ജിദ്ദ: ഉംറ തീര്‍ഥാടനത്തിനുള്ള വിസ അനുവദിക്കുന്നതിന് പുതിയ വ്യവസ്ഥകളുമായി സഊദി ഹജ്ജ് ഉംറ മന്ത്രാലയം. വിദേശ രാജ്യങ്ങളില്‍ നിന്നുള്ളവര്‍ക്ക് ഉംറ വിസ ലഭിക്കാനായി ഇനി 48 മണിക്കൂര്‍ കാത്തിരിക്കേണ്ടി വരും. അപേക്ഷകള്‍ പരിശോധിച്ച് അനുമതി നല്‍കാനായി ഇത്രയും സമയം വേണ്ടിവരുമെന്ന് ഹജ്ജ് ഉംറ മന്ത്രാലയത്തിനു കീഴിലെ നുസുക് ഉംറ പ്ലാറ്റ് ഫോം വ്യക്തമാക്കി.

ഉംറ സര്‍വിസ് കമ്പനികള്‍ക്ക് അയച്ച സര്‍ക്കുലറിലാണ് നുസുക് ഉംറ ഇക്കാര്യം അറിയിച്ചിരിക്കുന്നത്. പുതിയ ക്രമീകരണം റബീഉല്‍ അവ്വല്‍ എട്ട് മുതല്‍ നിലവില്‍ വരും. ഉംറ വിസ ലഭിക്കുന്നതിനു മുമ്പായി ഉംറ തീര്‍ഥാടകര്‍ പുണ്യഭൂമിയിലേക്ക് യാത്ര തിരിക്കുന്ന സാഹചര്യം ഒഴിവാക്കണമെന്നും ഉംറ തീര്‍ഥാടകരെ ഗ്രൂപ്പുകളായി അയക്കുമ്പോഴും വിമാന ടിക്കറ്റുകള്‍ വാങ്ങുമ്പോഴും ഇക്കാര്യം എല്ലാവരും കണക്കിലെടുക്കണമെന്നും നുസുക് ഉംറ പ്ലാറ്റ്‌ഫോം ആവശ്യപ്പെട്ടു.

നിലവില്‍ മണിക്കൂറുകള്‍ക്കുള്ളില്‍ ഉംറ വിസ ലഭിച്ചിരുന്നു. സഊദിയിലേക്ക് സന്ദര്‍ശന ആവശ്യത്തിനായി പോകാനായി പലരും ഇപ്പോള്‍ ഉംറ വിസ ഉപയോഗിക്കുന്നുണ്ട്. വി.എഫ്.എസില്‍ പോകാതെയും കാത്തിരിക്കാതെയും പെട്ടെന്ന് ലഭിക്കുന്നതിനാല്‍ ഉംറ വിസക്ക് ഇപ്പോള്‍ ആവശ്യക്കാര്‍ ഏറെയാണ്.

ALSO READ: സഫർ മാസത്തിൽ രണ്ട് വിശുദ്ധ ഗേഹങ്ങളിലെയും മൊത്തം സന്ദർശകരുടെ എണ്ണം 5 കോടി കവിഞ്ഞു

Saudi Ministry of Hajj and Umrah has introduced new conditions for granting visas for the Umrah