തൃശൂര്‍: ഡോക്ടര്‍മാര്‍ ബ്യൂറോക്രാറ്റുകളായി മാറരുതെന്ന് ഗവര്‍ണര്‍ പി സദാശിവം. ലുലു കണ്‍വെന്‍ഷന്‍ സെന്ററില്‍ ആരോഗ്യ ശാസ്ത്ര സര്‍വകലാശാലയുടെ ബിരുദദാന ചടങ്ങില്‍ സംസാരിക്കുകയായിരുന്നു അദ്ദേഹം.
സാങ്കേതിക വിദ്യക്കും അത്യാധുനിക യന്ത്രങ്ങള്‍ക്കും അടിമകളാകുന്ന പ്രവണത ഏറി വരികയാണ്. മനുഷ്യന്റെ സാന്ത്വന സ്പര്‍ശത്തോളം വരില്ല ഒരു യന്ത്രത്തിന്റേയും പ്രവര്‍ത്തനം. സാങ്കേതിക വിദ്യയുടെ ബലത്തിനപ്പുറം മനുഷ്യന്‍ മനുഷ്യനെ തിരിച്ചറിയുന്ന തലത്തിലേക്ക് ആരോഗ്യ പ്രവര്‍ത്തകര്‍ മാറണം. മാനുഷികമായ സമീപനമാണ് ആരോഗ്യമേഖലയില്‍ ഉണ്ടാവേണ്ടത്. ഗവര്‍ണര്‍ പറഞ്ഞു.
വിവരസാങ്കേതിക വിദ്യയുടെ വളര്‍ച്ചയ്‌ക്കൊത്ത് സമൂഹം മാറുന്ന കാര്യം ഡോക്ടര്‍മാര്‍ ഓര്‍ക്കണം. കേവലം ഒരു ശുശ്രൂഷകനെയോ ചികിത്സകനെയോ അല്ല പൊതുസമൂഹം ഡോക്ടറില്‍ നിന്ന് പ്രതീക്ഷിക്കുന്നത്. പൊതുസമൂഹത്തെ സ്വാധീനിക്കാനും അവരോട് ഇടപെടാനും കഴിയും വിധം വിശ്വാസ്യത ആര്‍ജിക്കാനും ഡോക്ടര്‍മാര്‍ തയ്യാറാകണം.
എങ്കില്‍ മാത്രമേ പ്രതിരോധ വാക്‌സിനേഷന്‍ പോലുളള പ്രവര്‍ത്തനങ്ങളില്‍ സമൂഹത്തെ അടുപ്പിക്കാന്‍ കഴിയൂ-ഗവര്‍ണര്‍ പറഞ്ഞു.
വിവിധ വിഷയങ്ങളിലെ റാങ്ക് ജേതാക്കളായ ഹനബഷീര്‍, അഭീഷ്ണ അശോക്, സൂസമ്മ വര്‍ഗീസ്, അഞ്ജു ജി.എസ് എന്നിവര്‍ക്ക് ഗവര്‍ണര്‍ പി സദാശിവം സ്വര്‍ണ മെഡല്‍ നല്‍കി.