ന്യൂഡല്‍ഹി: വ്യാജവാര്‍ത്ത പ്രചരിപ്പിച്ചെന്ന ആരോപണത്തില്‍ കേന്ദ്ര സര്‍ക്കാര്‍ അനുകൂല വാര്‍ത്താ ഏജന്‍സിയായ എ.എന്‍.ഐയുടെ എഡിറ്റര്‍ക്കെതിരെ കേസ്. കേന്ദ്ര തെരഞ്ഞെടുപ്പ് കമ്മീഷന്റെ പേരില്‍ വ്യാജ വാര്‍ത്തകള്‍ പ്രചരിപ്പിച്ചെന്നാണ് ആരോപണം. കേസില്‍ എ.എന്‍.ഐ എഡിറ്റര്‍ സ്മിത പ്രകാശിനെതിരെ ലഖ്‌നോ കോടതിയാണ് കേസ് രജിസ്റ്റര്‍ ചെയ്തത്. 

മുന്‍ ഐ.പി.എസ് ഉദ്യോഗസ്ഥനായ അമിതാഭ് ഠാക്കൂറാണ് എന്‍.ഐക്കെതിരെ കോടതിയെ സമീപിച്ചത്. പരാതിക്കാരന്റെ വാദങ്ങള്‍ കേട്ട കോടതി കേസെടുക്കാവുന്ന വിഷയമാണെന്ന് ബോധ്യപ്പെട്ടതിന്റെ അടിസ്ഥാനത്തിലാണ് തുടര്‍നടപടികള്‍ സ്വീകരിച്ചത്. 

കേന്ദ്ര തെരഞ്ഞെടുപ്പ് കമ്മീഷനെ ഉദ്ധരിച്ച് എ.എന്‍.ഐ ആവര്‍ത്തിച്ച് നല്‍കിയ വാര്‍ത്തകള്‍ ഔദ്യോഗിക വെബ്‌സൈറ്റുകളിലോ, സോഷ്യല്‍ മീഡിയ പ്ലാറ്റ്‌ഫോമുകളിലോ പങ്കുവെച്ചിട്ടില്ലെന്ന് ഹരജിക്കാരന്‍ വാദിച്ചു. ഔദ്യോഗിക പ്രസ്താവനയില്ലാതെ കമ്മീഷന്റെ പേരില്‍ ഏജന്‍സി വ്യാജ വാര്‍ത്തകള്‍ പ്രചരിപ്പിക്കുകയായിരുന്നു. 2025 ആഗസ്റ്റ് മുതല്‍ എ.എന്‍.ഐയുടേതായി വന്ന പോസ്റ്റുകളും തെരഞ്ഞെടുപ്പ് കമ്മീഷന്റെ ഔദ്യോഗിക സ്ഥിരീകണത്തിന് മുന്‍പോ അതില്ലാതെയോ പ്രസിദ്ധീകരിച്ച വാര്‍ത്തകളും കോടതിയില്‍ ഹരജിക്കാരന്‍ സമര്‍പ്പിച്ചു. രാഹുല്‍ ഗാന്ധിയുടെ വോട്ട് ചോരി ആരോപണത്തിനെതിരെ തെരഞ്ഞെടുപ്പ് കമ്മീഷന്റെ പ്രസ്താവന എന്നവകാശപ്പെട്ട് വന്ന പോസ്റ്റുകളും ഇതില്‍ ഉള്‍പ്പെടും. 

ALSO READ: ഹമാസ് ഭീകരസംഘടനയല്ല, ആയുധങ്ങളോടെ ഇസ്റാഈലിനെതിരെ തിരിച്ചടിക്കണം; ടെൽ അവീവിൽ ബോംബ് വീണാലേ പ്രശ്നത്തിന് പരിഹാരമാവുകയുള്ളൂ; ജി.സുധാകരൻ