കാഠ്മണ്ഡു: നേപ്പാളിൽ സോഷ്യൽമീഡിയാ നിരോധനത്തിനെതിരെ യുവാക്കൾ തെരുവിലിറങ്ങിയതോടെ നിരോധനം പിൻവലിച്ചിട്ടും പ്രക്ഷോഭം തുടരുന്നു. പ്രധാനമന്ത്രി കെ.പി ശർമ്മ ഒലി രാജിവെക്കാതെ സമരത്തിൽ നിന്ന് പിന്മാറിലെന്ന നിലപാടിലാണ് പ്രക്ഷോഭകർ. വൻ ആക്രമണമാണ് നേപ്പാളിൽ നടക്കുന്നത്. രാഷ്ട്രപതിയുടെയും മന്ത്രിമാരുടെയും വീടുകൾ പ്രക്ഷോഭകർ ആക്രമിച്ചു. പ്രധാനമന്തിയുടെ വീടിന് സമീപം വെടിവെപ്പുണ്ടായി. ശർമ്മ ഒലി വൈകാതെ രാജ്യം വിട്ടേക്കും. യുഎഇയുമായി ഇതിനായുള്ള ചർച്ചകൾ നടന്നതായാണ് വിവരം.

മുതിർന്ന രാഷ്ട്രീയ നേതാക്കളുടെ വീടുകളും ഓഫീസുകളും ലക്ഷ്യമിട്ട് പ്രതിഷേധക്കാർ ആക്രമണം തുടരുകയാണ്. നേപ്പാൾ പ്രസിഡന്റിന്റെയും പ്രധാനമന്ത്രിയുടെയും സ്വകാര്യ വസതികൾ ഉൾപ്പെടെ നിരവധി നേതാക്കളുടെ വസതികൾ ആക്രമിക്കപ്പെടുകയും നശിപ്പിക്കപ്പെടുകയും തീയിടപ്പെടുകയും ചെയ്തിട്ടുണ്ട്. ഭക്തപൂരിലെ ബാൽക്കോട്ടിലുള്ള പ്രധാനമന്ത്രി ശർമ്മ ഒലിയുടെ വസതിക്ക് സമീപം ഉണ്ടായ വെടിവെപ്പിൽ രണ്ട് പേർക്ക് പരുക്കേറ്റു.രാജിവച്ച ആഭ്യന്തരമന്ത്രി രമേശ് ലേഖക്കിന്റെ വസതി പ്രതിഷേധക്കാർ നശിപ്പിക്കുകയും തീയിടുകയും ചെയ്തു.

ഭരണകക്ഷി നേതാവും നേപ്പാളി കോൺഗ്രസ് പ്രസിഡന്റുമായ ഷേർ ബഹാദൂർ ദ്യൂബയുടെ വസതി പ്രതിഷേധക്കാർ കയ്യേറി. കെട്ടിടത്തിന് തീയിട്ടതോടെ സ്ഥിതി അക്രമാസക്തമായി. പരിസരത്തുണ്ടായിരുന്ന അര ഡസനോളം വാഹനങ്ങളെങ്കിലും പ്രക്ഷോഭകർ കത്തിച്ചു.

ALSO READ: നേപ്പാളില്‍ 'ജെന്‍ സി'ക്ക് മുന്നില്‍ സര്‍ക്കാര്‍ മുട്ടുമടക്കി; സോഷ്യല്‍മീഡിയാ നിരോധനം പിന്‍വലിച്ചു
 
ഡിസ്‌കോർഡ് ആപ്പ് ഉപയോഗിച്ചാണ് പ്രതിഷേധക്കാർ നടപടികൾ ഏകോപിപ്പിക്കുന്നത് എന്നാണ് വിവരം. വിമാനത്താവളത്തിൽ സംഘടിക്കുക, വിമാന ടയറുകൾ പ്രവർത്തനരഹിതമാക്കാൻ അസറ്റിലീൻ വാതകം ഉപയോഗിക്കുക, വെടിമരുന്നിനായി പൊലിസ് സ്റ്റേഷനുകൾ ലക്ഷ്യമിടുക തുടങ്ങിയ സന്ദേശങ്ങൾ ഈ ആപ്പ് വഴി പങ്കുവെച്ചതായി കണ്ടെത്തിയിട്ടുണ്ട്.

