കൊല്ലം: ചരക്കുനീക്കത്തിൽ വരുമാനത്തിൽ റെക്കോഡ് നേട്ടവുമായി ഇന്ത്യൻ റെയിൽവേ. കഴിഞ്ഞ മാസം 14,100 കോടി രൂപയുടെ വരുമാനമാണ് ചരക്ക് ഗതാഗതം വഴി നേടിയത്. ഇത് എക്കാലത്തേയും ഉയർന്ന പ്രതിമാസ വരുമാനമാണ്. ഈ കാലയളവിൽ 130.9 ദശലക്ഷം ടൺ ചരക്കാണ് കയറ്റി അയച്ചത്. 

സ്റ്റീൽ, കൽക്കരി തുടങ്ങിയ മേഖലകളിലെ മികച്ച പ്രകടനമാണ് ഈ വളർച്ചയ്ക്ക് പ്രധാന കാരണം. അതേസമയം, മിനറൽ ഓയിൽ, ആഭ്യന്തര കണ്ടെയ്‌നറുകൾ, എക്‌സിം കണ്ടെയ്‌നറുകൾ എന്നിവയുടെ ലോഡിങിൽ പ്രതീക്ഷിച്ച വർധനവുണ്ടായില്ലെന്നും കണക്കുകൾ സൂചിപ്പിക്കുന്നു. ഇതിൽ കൂടി വർധനവുണ്ടായിരുന്നെങ്കിൽ നേട്ടത്തിൽ കുതിച്ചുചാട്ടമുണ്ടാകുമായിരുന്നു. 

ALSO READ: ഗര്‍ഭിണിയായപ്പോള്‍ ലോണിന്റെ തിരിച്ചടവ് മുടങ്ങി; വീട് ജപ്തി ചെയ്തു, യുവതിയും കൈക്കുഞ്ഞും അമ്മയും പെരുവഴിയില്‍

റെയിൽവേ മന്ത്രാലയത്തിന്റെ കണക്കുപ്രകാരം, കഴിഞ്ഞവർഷം ഓഗസ്റ്റിൽ 120.6 ദശലക്ഷം ടണ്ണായിരുന്ന ചരക്ക് കയറ്റുമതി. ഈ വർഷം 8.5 ശതമാനത്തിന്റെ വർധനവുണ്ടായി. ഈ സാമ്പത്തികവർഷത്തിൽ  5.2 ശതമാനം വർധനവോടെ 1,702.5 ദശലക്ഷം ടൺ എന്ന ലക്ഷ്യം കൈവരിക്കാനാണ് ലക്ഷ്യമിടുന്നത്.

വാർഷികാടിസ്ഥാനത്തിലെ കണക്കെടുപ്പിൽ കഴിഞ്ഞവർഷത്തെ അപേക്ഷിച്ച് ചരക്ക്‌നീക്കം 3.1 ശതമാനം വർധിച്ച് 673.6 ദശലക്ഷം ടണ്ണിൽ എത്തിയിട്ടുണ്ട്.  മൺസൂണിന് ശേഷം കൽക്കരി ലോഡിങിൽ വലിയ വർധനവ് പ്രതീക്ഷിക്കുന്നതായും റെയിൽവേ അധികൃതർ അറിയിച്ചു.

Indian Railways achieves record Railways earns Rs 14,100 crore last month