരീക്ഷകന്‍ നിര്‍ദേശം അനുസരിച്ചില്ല.

ALSO READ: സുഡാനില്‍ മണ്ണിടിച്ചില്‍; 1000ത്തിലേറെ മരണം, ഒരു ഗ്രാമം പൂര്‍ണമായും ഇല്ലാതായെന്ന് റിപ്പോര്‍ട്ട്

പിന്നീട് 16ാം തീയതിയാണ് പരാതിയുടെ കാര്യം അറിഞ്ഞത്. മൂന്നാറിലെ സി.പി.എം ഓഫിസില്‍ വെച്ചാണ് പരാതി എഴുതിയതെന്ന് കുട്ടികള്‍ തന്നെ കോടതിയില്‍ മൊഴി നല്‍കിയിരുന്നു. സര്‍വകലാശാല നിയോഗിച്ച രണ്ട് സിന്‍ഡിക്കേറ്റ് അംഗങ്ങള്‍ അടങ്ങിയ അന്വേഷണ കമ്മീഷന്‍ നടത്തിയ അന്വേഷണത്തില്‍ ആരോപണം അടിസ്ഥാന രഹിതമാണെന്ന് കണ്ടെത്തി. പ്രിന്‍സിപ്പലിന്റെയും പരീക്ഷാ നിരീക്ഷകന്റെയും വീഴ്ച എടുത്തു പറയുന്നതായിരുന്നു ഇവരുടെ റിപ്പോര്‍ട്ട്. പീഡനക്കേസില്‍ കുടുക്കി പകവീട്ടാനാണ് കുട്ടികള്‍ ശ്രമിച്ചതെന്നും ഇതിന് പ്രിന്‍സിപ്പല്‍ കൂട്ടുനിന്നതായും രാഷ്ട്രീയ ഗൂഢാലോചന നടന്നതായും കഴിഞ്ഞ ദിവസം കോടതി നിരീക്ഷിച്ചു

വെറും ഒരു ദിവസം കൊണ്ട് അത്രയും കാലത്തെ അദ്ദേഹത്തിന്റെ ജീവിതത്തെ മുഴുവന്‍ സംശയമുനയില്‍ നിര്‍ത്താന്‍ പരാതി നല്‍കിയവര്‍ക്ക് കഴിഞ്ഞു. എന്നാല്‍ വിദ്യാര്‍ഥികള്‍ തനിക്കെതിരെ വ്യാജ പരാതിയാണ് നല്‍കിയതെന്ന് കോടതിക്ക് മുന്നില്‍ തെളിയിക്കാന്‍ അദ്ദേഹത്തിന് 11 വര്‍ഷം വേണ്ടി വന്നു. 

idukki court acquits teacher anand vishwanathan after 11 years in false sexual harassment case filed over exam malpractice issue.