(1947 മാർച്ച് 15,16,17 തിയതികളിൽ മീഞ്ചന്ത നടന്ന സമ്മേളനത്തോടനുബന്ധിച്ച പാസാക്കിയ എട്ടാം പ്രമേയം) 

ഫറോക്കിൽ വെച്ചു 6-ാം വാർഷികയോഗത്തിൽ സർവ്വ സമ്മതമായി പാസ്സാക്കപ്പെട്ട പ്രമേയം വീണ്ടും പാസ്സാക്കി.

 പ്രമേയം:

 കേരളത്തിലെ മുസ്ലിമിങ്ങളിൽ അനേകം കൊല്ലമായിട്ട് നിരാക്ഷേപമായി നടന്നുവരുന്നതും താഴെ വിവരിക്കുന്നതുമായ കാര്യങ്ങൾ അഹ്ലുസ്സുന്നത്തി വൽ ജമാഅത്തിൻ്റെ ഉലമാക്കളാൽ മതാനു സരണങ്ങളാണെന്നു സ്ഥിരപ്പെടുത്തപ്പെട്ടവയാണെന്നും അവ മതവിരുദ്ധങ്ങളാണെന്നൊ, അഥവാ ശിർക്കാണെന്നൊ, പറയുന്നവർ സുന്നികളല്ലെന്നും, അവർ ഇമാമത്തിനും ഖത്തീബുസ്ഥാനത്തിനും കൊള്ളരുതാത്തവരാണെന്നും ഈ യോഗം തീരുമാനിക്കുന്നു.

സംഗതികൾ: (1) മരിച്ചുപോയ അംബിയാ, ഔലിയാ, സാലിഹീൻ, അവരുടെ ദാത്തുകൊണ്ടും, ജാഹ്, ഹഖ്, ബർക്കത്ത്, ഇത്യാദി കൊണ്ടും തവസ്സുൽ (ഇടതേടൽ) ചെയ്യുന്നതും അവരെ നേരിട്ടു വിളിക്കലും അവരെ വിളിച്ചു സഹായത്തിനെ അപേക്ഷിക്കലും അവരുടെ ആസാറുകളെക്കൊണ്ടു ബറക്കത്തു മതിക്കലും,

(2) മരിച്ചുപോയ അംബിയാ, ഔലിയാ, മുതലായവക്കും മറ്റ് മുസ്‌ലിംകൾക്കും കൂലി കിട്ടുവാൻ വേണ്ടി ധർമ്മം ചെയ്യലും ആട്, കോഴി മുതലായവ നേർ ച്ച ചെയ്യലും, അവർക്കുവേണ്ടി ഖുർആൻ ഓതലും, ഓതിക്കലും മുസ്ല‌ിം മയ്യത്തുകളെ മറവു ചെയ്തതിനു ശേഷം ഖബറുങ്ങൽ വെച്ചു തൽഖീൻ ചൊല്ലികൊടുക്കലും മയ്യത്തിനുവേണ്ടി ഖബറിങ്ങൽ വെച്ചും മറ്റു സ്ഥലങ്ങളിൽ വെച്ചും ഖുർആൻ ഓതലും രാതിക്കലും

(3) ഖബർ സിയാറത്ത് ചെയ്യലും ഖബറാളികൾക്കു സലാം പറയലും അവർക്കു വേണ്ടി ദുആയിരിക്കലും ഖബർ സിയാറത്തിനു വേണ്ടി യാത്ര പോകലും

(4) ആയാത്ത്, ഹദീസ്, മറ്റു മുഅസ്സമായ അസ്മാഉകളെ കൊണ്ട് മന്ത്രം ചെയ്യലും, ഉറുക്കെഴുതി കെട്ടലും പിഞ്ഞാണം എഴുതികൊടുക്കലും, വെള്ളം, നൂല് മുതലായവ മന്ത്രിച്ചുകൊടുക്കലും, ബുർദ ഓതി മന്ത്രിക്കലും

(5) ഖാദിരിയ്യ ശാദുലിയ്യ രിഫാഇയ്യ: മുതലായ ശരിയായ ത്വരീഖത്തുകളിലെ ശരിയായ ശൈഖന്മാരുടെ കൈതുടർച്ചയും, ഒറ്റക്കും യോഗം ചേർന്നും നടപ്പുള്ള റാത്തിബും ത്വരീഖത്തിലെ ദിക്കൂറുകൾ ചൊല്ലലും, ദലായിലുൽ ഖൈറാത്ത്, ഹിസ്ബുന്നബാവി, അസ്‌മാഉന്നബി, അസ്‌മാഉൽ ബദ്രിയ്യീൻ, ഹിസ്ബുൽ ബഹർ മുതലായ വിർദുകളെ ചട്ടമാക്കലും, ദിക്റുകൾ കണക്കാക്കാൻ തസ്ബീഹ് മാല ഉപയോഗിക്കലും

(6) മൻഖൂസ് മുതലായ മൌലിദുകൾ ഓതിക്കലും, ബദരിയ്യത്ത്, ഖുത്തുബിയ്യത്ത് മുതലായ ബൈത്തുകൾ ചൊല്ലലും, ചൊല്ലിക്കലും, മുഹ് യിദ്ദീൻ മാല, രിഫാഈ മാല മുതലായ പാട്ടുകൾ പാടലും, പാടിക്കലും.

അവതാരകൻ: ശിഹാബുദ്ധീൻ അഹമ്മദ് കോയാ മൌലവി.

അനുവാദകന്മാർ 1. കമ്മു മൌലവി, 2. ശൈഖ് ആദം മൌലവി, ഹസ്റത്ത്, 3. മൂസാ മൗലവി

ഈ കൊല്ലവും വീണ്ടും പാസ്സാക്കി.

The 8th resolution reaffirmed at the 1947 Meenchanda Conference declared key Ahlussunnath Wal Jama’ah religious practices as authentic Islamic traditions, rejecting claims of shirk and affirming Sunni orthodoxy in Kerala.