പട്‌ന: ബിഹാര്‍ നിയമസഭാ തെരഞ്ഞെടുപ്പിലെ എന്‍.ഡി.എയുടെ വിജയം സംസ്ഥാനത്തെ മുസ്ലിം എം.എല്‍.എമാരുടെ പങ്കാളിത്തത്തില്‍ വന്‍ ഇടിവിന് കാരണമായി. കഴിഞ്ഞ (2020) നിയമസഭാ തെരഞ്ഞെടുപ്പില്‍ സംസ്ഥാനത്ത് ആകെയുള്ള 243 നിയമസഭാ സീറ്റുകളിലേക്ക് 19 മുസ്ലിം എം.എല്‍.എമാര്‍ തെരഞ്ഞെടുക്കപ്പെട്ടിരുന്നു. എന്നാല്‍ ഇത്തവണ ആകെ 11 മുസ്ലിം സ്ഥാനാര്‍ഥികളാണ് തെരഞ്ഞെടുപ്പില്‍ വിജയിച്ചത്. 2020 ലെ നിയമസഭാ പ്രാതിനിധ്യത്തെക്കാള്‍ 42% കുറവാണ്. 2000ന് ശേഷം ഇതാദ്യമായാണ് സംസ്ഥാന നിയമസഭയില്‍ മുസ്ലിം പ്രാതിനിധ്യം ഇത്രയും കുറഞ്ഞത്. 

ബിഹാറിലെ 2022ലെ ജാതി സെന്‍സസ് പ്രകാരം സംസ്ഥാന ജനസംഖ്യയുടെ 17.7 ശതമാനം മുസ്ലിംകളാണ്. ഇതാകട്ടെ അന്നത്തെ ജനസംഖ്യാ കണക്ക് പരിഗണിക്കുകയാണെങ്കില്‍ 10 ശതമാനത്തിലും താഴെയാണ്. ആകെയുള്ള പത്ത് മുസ്ലിം എം.എല്‍.എമാരില്‍ അഞ്ചും മജ്‌ലിസെ ഇത്തിഹാദുല്‍ മുസ്ലിമീന്‍ (എ.ഐ.എം.ഐ.എം) അംഗങ്ങളായി വിജയിച്ചവരാണ്. രാഷ്ട്രീയ ജനതാദള്‍ (ആര്‍.ജെ.ഡി) ടിക്കറ്റില്‍ മത്സരിച്ച മൂന്നും കോണ്‍ഗ്രസ്സിന്റെ രണ്ടും സ്ഥാനാര്‍ഥികളും വിജയിച്ചു. ഭരണകക്ഷിയായ ജെ.ഡി.യുവില്‍നിന്ന് ഒരു മുസ്ലിമും വിജയിച്ചു. മുന്‍ തെരഞ്ഞെടുപ്പുകളെ അപേക്ഷിച്ച് ഇത്തവണ മത്സരിച്ച മുസ്ലിം സ്ഥാനാര്‍ഥികളുടെ എണ്ണത്തിലും കുറവുണ്ടായിരുന്നു. ആകെ മത്സരിച്ചവരില്‍ 11.8 ശതമാനം മാത്രമാണ് മുസ്ലിംകള്‍. ഇതില്‍ സ്വതന്ത്രരെ ഒഴിവാക്കിയാല്‍ 7.6 ശതമാനം പേര്‍ മാത്രമാണ് രാഷ്ട്രീയ പാര്‍ട്ടികളുടെ സ്ഥാനാര്‍ഥികളായി മത്സരിച്ചത്.