അബൂദബി: ഉപയോഗിക്കാത്തതും കാലാവധി കഴിഞ്ഞതുമായ മരുന്നുകൾ വീടുകളിൽ സൂക്ഷിക്കുന്നതിനെതിരെ മുന്നറിയിപ്പുമായി അബൂദബി ആരോഗ്യവകുപ്പ് (DoH). ഇത് ഗുരുതരമായ ആരോഗ്യ-സുരക്ഷാ പ്രശ്നങ്ങൾ ഉണ്ടാക്കുമെന്ന് 'അൽ ഖലീജ്' പത്രം റിപ്പോർട്ട് ചെയ്തു.

ആരോഗ്യവകുപ്പ് ചൂണ്ടിക്കാട്ടുന്ന അപകടസാധ്യതകൾ

ഫലപ്രാപ്തി കുറയും: കാലാവധി കഴിഞ്ഞതോ കൂടുതൽ കാലം സൂക്ഷിച്ചതോ ആയ മരുന്നുകളുടെ ഫലപ്രാപ്തി കുറയുകയും ഉപയോഗിക്കാൻ സുരക്ഷിതമല്ലാതാവുകയും ചെയ്യും.

അപകടസാധ്യത: കാലാവധി കഴിഞ്ഞ മരുന്നുകൾ വീട്ടിൽ സൂക്ഷിക്കുന്നത് കുട്ടികളോ മുതിർന്നവരോ അബദ്ധത്തിൽ കഴിക്കാനോ ദുരുപയോഗം ചെയ്യാനോ ഉള്ള സാധ്യത വർധിപ്പിക്കുന്നു.

പൊതുജനാരോഗ്യ പ്രശ്നം: ഉപയോഗിക്കാത്ത മരുന്നുകൾ കൂടുന്നത് വിഷബാധ, ഓവർഡോസ് കേസുകൾ, മരുന്നുകളുടെ തെറ്റായ ഉപയോഗം എന്നിവയ്ക്ക് കാരണമാകും.

ALSO READ: സൗദി: സ്‌കൂളുകളില്‍ ശൈത്യകാല ഷെഡ്യൂള്‍ തുടങ്ങി; പ്രവൃത്തി സമയത്തില്‍ മാറ്റം | Saudi School Schedule

സംസ്കരണം

മരുന്നുകൾ ശരിയായ രീതിയിൽ സംസ്കരിക്കേണ്ടതിന്റെ പ്രാധാന്യം DoH വ്യക്തമാക്കി. സാമൂഹിക സുരക്ഷയും പരിസ്ഥിതി സംരക്ഷണവും ഉറപ്പാക്കാൻ പൊതുജനങ്ങളെ ഇതേക്കുറിച്ച് ബോധവൽക്കരിക്കേണ്ടത് അത്യാവശ്യമാണ്.

തെറ്റായ സംസ്കരണം അപകടകരം: മരുന്നുകൾ സിങ്കിലോ ടോയ്‌ലറ്റിലോ ഒഴുക്കിക്കളയുന്നത് പോലുള്ള അനുചിതമായ മാലിന്യ സംസ്കരണ രീതികൾ അപകടകരമാണെന്നും മന്ത്രാലയം വ്യക്തമാക്കി. 

പരിസ്ഥിതിക്ക് ദോഷകരം: മരുന്നുകളിലെ രാസവസ്തുക്കൾ അരിച്ചുമാറ്റാൻ മലിനജല സംവിധാനങ്ങൾക്ക് കഴിയില്ല. ഇത് ഭൂഗർഭജലത്തിലേക്ക് കലരുകയും പൊതുജനാരോഗ്യത്തിനും പരിസ്ഥിതിക്കും ദോഷകരമാകുകയും ചെയ്യും.

മരുന്നുകൾ എങ്ങനെ സംസ്കരിക്കണം?

സുരക്ഷിതമായ മരുന്ന് സംസ്കരണം ഒരു സാമൂഹിക ഉത്തരവാദിത്തമാണെന്ന് DoH വ്യക്തമാക്കി. 

ചില ആശുപത്രികൾ ഉപയോഗിക്കാത്ത മരുന്നുകൾ തിരികെ സ്വീകരിച്ച് ശരിയായ രീതിയിൽ സംസ്കരിക്കുന്ന പരിപാടികൾ നടത്തുന്നുണ്ട്.

അതേസമയം, ഇത്തരം സൗകര്യങ്ങൾ ലഭ്യമല്ലെങ്കിൽ, വിഷബാധയോ മലിനീകരണമോ കുറയ്ക്കാൻ താമസക്കാർക്ക് താഴെ പറയുന്ന സുരക്ഷാ നിർദ്ദേശങ്ങൾ പാലിക്കാം:

• മരുന്നിന്റെ യഥാർത്ഥ പായ്ക്കറ്റിൽ നിന്ന് പുറത്തെടുക്കുക.
• ഉപയോഗിച്ച കാപ്പിപ്പൊടി പോലുള്ള, ആളുകൾക്ക് ആവശ്യമില്ലാത്ത വസ്തുക്കളുമായി കലർത്തുക. അതിനുശേഷം ഒരു പ്ലാസ്റ്റിക് ബാഗിലോ കണ്ടെയ്‌നറിലോ ആക്കി നന്നായി അടച്ച് ഉപേക്ഷിക്കുക.
• ദ്രാവക രൂപത്തിലുള്ള മരുന്നുകൾ (liquid medicines) പേപ്പർ ടവലുകൾ ഉപയോഗിച്ച് ഒപ്പിയെടുത്ത ശേഷം കളയുക.

മരുന്ന് പാഴാകുന്നത് കുറയ്ക്കാൻ

• ആവശ്യത്തിന് മാത്രം മരുന്നുകൾ വാങ്ങുക. 
• കാലാവധി കഴിഞ്ഞ മരുന്നുകൾ ഉപയോഗിക്കാതിരിക്കുക.
• ഉപയോഗിക്കാൻ ഉദ്ദേശമില്ലാത്ത സൗജന്യ സാമ്പിളുകൾ ഒഴിവാക്കുക.
• അമിതമായി സ്റ്റോക്ക് ചെയ്യുന്നത് ഒഴിവാക്കാൻ വീട്ടിലെ മരുന്ന് കാബിനറ്റുകൾ പതിവായി പരിശോധിക്കുക.

The Department of Health (DoH) in Abu Dhabi has warned residents against storing unused or expired medications at home, citing serious health and safety risks. Expired medicines can lose effectiveness and become unsafe for use, posing a risk of accidental ingestion or misuse, especially among children and adults.