തിരുവനന്തപുരം: കാന്‍സര്‍ രോഗികള്‍ക്ക് കേരളത്തിലെവിടെയും ചികിത്സാ ആവശ്യങ്ങള്‍ക്കായി സൂപ്പര്‍ഫാസ്റ്റിലുള്‍പ്പടെ സൗജന്യ യാത്രയെന്ന പ്രഖ്യാപനവുമായി മന്ത്രി കെ.ബി ഗണേഷ് കുമാര്‍. റേഡിയേഷന്‍, കീമോ തുടങ്ങിയ എന്ത് ആവശ്യത്തിനും പദ്ധതി ഉപയോഗപ്പെടുത്താം. സ്വകാര്യ ആശുപത്രികളിലുള്ള രോഗികള്‍ക്കും പദ്ധതി സഹായകരണമാണെന്ന് മന്ത്രി പറഞ്ഞു. സൂപ്പര്‍ ഫാസ്റ്റ് മുതല്‍ താഴോട്ടുള്ള എല്ലാ ബസുകളിലും ഈ സൗകര്യം ലഭിക്കുമെന്നും മന്ത്രി നിയമസഭയില്‍ അറിയിച്ചു. 

ചികിത്സിക്കുന്ന ഡോക്ടര്‍ സര്‍ട്ടിഫൈ ചെയ്താല്‍ ഇതിനുള്ള പാസ് അനുവദിക്കും. നേരത്തെ ഫാസ്റ്റ് പാസഞ്ചര്‍ ബസുകളില്‍ ഈ സൗകര്യം ലഭിച്ചിരുന്നു. 

ALSO READ: വീട്ടമ്മയുടെ മരണത്തില്‍ ദുരൂഹത: ജോലി കഴിഞ്ഞെത്തിയ മകന്‍ കണ്ടത് വീടിനു പിന്നില്‍ മരിച്ചുകിടക്കുന്ന അമ്മയെ

''2012ല്‍ സിറ്റി ബസ്, ഓര്‍ഡിനറി ബസുകള്‍ക്ക് 50 ശതമാനമെന്ന ഓര്‍ഡര്‍ ഇറക്കിയതിനാല്‍ ഈ പ്രഖ്യാപനത്തിന്റെ ക്രെഡിറ്റ് ഏറ്റെടുക്കാന്‍ യുഡിഎഫ് വരരുത്. ഇത് സംസ്ഥാനത്തിന് ബാധകമായ പ്രഖ്യാപനമാണ്. ഓര്‍ഡിനറി മാത്രമല്ല, സൂപ്പര്‍ഫാസ്റ്റ് മുതല്‍ താഴേക്ക് ഏത് ബസിലും സമ്പൂര്‍ണ സൗജന്യമാണ് ഇതിന്റെ പ്രത്യേകത എന്ന് മനസിലാക്കണം''- മന്ത്രി കൂട്ടിച്ചേര്‍ത്തു.

സഭയില്‍ പ്രഖ്യാപനത്തിനിടെ ബഹളമുണ്ടാക്കിയ പ്രതിപക്ഷത്തെ മന്ത്രി രൂക്ഷമായി വിമര്‍ശിച്ചു. പ്രതിപക്ഷത്തിന് ഇത് വലിയ കാര്യമായിരിക്കില്ലെന്നും പ്രഖ്യാപനം നടത്തിയപ്പോള്‍ പ്രതിപക്ഷം പറയുന്നത് ഷെയിം ഷെയിം എന്നാണ്. പ്രതിപക്ഷത്തിന് ഇത് ഷെയിം ആയിരിക്കും. എന്നാല്‍ രോഗികളെ സംബന്ധിച്ചടുത്തോളം ഇത് വലിയ കാര്യമാണെന്നും മന്ത്രി കൂട്ടിച്ചേര്‍ത്തു.

English Summary: Kerala Transport Minister K.B. Ganesh Kumar has announced that cancer patients can now travel free of cost on all KSRTC buses, including Super Fast services, for treatment purposes across the state. This initiative aims to support patients undergoing chemotherapy, radiation, or any related medical treatment, even if they are treated at private hospitals.