താമരശ്ശേരി: അമ്പായത്തോടിലെ ഫ്രഷ് കട്ട് അറവ് മാലിന്യ സംസ്കരണ കേന്ദ്രത്തിനെതിരായ നീണ്ടുനിന്ന പ്രതിഷേധത്തിന്റെ പശ്ചാത്തലത്തിൽ ഉണ്ടായ അക്രമ സംഭവത്തിൽ ഇടപെട്ട് സംസ്ഥാന മനുഷ്യാവകാശ കമ്മിഷൻ. പ്രദേശത്ത് നടന്ന സംഘർഷങ്ങളുടെയും പൊലിസ് നടപടികളിലൂടെയും ഫലമായി വിദ്യാർഥികൾക്ക് സ്കൂളിലെത്താൻ കഴിയാത്ത സാഹചര്യത്തെക്കുറിച്ച്  കമ്മിഷന്റെ ജുഡീഷ്യൽ അംഗം കെ. ബൈജു നാഥ് കോഴിക്കോട് ജില്ലാ കളക്ടറോട് റിപ്പോർട്ട് സമർപ്പിക്കാൻ നിർദേശിച്ചു.

ALSO READ: പി.എം ശ്രീയിൽ പ്രതിഷേധം: സംസ്ഥാനത്ത് നാളെ വിദ്യാഭ്യാസ ബന്ദ്

കഴിഞ്ഞ 21-ന് ഫ്രഷ് കട്ട് പ്ലാന്റിനെതിരെ നാട്ടുകാർ നടത്തിയ പ്രതിഷേധ മാർച്ചിനിടെ പൊലിസുമായുണ്ടായ സംഘർഷമാണ് സംഭവത്തിന് തുടക്കമിട്ടത്. പ്രതിഷേധക്കാർക്കെതിരെ പൊലിസ് കണ്ണീർവാതകം പ്രയോഗിച്ചതിനെത്തുടർന്ന് പ്ലാന്റിന് തീയിട്ടത് സംഘർഷത്തെ കൂടുതൽ വഷളാക്കി. സിസിടിവി ദൃശ്യങ്ങൾ ആധാരമാക്കി പൊലിസ് 74 പേരെ തിരിച്ചറിഞ്ഞിട്ടുണ്ടെങ്കിലും, തെളിവുകളുടെ അഭാവത്തിൽ അറസ്റ്റ് വൈകിപ്പിച്ചു. ഇതുവരെ പത്തോളം പേരെ പൊലിസ് അറസ്റ്റ് ചെയ്തു, ഒളിവിലുള്ളവരെ കണ്ടെത്താൻ പ്രദേശത്ത് രാത്രിയും റെയ്ഡുകൾ ശക്തമാക്കിയിരിക്കുകയാണ്.

ALSO READ: യാത്രക്കാരുടെ ശ്രദ്ധയ്ക്ക്: തിരുവനന്തപുരം വിമാനത്താവളത്തിൽ വിമാന സർവീസുകൾക്ക് താൽക്കാലിക നിയന്ത്രണം

സംഘർഷത്തിന് പിന്നാലെ പ്രദേശത്തെ സ്കൂളുകളിലെ വിദ്യാർഥി ഹാജർ നിലയിൽ ഗണ്യമായ ഇടിവുണ്ടായി. 60-ഓളം വിദ്യാർഥികളുള്ള ഇരൂട് സെന്റ് ജോസഫ് എൽ.പി. സ്കൂളിൽ ചുരുക്കം പേർ മാത്രമാണ് സംഭവത്തിന് ശേഷം എത്തുന്നത്. രാത്രികളിലും വീടുകൾ കയറി പൊലിസ് പരിശോധിക്കുന്നതും, വീടിന് മുന്നിൽ തമ്പടിക്കുന്നതും കുട്ടികളെ ഭീതിയിലാഴ്ത്തിയെന്ന് രക്ഷിതാക്കൾ പരാതിപ്പെടുന്നുണ്ട്. 

"കുട്ടികൾ വല്ലാത്ത പരിഭ്രമത്തിലാണ്, സ്കൂളിലേക്ക് പോകാൻ തയ്യാറാകുന്നില്ല" – അധ്യാപകരും രക്ഷിതാക്കളും പറയുന്നു. കൗൺസിലിംഗ് ആവശ്യമാണെന്നും അവർ ആവശ്യപ്പെടുന്നു.

പൊലിസിന്റെ 'അതിക്രമകരമായ' നടപടികൾക്കെതിരെ നാട്ടുകാർ വ്യാപക പ്രതിഷേധത്തിലാണ്. റൂറൽ എസ്.പി.യുടെ നിർദേശങ്ങൾ അവഗണിച്ചുള്ള റെയ്ഡുകൾ സമാധാനാന്തരീക്ഷം തകർക്കുന്നുവെന്ന ആരോപണമാണ് ഉയരുന്നത്. ഇതിനെത്തുടർന്ന് പൊലിസിനെതിരെ പട്ടിണി സമരം സംഘടിപ്പിക്കാനാണ് പ്രദേശവാസികളുടെ തീരുമാനം. ജില്ലാ കളക്ടർ വിളിച്ച സർവകക്ഷി യോഗം നാളെ (ഒക്ടോബർ 29) നടക്കും.

