തിരുവനന്തപുരം: തദ്ദേശ തെരഞ്ഞെടുപ്പില്‍ തോറ്റതിന് പിന്നാലെ ആത്മഹത്യക്ക് ശ്രമിച്ച യു.ഡി.എഫ് സ്ഥാനാര്‍ഥി മരിച്ചു. ചെറിയകോണി സ്വദേശി വിജയകുമാരന്‍ നായര്‍ ആണ് മരിച്ചത്. 59 വയസ്സായിരുന്നു. 

തെരഞ്ഞെടുപ്പില്‍ അരുവിക്കര ഗ്രാമപഞ്ചായത്തിലെ മണമ്പൂര്‍ വാര്‍ഡില്‍ യു.ഡി.എഫ് സ്ഥാനാര്‍ത്ഥിയായാണ് വിജയകുമാരന്‍ നായര്‍ മത്സരിച്ചത്. തെരഞ്ഞെടുപ്പ് ഫലം വന്ന ശനിയാഴ്ച ഉച്ചയോടെ മരത്തില്‍ തൂങ്ങിമരിക്കാന്‍ ശ്രമിച്ചിരുന്നു. ഇത് മകന്‍ കണ്ടതോടെ ഉടന്‍ തന്നെ ആശുപത്രിയില്‍ എത്തിക്കുകയായിരുന്നു. ചികിത്സയിലിരിക്കെ ഇന്ന ്പുലര്‍ച്ചെയാണ് മരണം സംഭവിച്ചത്. 

ബി.ജെ.പി സ്ഥാനാര്‍ത്ഥിയാണ് മണമ്പൂരില്‍ വിജയിച്ചത് . വിജയകുമാരന്‍ നായര്‍ മൂന്നാം സ്ഥാനത്തായിരുന്നു. തെരഞ്ഞെടുപ്പില്‍ തോറ്റതില്‍ മനോവിഷമം ഉണ്ടായിരുന്നതായി ബന്ധുക്കള്‍ അറിയിച്ചു.