വെടിനിര്‍ത്തല്‍ നടപ്പാക്കുന്നതിനായി ഗസ്സയില്‍ സ്വതന്ത്ര ദേശീയ ഭരണകൂടമെന്ന നിര്‍ദ്ദേശം ഉള്‍പെടെ അംഗീകരിക്കാന്‍ തങ്ങള്‍ തയ്യാറെന്ന് ഹമാസ്. മുഴുവന്‍ ഇസ്‌റാഈലി ബന്ദികളേയും മോചിപ്പിക്കുമെന്നും ഹമാസ് അറിയിച്ചു. എന്നാല്‍ ഹമാസിന്റെ പ്രസ്താവന നിഷേധിക്കുന്ന നിലപാടാണ് ഇസ്‌റാഈലിന്റേത്. ഇസ്‌റാഈല്‍ കാബിനറ്റ് മുന്നോട്ട് വെക്കുന്ന നിബന്ധനകള്‍ ഹമാസ് അംഗീകരിച്ചാല്‍ ആ നിമിഷം വെടിനിര്‍ത്തല്‍ നടപ്പാക്കുമെന്ന് പ്രധാനമന്ത്രി ബെന്യാമിന്‍ നെതന്യാഹുവിന്റെ ഓഫിസ് വ്യക്തമാക്കി. 

ആഗസ്റ്റ് 18ന് മധ്യസ്ഥര്‍ മുന്നോട്ട് വെച്ച നിര്‍ദ്ദേശങ്ങളില്‍ സയണിസ്റ്റ് രാജ്യത്തിന്റെ പ്രതികരണത്തിനായി കാത്തിരിക്കുകയാണ് തങ്ങളെന്ന് ഹമാസ് സന്ദേശത്തില്‍ വ്യക്തമാക്കുന്നു. ഹമാസിന് പുറമേ ഫലസ്തീനിലെ മറ്റു പ്രതിരോധ സംഘങ്ങളും നിര്‍ദ്ദേശങ്ങള്‍ അംഗീകരിച്ചിട്ടുണ്ടെന്നും സന്ദേശത്തില്‍ പറയുന്നു. 

ALSO READ: ഗസ്സ വെടിനിര്‍ത്തല്‍ കരാര്‍: ഇസ്‌റാഈല്‍ മറുപടി നല്‍കിയില്ലെന്ന് ഖത്തര്‍; ഗസ്സ പൂര്‍ണമായും കീഴ്‌പ്പെടുത്താനുള്ള ശ്രമം എല്ലാവരെയും അപകടത്തിലാക്കുമെന്നും വിദേശകാര്യ വക്താവ്

'കരാരുമായി മുന്നോട്ട് പോകാനുള്ള പ്രസ്ഥാനത്തിന്റെ സന്നദ്ധത ഞങ്ങള്‍ ആവര്‍ത്തിക്കുകയാണ്. അധിനിവേശ സേന തടവിലാക്കിയ നിശ്ചിത എണ്ണം ഫലസ്തീന്‍ തടവുകാര്‍ക്കായി തങ്ങള്‍ ബന്ദികളാക്കിയ മുഴുവന്‍ ഇസ്‌റാഈലികളേയും വിട്ടയക്കും.  ഗസ്സ മുനമ്പിലെ യുദ്ധം അവസാനിപ്പിക്കുന്ന കരാറിന്റെ ഭാഗമായി, മുഴുവന്‍ അധിനിവേശ സേനകളെയും പിന്‍വലിക്കണം. ഗസ്സയിലേക്ക് സഹായങ്ങള്‍ എത്തിക്കുന്നതിനും മറ്റുമായി ക്രോസിംഗുകള്‍ തുറക്കണം. പുനര്‍നിര്‍മ്മാണ പ്രക്രിയ ആരംഭിക്കുകയും ചെയ്യണം' ഹമാസ് സന്ദേശത്തില്‍ വ്യക്തമാക്കുന്നു. ഗസ്സയിലെ മുഴുന്‍ കാര്യങ്ങളും നിറവേറ്റുകയും ഉത്തരവാദിത്തം ഏറ്റെടുക്കുകയും ചെയ്യാനുതകുന്ന ഒരു സ്വതന്ത്ര ഭരണകൂടത്തെ തങ്ങള്‍ അംഗീകരിക്കുമെന്നും ഹമാസ് വ്യക്തമാക്കുന്നു. 

അതേസമയം, ഹമാസിന്റെ പ്രസ്താവനയെ പാടെ തള്ളുകയാണ് ഇസ്‌റാഈല്‍. പുതിയതൊന്നും അംഗീകരിക്കാത്ത ഹമാസിന്റെ നുണകള്‍ എന്നാണ് നെതന്യാഹു ഇതിനെ വിശേഷിപ്പിച്ചത്. രാജ്യത്ത് പ്രതിഷേധം പടര്‍ന്നു പിടിച്ചിട്ടു പോലും ബന്ദി മോചന കരാറുമായി ബന്ധപ്പെട്ട ചര്‍ച്ചകളിലേക്കൊന്നും നെതന്യാഹു മന്ത്രിസഭ കടന്നിട്ടില്ല. ഗസ്സയില്‍ ആക്രമണത്തിന്റെ തീവ്രത വര്‍ധിപ്പിക്കുന്നതിലാണ് നെതന്യാഹു ഭരണകൂടത്തിന്റെ ശ്രദ്ധയെന്ന് ഇസ്‌റാഈല്‍ മാധ്യമമായ ഹാരേട്‌സ് റിപ്പോര്‍ട്ട് ചെയ്യുന്നു. 

അതേസമയം, ഗസ്സയില്‍ ഇസ്‌റാഈല്‍ കൂട്ടക്കൊല തുടരുകയാണ്. ബുധനാഴ്ച മാത്രം 73 ഫലസ്തീനികളാണ് ആക്രമണങ്ങളില്‍ കൊല്ലപ്പെട്ടത്. ഗസ്സ സിറ്റിയില്‍ മാത്രം 43 പേര്‍ കൊല്ലപ്പെട്ടെന്നും റിപ്പോര്‍ട്ടുകള്‍ പറയുന്നു.

Hamas Movement is still awaiting the response of the zionist enemy to the proposal presented by the mediators to the Movement on August 18th, which the Movement and Palestinian factions have agreed to.