ഈ സമരത്തിൽ വർഷങ്ങളായി തുടരുന്ന പ്ലാന്റിന്റെ മലിനീകരണപ്രശ്നങ്ങളും ആരോഗ്യബാധകളെ കുറിച്ചുമാണ് നാട്ടുകാരുടെ പ്രധാന ആശങ്ക. സംഘർഷത്തിന് ശേഷം പുറത്തുവന്ന കൂടുതൽ സിസിടിവി ദൃശ്യങ്ങളിൽ അക്രമികൾ മുഖംമറച്ച് എത്തിയെന്നും, തൊഴിലാളികളെ ഭീതിപ്പെടുത്തിയെന്നും വെളിപ്പെടുത്തുന്നു. സംഭവത്തിൽ പൊലിസ് നിഷ്പക്ഷമായി അന്വേഷിക്കണമെന്ന ആവശ്യവും ശക്തമാണ്.

മനുഷ്യാവകാശ കമ്മിഷന്റെ ഇടപെടലോടെ പ്രദേശത്ത് സമാധാനപ്രക്രിയയ്ക്ക് ആശ്വാസമാകുമെന്നാണ് പ്രതീക്ഷിക്കുന്നത്. റിപ്പോർട്ടിന്റെ അടിസ്ഥാനത്തിൽ കൂടുതൽ നടപടികൾ സ്വീകരിക്കുമെന്ന് കമ്മിഷൻ സൂചിപ്പിച്ചു.  

താമരശ്ശേരി താലൂക്കിലെ അമ്പായത്തോട് പ്രദേശത്ത്, തിരുവമ്പാടി പഞ്ചായത്തിന്റെ അതിർത്തിയിൽ സ്ഥിതി ചെയ്യുന്ന ഫ്രഷ് കട്ട് ഓർഗാനിക് ഫുഡ്സ് പ്രൈവറ്റ് ലിമിറ്റഡിന്റെ മാംസ സംസ്കരണ പ്ലാന്റാണ് സംഘർഷത്തിന്റെ കേന്ദ്രം. പ്ലാന്റിൽ നിന്ന് പുറന്തള്ളുന്ന രക്തവും മാംസാവശിഷ്ടങ്ങളും നേരിട്ട് കക്കയം അണക്കെട്ടിലേക്ക് ഒഴുക്കിവിടുന്നതാണ് 2018 മുതൽ തന്നെ പ്രദേശവാസികൾ ഉയർത്തിയ പരാതികൾക്ക് അടിസ്ഥാനമായത്. 

കോഴിക്കോട് നഗരത്തിന്റെ പ്രധാന കുടിവെള്ള സ്രോതസ്സായ ഈ അണക്കെട്ടിലെ ജലം മലിനമാകുന്നത് മൂലം ദുർഗന്ധം, ഛർദ്ദി, ചർമ്മരോഗങ്ങൾ, ശ്വാസകോശ പ്രശ്നങ്ങൾ തുടങ്ങിയ ആരോഗ്യ പ്രതിസന്ധികൾ നാട്ടുകാർ നേരിടുകയുണ്ടായി.

പഞ്ചായത്ത്, പൊല്യൂഷൻ കൺട്രോൾ ബോർഡ്, ജില്ലാ കളക്ടർ, മുഖ്യമന്ത്രി ഓഫീസ് എന്നിവിടങ്ങളിലെല്ലാം ആവർത്തിച്ച് പരാതി നൽകിയെങ്കിലും സ്ഥിരമായ പരിഹാരമുണ്ടായില്ല. 2023-ൽ പൊല്യൂഷൻ കൺട്രോൾ ബോർഡ് പ്ലാന്റിന് ക്ലോഷർ നോട്ടീസ് നൽകിയെങ്കിലും നിയമനടപടികൾ മൂലം പ്രവർത്തനം തുടർന്നു. ഇതോടെയാണ് നാട്ടുകാർ റോഡ് ഉപരോധം, ധർണ, മനുഷ്യചങ്ങല തുടങ്ങിയ സമരങ്ങൾ ശക്തമാക്കിയത്.

കഴിഞ്ഞ ഒക്ടോബർ 21-ന് നടന്ന പ്രതിഷേധ മാർച്ചാണ് സംഘർഷത്തിലേക്ക് നയിച്ചത്. പ്രശ്നത്തിന്റെ കാരണം പരിഹരിക്കാതെ പൊലിസ് നടപടി മാത്രം ശക്തമാക്കുന്നത് പ്രദേശത്തെ സമാധാനം തകർക്കുന്നുവെന്നാണ് നാട്ടുകാരുടെ ആരോപണം.

following the recent clash at the fresh cut plant in thamarassery, many local students are reportedly staying away from school, and their parents are in hiding due to fear of police action. the human rights commission has stepped in and sought a report on the situation