അർജന്റൈൻ ഇതിഹാസം ലയണൽ മെസി തന്റെ പഴയ ക്ലബായ ബാഴ്സലോണയിലേക്ക് വീണ്ടും തിരിച്ചെത്തിയിരിക്കുകയാണ്. ബാഴ്സയുടെ പുതിയ ഹോം ഗ്രൗണ്ടായ സ്പോട്ടിഫൈ ക്യാമ്പ് നൗ സന്ദർശിക്കാനാണ് മെസി തിരികെയെത്തിയത്. ബാഴ്സയിൽ തിരിച്ചെത്തിയതിന്റെ സന്തോഷം മെസി പങ്കുവെക്കുകയും ചെയ്തു. ഒരു ഫുട്ബോൾ താരമായി ബാഴ്‌സയിലേക്ക് ഒരു ദിവസം തിരിച്ചുവരാൻ സാധിക്കുമെന്ന പ്രതീക്ഷയാണ് മെസി തന്റെ സോഷ്യൽ മീഡിയ അക്കൗണ്ടിലൂടെ പങ്കുവെച്ചത്. 

''ഇന്നലെ രാത്രി എന്റെ ആത്മാവിനെ മിസ് ചെയ്യുന്ന ഒരു സ്ഥലത്തേക്ക് മടങ്ങിയെത്തി. ഞാൻ വളരെയധികം സന്തോഷിച്ച സ്ഥലമാണിത്. ലോകത്തിൽ ഏറ്റവും സന്തോഷവാനായി ഞാൻ അനുഭവപ്പെട്ട സ്ഥലം. ഒരു താരമെന്ന നിലയിൽ വിടവാങ്ങാൻ മാത്രമല്ല. ഒരു ദിവസം ഇങ്ങോട്ട് തിരിച്ചുവരാൻ കഴിയുമെന്ന് ഞാൻ പ്രതീക്ഷിക്കുന്നു'' മെസി സോഷ്യൽ മീഡിയയിൽ കുറിച്ചു. 

2021ലാണ് മെസി ബാഴ്സലോണക്കൊപ്പമുള്ള തന്റെ ഐതിഹാസികമായ കരിയർ അവസാനിപ്പിച്ചുകൊണ്ട് പിഎസ്ജിയിലേക്ക് കൂടുമാറിയത്. സാമ്പത്തിക പ്രശ്നങ്ങൾ കാരണം കരാർ പുതുക്കാൻ കഴിയാത്തതിന് പിന്നാലെയാണ് മെസി ബാഴ്സ വിടാൻ നിർബന്ധിതനായത്. ബാഴ്സലോണക്കായി 778 മത്സരങ്ങളിൽ നിന്നും 672 ഗോളുകളും 303 അസിസ്റ്റുകളും ആണ് മെസി നേടിയിട്ടുള്ളത്.

പിഎസ്ജിയിൽ രണ്ട് സീസണിൽ ബൂട്ട് കെട്ടിയ മെസി 2023ൽ ഇന്റർ മയാമിയിലേക്കും ചേക്കേറി. മെസിയുടെ വരവിനു പിന്നാലെ മേജർ ലീഗ് സോക്കറിന് കൃത്യമായ ഒരു മേൽവിലാസം ഉണ്ടാക്കിയെടുക്കാൻ സാധിച്ചിരുന്നു. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു മയാമി നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. 

നാഷ്വില്ലക്കെതിരെയുള്ള കഴിഞ്ഞ മത്സരത്തിൽ മെസി മിന്നും പ്രകടനമാണ് പുറത്തെടുത്തത്. മത്സരത്തിൽ ഇരട്ട ഗോളും അസിസ്റ്റ് നേടിയുമാണ് മെസി തിളങ്ങിയത്. നിലവിൽ സജീവമായി ഫുട്ബോൾ കളിക്കുന്ന താരങ്ങളിൽ 400 അസിസ്റ്റുകൾ സ്വന്തമാക്കുന്ന ആദ്യ താരമായി മാറാനും മെസിക്ക് സാധിച്ചു. 404 സ്വന്തമാക്കിയ ഫെറങ്ക് പുസ്കാസ് ആണ് മെസിക്ക് മുമ്പിലുള്ളത്.

ബാഴ്‌സലോണയ്ക്ക് വേണ്ടിയാണ് മെസി ഏറ്റവും കൂടുതൽ അസിസ്റ്റുകൾ സ്വന്തമാക്കിയിട്ടുള്ളത്. 269 അസിസ്റ്റുകളാണ് മെസി സ്പാനിഷ് ടീമിന് വേണ്ടി നേടിയത്. അർജന്റീന ദേശീയ ടീമിനായി 60 തവണയാണ് മെസി സഹതാരങ്ങൾകൊണ്ട് ഗോൾ അടിപ്പിച്ചത്. പിഎസ്ജിക്കായി 34 അസിസ്റ്റുകളും മെസി സ്വന്തമാക്കി. ഇപ്പോൾ ഇന്റർ മയാമിക്കൊപ്പം 39 അസിസ്റ്റുകളും മെസി കൈപ്പിടിയിലാക്കി. 

Argentine legend Lionel Messi has returned to his old club Barcelona. Messi returned to visit Barca's new home ground, the Spotify Camp Nou. Messi also shared his joy at being back at Barca.