തിരുവനന്തപുരം: കേരള സര്‍ക്കാരിന്റെ അയ്യപ്പ സംഗമത്തിന് പുറമെ സംഘപരിവാര്‍ സംഘടനകളുടെ ശബരിമല സംരക്ഷണ സംഗമത്തിനും യോഗിയുടെ ആശംസ. ധര്‍മ്മാനുസരിയായ ജീവിതത്തിന് വഴികാട്ടുകയാണ് സനാതന ധര്‍മ്മമെന്നും ഭക്തരെ ദൈവീകതയിലേക്ക് ബന്ധിപ്പിക്കാന്‍ ശബരിമല സംരക്ഷണ സംഗമത്തിന് കഴിയട്ടെയെന്നും യുപി മുഖ്യമന്ത്രി യോഗി ആദിത്യനാഥ് ആശംസിച്ചു.

അയ്യപ്പ സംഗമത്തിന് ബദലായി നാളെ പന്തളത്ത് വെച്ചാണ് സംഘപരിവാര്‍ സംഘടനകളുടെ നേതൃത്വത്തില്‍ ശബരിമല സംരക്ഷണ സംഗമം നടക്കുന്നത്. ഐക്യവും സാമൂഹിക മൈത്രിയും ശക്തിപ്പെടുത്താന്‍ സനാതന മൂല്യങ്ങളും സംസ്‌കാരവും വ്യാപിപ്പിക്കണമെന്നും, ശബരിമല കര്‍മ്മസമിതിയുടെ പരിശ്രമം പ്രശംസനീയമാണെന്നും യോഗി ആശംസ പ്രസ്താവനയില്‍ കൂട്ടിച്ചേര്‍ത്തു.

ALSO READ: അയ്യപ്പ സംഗമം ലോകപ്രശസ്ത വിജയമെന്നും കാലിക്കസേരകള്‍ എ.ഐ നിര്‍മിതിയായിക്കൂടെ എന്നും എംവി ഗോവിന്ദന്‍ 

അയ്യപ്പസംഗമത്തിന് യോഗിയുടെ ആശംസ

കഴിഞ്ഞ ദിവസം പമ്പയില്‍ നടന്ന സര്‍ക്കാരിന്റെ ആഗോള അയ്യപ്പ സംഗമത്തിന് ആശംസ അറിയിച്ച് യോഗി ആദിത്യനാഥ് രംഗത്തെത്തിയിരുന്നു. യോഗിയുടെ സന്ദേശം ദേവസ്വം മന്ത്രി വി എന്‍ വാസവന്‍ ഉദ്ഘാടന വേദിയില്‍ വായിച്ചത് വലിയ വിമര്‍ശനങ്ങള്‍ക്ക് വഴിവെച്ചിരുന്നു. ശബരിമലയുടെ ലക്ഷ്യങ്ങള്‍ കൈവരിക്കുന്നതിന് ആഗോള അയ്യപ്പസംഗമത്തിന് സാധിക്കട്ടെയെന്നാണ് യോഗി പറഞ്ഞത്. ധര്‍മ്മത്തിന്റെ ദിവ്യരക്ഷകനാണ് യ്യപ്പനെന്നും, അദ്ദേഹത്തെ ആരാധിക്കുന്നത് ധര്‍മ്മത്തിന്റെ പാതയെ പ്രകാശിപ്പിക്കുകയും, സാത്വിക മൂല്യങ്ങള്‍ പ്രോത്സാഹിപ്പിക്കാനും സംരക്ഷിക്കാനും ഭകതരെ പ്രചോദിപ്പിക്കുന്നു. ഐക്യവും സൗഹാര്‍ദ്ദവും ശക്തിപ്പെടുത്താന്‍ പൗരാണിക ജ്ഞാനവും പാരമ്പര്യങ്ങളും പ്രചരിപ്പിക്കേണ്ടത് അത്യാവശ്യമാണ്. ഈ കാഴ്ച്ചപ്പാടില്‍ ആഗോള അയ്യപ്പസംഗമം വളരെ പ്രാധാന്യമര്‍ഹിക്കുന്നു, എന്നുമാണ് ആശംസ കുറിപ്പില്‍ യോഗി പറഞ്ഞത്. 

തൊട്ടുപിന്നാലെ സംസ്ഥാന സര്‍ക്കാരിനെതിരെ കോണ്‍ഗ്രസ് അടക്കമുള്ള പ്രതിപക്ഷ കക്ഷികള്‍ രംഗത്തെത്തി. അയ്യപ്പസംഗമം കൊണ്ടുണ്ടായ ഏകഗുണം ദേവ്‌സ്വം മന്ത്രിക്ക് യുപി മുഖ്യമന്ത്രിയുടെ ആശംസ വായിക്കാനായി എന്നത് മാത്രമാണെന്ന് എ.ഐ.സി.സി ജനറല്‍ സെക്രട്ടറി കെസി വേണുഗോപാല്‍ പരിഹസിച്ചു. 

Following the Ayyappa Sangamam, Yogi Adityanath extended his wishes for the Sabarimala Protection Sangamam as well.