കാസര്‍കോട്: കാസര്‍കോട് ബസില്‍ വെച്ച് വിദ്യാര്‍ഥിനിക്കുനേരെ അതിക്രമം. കര്‍ണാടക ആര്‍.ടി.സി ബസില്‍ സഞ്ചരിക്കുകയായിരുന്ന വിദ്യാര്‍ഥിനിക്കുനേരെയാണ് അതിക്രമം ഉണ്ടായത്. 

ബസിലെ കണ്ടക്ടര്‍ മോശമായി പെരുമാറിയെന്നും ചോദ്യം ചെയ്തപ്പോള്‍ അസഭ്യം പറഞ്ഞ് ഇറക്കിവിട്ടെന്നുമാണ് പരാതി. ബസില്‍ യാത്ര ചെയ്യുന്നതിനിടെ കണ്ടക്ടര്‍ വിദ്യാര്‍ഥിനിയെ മോശമായി സ്പര്‍ശിച്ചെന്നും ഇത് ചോദ്യം ചെയ്തപ്പോള്‍ അസഭ്യം വിളിച്ചെന്നും വിദ്യാര്‍ഥിനി പരാതിയില്‍ പറയുന്നു. കാസര്‍കോട് നിന്ന് മംഗളൂരുവിലേക്ക് പോവുകയായിരുന്ന ബസില്‍ വെച്ചാണ് അതിക്രമം ഉണ്ടായത്. ചോദ്യം ചെയ്ത വിദ്യാര്‍ഥിനിയെ ബസില്‍ നിന്ന് ഇറക്കിവിടുകയായിരുന്നു. 

പഠനത്തിനായി രാവിലെയും വൈകുന്നേരവും ബസിലാണ് മംഗളൂരുവിലേക്ക് പോകുന്നതെന്നും ബസില്‍ യാത്ര ചെയ്യുന്നതിന് പാസുണ്ടെന്നും വിദ്യാര്‍ഥിനി പറഞ്ഞു. മുമ്പ് മോശമായി പെരുമാറിയതിനെ ചോദ്യം ചെയ്തിരുന്നു. ഇന്നും മോശമായി പെരുമാറാന്‍ ശ്രമിച്ചു. രാവിലെ എട്ടേമുക്കാലിന് ബസില്‍ കയറിയപ്പോഴായിരുന്നു സംഭവം. പ്രതികരിച്ചപ്പോള്‍ കണ്ടക്ടറും ഡ്രൈവറുമൊക്കെ ചേര്‍ന്ന് ചീത്ത വിളിക്കുകയായിരുന്നു. പരാതി നല്‍കുമെന്ന് പറഞ്ഞപ്പോള്‍ എന്തു വേണമെങ്കിലും ചെയ്‌തോളാന്‍ പറഞ്ഞ് നടുറോഡില്‍ ഇറക്കിവിടുകയായിരുന്നുവെന്നും പരീക്ഷയടക്കം എഴുതാനായില്ലെന്നും കോളജ് വിദ്യാര്‍ഥിനി പറഞ്ഞു.

സംഭവത്തില്‍ മഞ്ചേശ്വരം പൊലീസില്‍ പെണ്‍കുട്ടി പരാതി നല്‍കി. ബസിലെ യാത്രക്കാരാരും സംഭവത്തില്‍ ഇടപെട്ടില്ലെന്നും പരാതിയില്‍ പറയുന്നു.