സ്വകാര്യ സ്വാശ്രയ മെഡിക്കല്‍ കോളജുകള്‍ മാനേജ്‌മെന്റ്, എന്‍.ആര്‍.ഐ സീറ്റുകളിലേക്ക് നാളെക്കൂടി അപേക്ഷിക്കാം. കോളജുകള്‍ ഓണ്‍ലൈന്‍ അപേക്ഷ സ്വീകരിക്കുന്നതില്‍ വ്യാപക ക്രമക്കേട് കണ്ടെത്തിയതിനെ തുടര്‍ന്നു ജസ്റ്റിസ് ജയിംസ് കമ്മിറ്റിയുടേതാണ് തീരുമാനം. ഡെന്റല്‍ കോളജുകളിലേക്ക് അപേക്ഷിക്കാനുള്ള തിയതിയും നാളെവരെ നീട്ടിയിട്ടുണ്ട്. നേരത്തേ സെപ്റ്റംബര്‍ ആറായിരുന്നു അപേക്ഷിക്കേണ്ട അവസാന തിയതി.
ആറിനു രാത്രി 12വരെ അപേക്ഷ സ്വീകരിക്കുമെന്നിരിക്കെ ചില കോളജുകള്‍ ഇന്നു വൈകിട്ട് അഞ്ചിനുതന്നെ ഇതു ക്ലോസ് ചെയ്തിരുന്നു. ചിലരുടെ വെബ്‌സൈറ്റും തകരാറിലായി. എന്നാല്‍ ഇതു ബോധപൂര്‍വം ചെയ്തതാണെന്നു കമ്മിറ്റി കണ്ടെത്തുകയായിരുന്നു. പുതുക്കിയ ഷെഡ്യൂള്‍ പ്രകാരം നാളെ അര്‍ധരാത്രിവരെ അപേക്ഷ സമര്‍പ്പിക്കാം. അപേക്ഷാ വിവരങ്ങള്‍ 10നു കോളജുകള്‍ വെബ്‌സൈറ്റില്‍ പ്രസിദ്ധീകരിക്കണം.
അപാകതകളുണ്ടെങ്കില്‍ 11നകം അറിയിക്കണം. യോഗ്യരായ അപേക്ഷകരുടെ പട്ടിക 13നു പ്രസിദ്ധീകരിക്കണം. ഓണ്‍ലൈന്‍ അപേക്ഷയുടെ പ്രിന്റൗട്ട് ഡി.ഡി സഹിതം കോളജില്‍ സമര്‍പ്പിക്കേണ്ട അവസാന തിയതി 13 ആണ്.