എറണാകുളം: എറണാകുളത്ത് സ്വതന്ത്ര സ്ഥാനാര്‍ത്ഥിയ്ക്ക് നേരെ ആക്രമണം. എറണാകുളം ചേന്ദമംഗലത്തെ സ്വതന്ത്ര സ്ഥാനാര്‍ത്ഥിയായ ഫസല്‍ റഹ്‌മാനെയാണ് കുത്തിപരുക്കേല്‍പ്പിച്ചത്. സംഭവത്തില്‍ വടക്കേക്കര സ്വദേശി മനോജിനെ പൊലിസ് അറസ്റ്റ് ചെയ്തു. യൂട്യൂബില്‍ വീഡിയോ പോസ്റ്റ് ചെയ്തതുമായി ബന്ധപ്പെട്ട തര്‍ക്കമാണ് ആക്രമണത്തില്‍ കലാശിച്ചത്. മനോജും ഫസലും തമ്മില്‍ നേരത്തെ പ്രശ്‌നങ്ങള്‍ ഉണ്ടായിരുന്നുവെന്നാണ് പൊലീസ് പറയുന്നത്. 

ALSO READ: സ്ലീപ്പര്‍ കോച്ചിലും ഇനി മൂടിപ്പുതച്ചുറങ്ങാം; ബെഡ് ഷീറ്റുകളും തലയിണകളും റെയില്‍വേ നല്‍കും

ആക്രമണത്തില്‍ ഫസലിന്റെ പുറത്ത് അഞ്ച് തുന്നലുണ്ട്. ഇന്നലെ പകല്‍ 12.30ന് ചേന്ദമംഗലം പഞ്ചായത്ത് ഓഫിസില്‍ വച്ചാണ്  സംഭവം. കോട്ടയില്‍ കോവിലകത്തെ ടൂറിസം ഇന്‍ഫര്‍മേഷന്‍ സെന്ററിന് സമീപമുണ്ടായിരുന്ന തേക്കുമരം നഷ്ടപ്പെട്ടെന്ന് ചൂണ്ടിക്കാട്ടി ചേന്ദമംഗലം പഞ്ചായത്ത് സെക്രട്ടറി വടക്കേക്കര പൊലിസിലും വനംവകുപ്പിലും പരാതി നല്‍കിയിരുന്നു. ഇതു ഫസല്‍ വെട്ടി വിറ്റതാണെന്ന് ആരോപിച്ചു മനോജ് കഴിഞ്ഞ ദിവസം സമൂഹമാധ്യമത്തില്‍ വിഡിയോ പോസ്റ്റ് ചെയ്തു. വെള്ളിയാഴ്ച പഞ്ചായത്തിലെത്തിയ മനോജ് സെക്രട്ടറിയുമായി സംസാരിച്ചു നില്‍ക്കുമ്പോള്‍ ഫസല്‍ റഹ്‌മാന്‍ ഇവിടെയെത്തി.

 ഇരുവരും തമ്മില്‍ വാക്കേറ്റവും അടിപിടിയുമുണ്ടായി. സെക്രട്ടറിയുടെ മേശപ്പുറത്തുണ്ടായിരുന്ന മൂര്‍ച്ചയേറിയ ബ്ലേഡ് ഉപയോഗിച്ചാണ് മനോജ് ഫസലിനെ മുറിവേല്‍പ്പിച്ചെന്നാണ് കേസ്. കോട്ടയില്‍ കോവിലകത്ത് ഒരു ചെറുകിട വ്യവസായ സംരംഭം തുടങ്ങിയതുമായി ബന്ധപ്പെട്ട് ഇരുവരും തമ്മില്‍ നേരത്തെയും പ്രശ്നങ്ങളുണ്ടായിരുന്നു. പരുക്കേറ്റ ഫസല്‍ മൂത്തകുന്നം കുടുംബാരോഗ്യ കേന്ദ്രത്തിലും മനോജ് പറവൂരിലെ സ്വകാര്യ ആശുപത്രിയിലും ചികിത്സതേടി.

ചേന്ദമംഗലം പഞ്ചായത്ത് നിലവിലെ ഭരണസമിതിയിലെ എല്‍.ഡി.എഫ് അംഗവും  സി.പി.എം ബ്രാഞ്ച് സെക്രട്ടറിയുമായിരുന്ന ഫസല്‍ റഹ്‌മാന്‍  10-ാം വാര്‍ഡില്‍ ഇടതുപക്ഷ റിബല്‍ സ്ഥാനാര്‍ഥിയായാണ് മത്സരിക്കുന്നത്. ഇതേ തുടര്‍ന്ന് ഫസലിനെ കഴിഞ്ഞ ദിവസം സി.പി.എം  പുറത്താക്കിയിരുന്നു.

Independent candidate Fazal Rahman was stabbed in Ernakulam’s Chendamangalam during a campaign dispute. Police arrested Manoj following a conflict over a YouTube video.