റിയാദ്: സ്വദേശി യുവാവുമായി തര്‍ക്കത്തില്‍ ഏര്‍പ്പെട്ട മലയാളി യുവാവിനെ മരിച്ച നിലയില്‍ കണ്ടെത്തി. ദമാമിലെ ബാദിയയില്‍ നിന്നാണ് യുവാവിന്റെ മൃതദേഹം കണ്ടെത്തിയത്. തിരുവനന്തപുരം ആറാല്ലുമ്മൂട് സ്വദേശി ലോട്ടസ് വില്ലയില്‍ അഖില്‍ അശോക് കുമാര്‍ (28) ആണ് കൊല്ലപ്പെട്ടത്. കഴിഞ്ഞ വെള്ളിയാഴ്ചയായിരുന്നും സംഭവം.

സഊദി പൗരനുമായുള്ള തര്‍ക്കത്തിനിടെ ഉന്തും തള്ളുമുണ്ടാവുകയും തുടര്‍ന്ന് ഏണിപ്പടികളില്‍ നിന്ന് വീണ് മരിച്ച നിലയില്‍ യുവാവിനെ കണ്ടെത്തുകയായിരുന്നു എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. യുവാവുമായി വാക്കുതര്‍ക്കത്തില്‍ ഏര്‍പ്പെട്ട സ്വദേശി പൗരന്‍ ഇതിനു ശേഷം ഓടിരക്ഷപ്പെട്ടിരുന്നു. ഇരുവരും തമ്മിലുള്ള അടിപിടിക്ക് സാക്ഷിയായ സുഡാനി പൗരന്‍ അറിയിച്ചത് പ്രകാരം പൊലിസ് സ്ഥലത്തെത്തി. ഉടന്‍ തന്നെ പൊലിസ് സ്വദേശി പൗരനെ തിരിച്ചറിയുകയും അറസ്റ്റ് ചെയ്യുകയും ചെയ്തു.

ALSO READ: കാൽനൂറ്റാണ്ട് ആയി സൗദിയിൽ പ്രവാസി: പിന്നീട് നാട്ടിൽ പോയില്ല, അവസാനിപ്പിച്ചു മടങ്ങാനുള്ള ഒരുക്കത്തിനിടെ മലപ്പുറം സ്വദേശിക്ക് ഹൃദയാഘാതംമൂലം മരണം 

കഴിഞ്ഞ ഏഴ് വര്‍ഷമായി ദമാമിന് സമീപമുള്ള ഖത്തീഫില്‍ ടെക്‌നീഷ്യനായി ജോലി ചെയ്തു വരികയായിരുന്നു തിരുവനന്തപുരം സ്വദേശിയായ അഖില്‍. അഖില്‍ സംഭവ സ്ഥലത്ത് എത്തിയതില്‍ ദുരൂഹതയുണ്ടെന്നാണ് വിവരം. യുവാവ് ബാദിയയില്‍ എന്തിനാണ് പോയതെന്ന് സുഹൃത്തുക്കള്‍ക്കും അറിയില്ല.

അഖിലിനൊപ്പം ഖത്തീഫില്‍ വിസിറ്റിംങ് വിസയില്‍ എത്തിയ യുവാവിന്റെ ഭാര്യയും മാതാപിതാക്കളും രണ്ടാഴ്ച മുമ്പാണ് നാട്ടില്‍ തിരിച്ചെത്തിയത്. രണ്ട് വര്‍ഷം മുമ്പായിരുന്നു അഖിലിന്റെ വിവാഹം. റിയാദിലുള്ള യുവാവിന്റെ സഹോദരന്‍ ആദര്‍ശ് ദമാമിലെത്തി മൃതദേഹം തിരിച്ചറിഞ്ഞിട്ടുണ്ട്. നടപടി ക്രമങ്ങള്‍ ലോക കേരള സഭാംഗവും സാമൂഹിക പ്രവര്‍ത്തകനുമായ നാസ് വക്കത്തിന്റെ നേതൃത്വത്തില്‍ പുരോഗമിക്കുകയാണ്. സംസ്‌കാരം നാട്ടില്‍ നടത്തും.

A Malayali youth was found dead in Saudi Arabia following an argument with a local youth. The suspect is in police custody as authorities investigate the incident, raising concerns about safety and disputes abroad.