അസ്വസ്ഥതകൾ രൂക്ഷമായിക്കൊണ്ടിരിക്കുന്ന സാഹചര്യത്തിൽ, രാഷ്ട്രീയ സ്വതന്ത്ര പാർട്ടിയിൽ നിന്നുള്ള 21 പാർലമെന്റ് അംഗങ്ങൾ കൂട്ടത്തോടെ രാജിവയ്ക്കാൻ തീരുമാനിച്ചു. പ്രക്ഷോഭം നിയന്ത്രിക്കാനാകാത്തതിനെ തുടർന്ന് നേപ്പാളി കോൺഗ്രസിലെ ശേഖർ കൊയ്‌രാള തന്റെ വിഭാഗത്തിലെ മന്ത്രിമാരോട് ഒലിയുടെ നേതൃത്വത്തിലുള്ള സർക്കാരിൽ നിന്ന് രാജിവയ്ക്കാൻ ആവശ്യപ്പെട്ടു. ഗഗൻ താപ്പ വിഭാഗം അടുത്ത നീക്കത്തെക്കുറിച്ച് ആലോചിക്കുന്നതായും റിപ്പോർട്ട് ഉണ്ട്. 

ഇതിനിടെ, ജലവിതരണ മന്ത്രി പ്രദീപ് യാദവ് ഇന്ന് മന്ത്രി സ്ഥാനം രാജിവച്ചു. തിങ്കളാഴ്ച നടന്ന ജനറൽ ഇസഡ് പ്രതിഷേധത്തിനിടെ 19 പേർക്ക് ജീവൻ നഷ്ടപ്പെട്ട സംഭവത്തെത്തുടർന്ന് സർക്കാരിൽ സേവനമനുഷ്ഠിക്കാൻ താൻ യോഗ്യനല്ലെന്ന് വ്യക്തമാക്കിയാണ് മന്ത്രി പ്രദീപ് യാദവ് രാജിവച്ചത്. 'പ്രിയപ്പെട്ട യുവ സഹോദരീ സഹോദരന്മാരേ, നിങ്ങളാണ് എന്റെ ആദ്യ സഖ്യകക്ഷിയും എന്റെ അഭിനിവേശത്തിന്റെയും ഊർജ്ജത്തിന്റെയും ഉറവിടം. ശരിയായ ദിശയിൽ യുവതലമുറയെ പിന്തുണയ്ക്കാനും സംയമനം പാലിക്കാനും എല്ലാവരോടും ഞാൻ അഭ്യർത്ഥിക്കുന്നു' - അദ്ദേഹം കൂട്ടിച്ചേർത്തു.

ALSO READ: ആളിക്കത്തി ജെൻസി പ്രക്ഷോഭം: നേപ്പാളിൽ കുടുങ്ങിയവരിൽ മലയാളികളും; കോഴിക്കോട് സ്വദേശികളായ 40 അംഗ സംഘത്തിന്റെ യാത്ര പ്രതിസന്ധിയിൽ

അതേസമയം, രാജ്യത്തുടനീളം പ്രതിഷേധം ഉയരുന്നതിനിടെ നേപ്പാൾ പ്രധാനമന്ത്രി കെ.പി ശർമ്മ ഒലി ഇന്ന് വൈകുന്നേരം 6 മണിക്ക് സർവകക്ഷി യോഗം വിളിച്ചു. ഈ ദുഷ്‌കരമായ സാഹചര്യത്തിൽ ശാന്തത പാലിക്കാൻ എല്ലാ സഹോദരീസഹോദരന്മാരോടും ഞാൻ വിനീതമായി അഭ്യർത്ഥിക്കുന്നു എന്നും പ്രധാനമന്ത്രി പറഞ്ഞു.

ഇതിനിടെ, പ്രധാനമന്ത്രി കെ.പി ശർമ്മ ഒലി വൈദ്യചികിത്സയ്ക്കായി ദുബൈയിലേക്ക് പോകാൻ ഒരുങ്ങുകയാണെന്ന് അദ്ദേഹവുമായി ബന്ധപ്പെട്ട അടുത്ത വൃത്തങ്ങൾ അറിയിച്ചു. യാത്രയ്ക്കായി സ്വകാര്യ വിമാനക്കമ്പനിയായ ഹിമാലയ എയർലൈൻസിനെ സജ്ജരാക്കിയിട്ടുണ്ട്. എന്നാൽ ഇത് രാജ്യത്തെ പ്രക്ഷോഭം വർധിച്ചുവരുന്ന സാഹചര്യത്തിലാണ് രാജ്യം വിടുന്നത്. ശർമ്മ  ഒലി തന്റെ ഉപപ്രധാനമന്ത്രിക്ക് തന്റെ ചുമതകൾ കൈമാറിയിട്ടുണ്ട്.