ഇരിട്ടി: സംഘ് പരിവാര്‍ സംഘടനകളുടെ എതിര്‍പ്പിനെ തുടര്‍ന്ന് അവതരണം നൃത്തിവെച്ച ഫോക്‌ലോര്‍ അക്കാഡമിയുടെ  പടയണി കലാരൂപം ഇന്നലെ വൈകുന്നേരം അഞ്ചിന് ഇരിട്ടി കീഴൂര്‍ കുന്നില്‍ അവതരിപ്പിച്ചു. കഴിഞ്ഞ 29ന് എം.ജി കോളജില്‍ പടയണി അവതരിപ്പിക്കാന്‍ തീരുമാനിച്ചിരുന്നു. പരിപാടിയുടെ തലേദിവസം സംഘ പരിവാര്‍ സംഘടനകള്‍ ഭീഷണി ഉയര്‍ത്തിയതിതിനെ തുടര്‍ന്ന് പരിപാടി നിര്‍ത്തിവെക്കുകയായിരുന്നു. ഹൈന്ദവ കലാരൂപം അവതരിപ്പിക്കാന്‍ സമ്മതിക്കില്ലെന്നും കോളജിലേക്ക് മാര്‍ച്ച് നടത്തുമെന്നും ഭീഷണി മുഴക്കിയതോടെയാണ് പരിപാടി നിര്‍ത്തിവച്ചത്. സംഭവം വന്‍ പ്രതിഷേധത്തിന് ഇടയാക്കിയതിനെത്തുടര്‍ന്നാണ് ഫോക്‌ലോര്‍ അക്കാഡമി നേരിട്ടു തന്നെ കോളജ് സ്ഥിതി ചെയ്യുന്ന കീഴൂര്‍ കുന്നില്‍ പടയണി കലാരൂപം അവതരിപ്പിച്ചത്. നഗരസഭ ചെയര്‍മാന്‍ പി.പി അശോകന്‍ ഉദ്ഘാടനം ചെയ്തു. ഫോക്‌ലോര്‍ അക്കാഡമി അംഗം ഡോ.എ.കെ നമ്പ്യാര്‍, പി.വി ലാവലിന്‍, അഡ്വ.ബിനോയ് കുര്യന്‍, കെ ശ്രീധരന്‍, മുനിസിപ്പല്‍ കൗണ്‍സിലര്‍ പി.പി ഉസ്മാന്‍ പ്രസംഗിച്ചു.