ഭോപ്പാൽ: മാതാപിതാക്കൾ ക്രൂരമായി കാട്ടിൽ ഉപേക്ഷിച്ച നവജാത ശിശുവിന് അത്ഭുതകരമായ രക്ഷ. മൂന്ന് ദിവസം മാത്രം പ്രായമുള്ള ഈ കുഞ്ഞ് ഒരു രാത്രി മുഴുവൻ തണുപ്പിന്റെയും വന്യമൃഗങ്ങളുടെയും ഭീഷണിയെ അതിജീവിച്ചു. രക്തം പുരണ്ട നിലയിലും വിറയ്ക്കുന്ന ശരീരത്തിലും, ഉറുമ്പുകടിയുടെയും ഹൈപ്പോതെർമിയയുടെയും ലക്ഷണങ്ങളുമായി അതിജീവിച്ച  ഈ സംഭവം മധ്യപ്രദേശിലെ ചിന്ദ്‌വാര ജില്ലയിലെ നന്ദൻവാടി ഗ്രാമത്തിലാണ് സംഭവിച്ചത്.

കുഞ്ഞിന്റെ പിതാവ് ബബ്ലു ദണ്ഡോലിയ സർക്കാർ സ്കൂളിലെ അധ്യാപകനാണ്. അമ്മ രാജ്കുമാരി ദണ്ഡോലിയയാണ്. നാലാമത്തെ കുഞ്ഞായതിനാൽ മധ്യപ്രദേശിലെ സർക്കാർ ജോലികളിൽ കുടുംബത്തിലെ മക്കളുടെ എണ്ണം നാലിന് മുകളിലായാൽ ജോലി നഷ്ടപ്പെടാനുള്ള സാധ്യതയുണ്ടെന്ന ഭയത്തിലാണ് ദമ്പതികൾ ഗർഭധാരണം രഹസ്യമാക്കി വച്ചത്. ഇതിനകം മൂന്ന് മക്കളുള്ള അവർക്ക് ഈ നാലാമത്തെ കുഞ്ഞ് ജോലി നഷ്ടപ്പെടുത്തുമെന്ന് കരുതിയിരുന്നു.

പ്രസവത്തിന് മണിക്കൂറുകൾക്കുള്ളിൽ ക്രൂരത

സെപ്റ്റംബർ 23-ന് അതിരാവിലെ രാജ്കുമാരി വീട്ടിൽ തന്നെ പ്രസവിച്ചു. പ്രസവത്തിന് തൊട്ടു പിന്നാലെ, മണിക്കൂറുകൾക്കുള്ളിൽ കുഞ്ഞിനെ അടുത്തുള്ള കാട്ടിൽ ഉപേക്ഷിക്കുകയായിരുന്നു. പൊലിസ് അന്വേഷണത്തിൽ ഇത് വ്യക്തമായി. അടുത്ത ദിവസം രാവിലെ പ്രഭാത സവാരിക്കിടെ ഗ്രാമവാസികൾ കുഞ്ഞിന്റെ കരച്ചിൽ കേട്ടു. ആദ്യം ഏതെങ്കിലും മൃഗത്തിന്റെ ശബ്ദമാണെന്ന് കരുതി അവർ അവഗണിച്ചെങ്കിലും, അടുത്തേക്ക് ചെന്നപ്പോൾ കല്ലിനടിയിൽ കൈകൾ പിടയുന്ന ചോരകുഞ്ഞിനെ കണ്ടെത്തി.

"ഒരു രക്ഷിതാവും ഇങ്ങനെ ചെയ്യരുത്," ഗ്രാമവാസികൾ പ്രതികരിച്ചു. ഉടൻ തന്നെ കുഞ്ഞിനെ അടുത്തുള്ള ചിന്ദ്‌വാര ജില്ലാ ആശുപത്രിയിലേക്ക് കൊണ്ടുപോയി. പരിശോധനയിൽ കുഞ്ഞിന് ഉറുമ്പുകടിയുടെ പാടുകളും തണുപ്പ് കാരണം ഹൈപ്പോതെർമിയയുടെ ലക്ഷണങ്ങളും ഉണ്ടായിരുന്നു. "ഇത്രയും പ്രതികൂല സാഹചര്യങ്ങൾക്കിടയിലും കുഞ്ഞ് ജീവിച്ചത് ഒരു അത്ഭുതം മാത്രമാണ്," ആശുപത്രിയിലെ ശിശുരോഗ വിദഗ്ധർ പറഞ്ഞു. നിലവിൽ കുഞ്ഞ് അപകടസ്ഥിതി മറികടന്ന് സുഖം പ്രാപിക്കുന്നുണ്ട്.

കുട്ടിയെ ഉപേക്ഷിച്ചതിന് ഭാരതീയ ന്യായ സംഹിത (ബിഎൻഎസ്) സെക്ഷൻ 93 പ്രകാരം ദമ്പതികൾക്കെതിരെ പൊലിസ് കേസ് രജിസ്റ്റർ ചെയ്തു. നിയമോപദേശം ലഭിച്ച ശേഷം ബിഎൻഎസ് 109 (കൊലപാതക ശ്രമം) ഉൾപ്പെടെ കൂടുതൽ വകുപ്പുകൾ ചുമത്തുമെന്ന് പൊലിസ് അറിയിച്ചു. ദമ്പതികളെ അറസ്റ്റ് ചെയ്ത് ചോദ്യം ചെയ്യുന്നുണ്ട്.

നാഷണൽ ക്രൈം റെക്കോർഡ്സ് ബ്യൂറോ (എൻസിആർബി)യുടെ കണക്കുകൾ പ്രകാരം, ഇന്ത്യയിൽ ഏറ്റവും കൂടുതൽ നവജാതശിശുക്കളെ ഉപേക്ഷിക്കുന്നത് മധ്യപ്രദേശിലാണ്. സാമ്പത്തിക ബുദ്ധിമുട്ടുകളും സാമൂഹിക സമ്മർദ്ദങ്ങളും ഇത്തരം ക്രൂരതകൾക്ക് കാരണമാകുന്നുണ്ട്. ഈ സംഭവം സംസ്ഥാനത്തെ കുടുംബനിയമങ്ങളുടെയും സാമൂഹിക സംരക്ഷണത്തിന്റെയും പോരായ്മകൾ വീണ്ടും ചൂണ്ടിക്കാട്ടുന്നു.