ജക്കാർത്ത: ഒരാഴ്ചയായി തുടരുന്ന കനത്ത മഴയെത്തുടർന്നുണ്ടായ പ്രളയവും മണ്ണിടിച്ചിലും ഇന്തോനേഷ്യയിൽ കനത്ത നാശനഷ്ടമാണുണ്ടാക്കിയത്. ഏറ്റവും പുതിയ കണക്കുകൾ പ്രകാരം, ദുരന്തത്തിൽ 303 പേർ മരിക്കുകയും 279 പേരെ കാണാതാവുകയും ചെയ്‌തു. ഏകദേശം 80,000-ത്തോളം ആളുകൾ ഭവനരഹിതരായിട്ടുണ്ട്.

പ്രളയം ഏറ്റവും കൂടുതൽ ബാധിച്ചത് സുമാത്ര ദ്വീപ് പ്രവിശ്യയിലെ വിവിധ ഭാഗങ്ങളെയാണ്. ഇന്തോനേഷ്യ കൂടാതെ മലേഷ്യ, തായ്‌ലൻഡ് തുടങ്ങിയ രാജ്യങ്ങളിലും കഴിഞ്ഞ ഒരാഴ്ചയായി കനത്ത മഴ തുടരുകയാണ്.

നാശനഷ്ടങ്ങൾ: 

മണ്ണിടിച്ചിലിൽ റോഡുകൾ പൂർണ്ണമായും തകരുകയും ആശയവിനിമയ, അടിസ്ഥാന സൗകര്യങ്ങൾ നശിക്കുകയും ചെയ്തതോടെ പല പ്രദേശങ്ങളും ഒറ്റപ്പെട്ടു.മണ്ണിടിഞ്ഞതിനെത്തുടർന്ന് റോഡിൽ കുടുങ്ങിക്കിടക്കുന്നവരെ രക്ഷിക്കാനായി സൈന്യവും ദുരന്ത നിവാരണ സേനയും ശ്രമിക്കുന്നുണ്ട്. ഹെലികോപ്റ്ററുകൾ ഉപയോഗിച്ചുള്ള രക്ഷാപ്രവർത്തനമാണ് നിലവിൽ നടക്കുന്നത്. ദുരിതാശ്വാസ പ്രവർത്തനങ്ങൾക്കായി കൂടുതൽ സൈന്യത്തെ ഉടൻ എത്തിക്കുമെന്ന് ഇന്തോനേഷ്യൻ സൈനിക മേധാവി സുഹര്യാന്റോ അറിയിച്ചു. നിരവധി പേരെ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചു.

കനത്ത മഴ ശക്തമാകുന്നതിനു രണ്ട് ദിവസം മുൻപ് വടക്കൻ സുമാത്ര തീരത്തുള്ള ദ്വീപിൽ 6.6 തീവ്രത രേഖപ്പെടുത്തിയ ഭൂചലനം അനുഭവപ്പെട്ടിരുന്നു. ഇതിനു മുമ്പ് വടക്കൻ സുമാത്ര പ്രവിശ്യയിൽ കനത്ത മഴയെത്തുടർന്നുണ്ടായ വെള്ളപ്പൊക്കത്തിലും മണ്ണിടിച്ചിലിലും 28 പേർ മരിച്ച സംഭവവും ഉണ്ടായിട്ടുണ്ട്.