കോഴിക്കോട്: ജീവനക്കാരിയോട് അപമര്യാദയായി പെരുമാറിയ ഉദ്യോഗസ്ഥനെ സസ്‌പെൻഡ് ചെയ്തു. കോഴിക്കോട് കളക്ടറേറ്റിൽ ഓണാഘോഷത്തിനിടെയാണ് സംഭവം. വ്യാഴാഴ്ച റവന്യു വകുപ്പ് സംഘടിപ്പിച്ച പരിപാടിക്കിടെ ഉദ്യോഗസ്ഥൻ അപമര്യാദയായി പെരുമാറിയതായി കാണിച്ച് യുവതി നൽകിയ പരാതിയിലാണ് നടപടി.

സംഭവത്തിൽ കലക്ടറേറ്റിലെ ആഭ്യന്തര പരാതി കമ്മിറ്റിക്ക് മുമ്പാകെയാണ് ജീവനക്കാരി പരാതി നൽകിയത്. കോഴിക്കോട് ജില്ലാ കളക്ടർ ഉൾപ്പെടെ പങ്കെടുത്ത ഓണാഘോഷ പരിപാടിക്കിടെയായിരുന്നു ജീവനക്കാരിയോട് അപമര്യദയായി പെരുമാറിയത്. സംഭവം ഡെപ്യൂട്ടി കളക്ടറുടെ നേതൃത്വത്തിലുള്ള ആഭ്യന്തര പരാതി സമിതി അന്വേഷിച്ചു. പരാതിക്കാരിയുടെയും ജീവനക്കാരന്റെയും മൊഴികൾ രേഖപ്പെടുത്തിയിരുന്നു.

ALSO READ: ഓണാഘോഷം അതിരുവിട്ടു; വിദ്യാർഥികൾ രൂപമാറ്റം വരുത്തിയ ആറ് കാറുകളുമായി ക്യാമ്പസിലെത്തി, പൊലിസ് കേസെടുത്തു

ഇതിന് പിന്നാലെ ആഭ്യന്തര പരാതി കമ്മിറ്റി സമർപ്പിച്ച അന്വേഷണ റിപ്പോർട്ടിനെ തുടർന്നാണ് നടപടി. സസ്പെൻഷന് പുറമെയുള്ള നടപടികളിലേക്ക് നീങ്ങുമോ എന്ന കാര്യം വൈകാതെ തീരുമാനിക്കും.

അതേസമയം, സംസ്ഥാനത്തിന്റെ ഔദ്യോഗിക ഓണം വാരാഘോഷം സമാപന ദിവസത്തെ ഘോഷയാത്ര ഫ്‌ലാഗ് ഓഫ് ഗവർണർ നിർവഹിക്കും. ഗവർണറും സർക്കാരും തമ്മിലുള്ള പോര് തുടരുന്നതിനിടെയാണ് ഓണം ആഘോഷത്തിന്റെ ഭാഗമായുള്ള ഘോഷയാത്രയ്ക്ക് ഗവർണറെ മന്ത്രിമാർ നേരിട്ടെത്തി ക്ഷണിച്ചത്. മന്ത്രിമാരായ വി ശിവൻകുട്ടി, പിഎ മുഹമ്മദ് റിയാസ് എന്നിവർ രാജ്ഭവനിൽ നേരിട്ടെത്തി ഗവർണറെ ക്ഷണിക്കുകയായിരുന്നു.