ക്രിക്കറ്റ് ലോകം ആകാംഷയോടെ കാത്തിരിക്കുന്ന ഏഷ്യ കപ്പ് ആരംഭിക്കാൻ ഇനി ദിവസങ്ങൾ മാത്രമേ ബാക്കിയുള്ളൂ. സെപ്റ്റംബർ ഒമ്പതിനാണ് ഏഷ്യയിലെ ക്രിക്കറ്റ് പോരാട്ടങ്ങൾക്ക് തുടക്കമാവുന്നത്. സെപ്റ്റംബർ 10ന് യുഎഇക്കെതിരെയാണ് ഏഷ്യ കപ്പിൽ ഇന്ത്യയുടെ ആദ്യ മത്സരം. ആരാധകർ ഏറെ പ്രതീക്ഷയോടെ കാത്തിരിക്കുന്ന ഇന്ത്യ-പാകിസ്ഥാൻ ഗ്രൂപ്പ് ഘട്ട മത്സരം സെപ്റ്റംബർ 14ന് നടക്കും. ടൂർണമെന്റിൽ ഗ്രൂപ്പ് എയിലാണ് ഇന്ത്യ ഇടം നേടിയിട്ടുള്ളത്. ഇന്ത്യക്കൊപ്പം പാകിസ്ഥാൻ, യുഎഇ, ഒമാൻ എന്നീ ടീമുകളുമാണ് ഗ്രൂപ്പിലുള്ളത്‌. 

മലയാളി സൂപ്പർതാരം സഞ്ജു സാംസണും ഏഷ്യ കപ്പിനായി തയ്യാറെടുത്തുകൊണ്ടിരിക്കുകയാണ്. ടീമിൽ ഫസ്റ്റ് ചോയിസ് വിക്കറ്റ് കീപ്പറായാണ് സഞ്ജു ഇടം നേടിയത്. നിലവിൽ മിന്നും ഫോമിൽ കളിക്കുന്ന സഞ്ജുവിന് ഏഷ്യ കപ്പിൽ ഒരു വമ്പൻ റെക്കോർഡും സ്വന്തമാക്കാൻ സാധിക്കും. ടി-20 ഫോർമാറ്റുകളിൽ നടന്ന ഏഷ്യ കപ്പ് ടൂർണമെന്റുകളിൽ ഏറ്റവും കൂടുതൽ സിക്സർ നേടുന്ന താരമായി മാറാൻ സഞ്ജുവിന് സാധിക്കും. ഏഷ്യ കപ്പിൽ 14 സിക്‌സറുകൾ നേടിയാൽ സഞ്ജുവിന് ഈ നേട്ടം കൈവരിക്കാം. 

നിലവിൽ കേരള ക്രിക്കറ്റ് ലീഗിൽ കൊച്ചി ബ്ലൂ ടൈഗേഴ്‌സിനായി ആറ് മത്സരങ്ങളിൽ നിന്നും 30 സിക്സറുകളാണ് സഞ്ജു അടിച്ചുകൂട്ടിയത്. ഒരു  സെഞ്ച്വറിയും മൂന്ന് അർദ്ധ സെഞ്ച്വറിയും അടക്കം 368 റൺസാണ് സഞ്ജു നേടിയത്. ഏഷ്യ കപ്പിലും സഞ്ജു തകർത്തടിച്ചാൽ ഈ റെക്കോർഡും തകർന്നു വീഴും. 

ALSO READ: ഞെട്ടിപ്പിക്കുന്ന നീക്കം, സഞ്ജുവിന് കനത്ത തിരിച്ചടി; നിർണായക തീരുമാനമെടുത്ത് രാജസ്ഥാൻ

നിലവിൽ ടി-20 ഫോർമാറ്റുകളിൽ നടന്ന ഏഷ്യ കപ്പിൽ ഏറ്റവും കൂടുതൽ സിക്സർ നേടിയ താരം അഫ്ഗാനിസ്ഥാന്റെ നജീബുള്ള സദ്രാനാണ്. 13 സിക്സുകളാണ് താരം നേടിയിട്ടുള്ളത്. 12 സിക്സർ വീതം നേടിയ അഫ്ഗാൻ താരം റഹ്മാനുള്ള ഗുർബാസ് ഇന്ത്യൻ താരം രോഹിത് ശർമ്മ എന്നിവരാണ് ഈ പട്ടികയിൽ രണ്ടാം സ്ഥാനത്തുള്ളത്. 11 സിക്സുകൾ നേടിയ വിരാട് കോഹ്‌ലിയാണ് പട്ടികയിലെ മൂന്നാമൻ.

There are only days left until the eagerly awaited Asia Cup begins in the cricket world. Sanju Samson is also preparing for the Asia Cup.Sanju, who is in brilliant form in current kerala cricket league. sanju can also set a huge record in the Asia Cup.