റിയാദ്: ഉംറ കര്‍മം നിര്‍വഹിച്ച ശേഷം മടങ്ങുന്നതിനിടെ ഹൃദയാഘാതം സംഭവിച്ച് ചികിത്സയിലായിരുന്ന പെരുമ്പാവൂര്‍ സ്വദേശി പള്ളിക്കവല മൗലൂദ് പുര സ്വദേശി ബീരാസ് ഈരേത്ത് അലിയാര്‍ മരിച്ചു. കഴിഞ്ഞ സെപ്റ്റംബര്‍ 15-ന് ഉംറ കര്‍മം നിര്‍വഹിച്ച് ജിദ്ദയില്‍ നിന്ന് കൊച്ചിയിലേക്കുള്ള മടക്കയാത്രക്കിടെ ഇദ്ദേഹത്തിന് നെഞ്ചുവേദന അനുഭവപ്പെട്ടിരുന്നു. ഇതിനെ തുടര്‍ന്ന് ആകാശ എയര്‍ലൈന്‍സ് റിയാദ് വിമാനത്താവളത്തില്‍ അടിയന്തരമായി ഇറക്കിയിരുന്നു.

ALSO READ: പാലക്കാട്‌ സ്വദേശി സൗദിയിൽ ഹൃദയാഘാതംമൂലം മരിച്ചു| Gulf Death 

വിമാനത്തിലെ പൈലറ്റ് മുന്‍കൂട്ടി അറിയിച്ചതിനെ തുടര്‍ന്ന് എയര്‍പോര്‍ട്ടിലെ ജീവന്‍രക്ഷാ ആരോഗ്യ പ്രവര്‍ത്തകര്‍ അദ്ദേഹത്തെ അടിയന്തരമായി കിംഗ് ഫഹദ് മെഡിക്കല്‍ സിറ്റിയിലെ അത്യാഹിത വിഭാഗത്തില്‍ പ്രവേശിപ്പിച്ചിരുന്നു. ചികിത്സക്കിടെ അദ്ദേഹത്തിന്റെ ആരോഗ്യനില വഷളാവുകയും മരണം സംഭവിക്കുകയുമായിരുന്നു. സ്വകാര്യ ഗ്രൂപ്പിനോടൊപ്പമാണ് അദ്ദേഹം ഉംറ കര്‍മം നിര്‍വഹിക്കാന്‍ എത്തിയത്. അദ്ദേഹത്തിന്റെ ഒപ്പം ഉണ്ടായിരുന്നവര്‍ വിസ കാലാവധി കഴിഞ്ഞതിനെ തുടര്‍ന്ന് നാട്ടിലേക്ക് തിരികെ മടങ്ങിയിരുന്നു.

അലിയാര്‍ വീരവുവും സുലൈഖയുമാണ് മാതാപിതാക്കള്‍. ഭാര്യ ആരിഫ. മക്കള്‍: സൂഫിയ, മുഹമ്മദ് യാസീന്‍, മുഹമ്മദ് ഹദ്ദാദ്, ഇസ്മത് ചിസ്തി, ഗരീബ് നവാസ്. കിംഗ് ഫഹദ് മെഡിക്കല്‍ സിറ്റി ആശുപത്രിയില്‍ സൂക്ഷിച്ചിരിക്കുന്ന അദ്ദേഹത്തിന്റെ മൃതദേഹം റിയാദില്‍ ഖബറടക്കും.