കോട്ടയം: കേരള കോണ്‍ഗ്രസ് (എം) എല്‍.ഡി.എഫിനൊപ്പംതന്നെ തുടരുമെന്ന് ചെയര്‍മാന്‍ ജോസ് കെ. മാണി. എല്‍.ഡി.എഫിനോടൊപ്പമാണെന്നതില്‍ ഉറച്ചുനില്‍ക്കുന്നുവെന്നും യു.ഡി.എഫിലേക്കില്ലെന്നും അതിന് ആരും വെള്ളം കോരാന്‍ വരേണ്ടെന്നും ജോസ് കെ മാണി പറഞ്ഞു. 

''പാലായിലും തൊടുപുഴയിലും കേരള കോണ്‍ഗ്രസ് മുന്നേറ്റമുണ്ടാക്കി. സംഘടനാപരമായി കേരള കോണ്‍ഗ്രസിന് ലഭിക്കേണ്ട വോട്ടുകള്‍ ലഭിച്ചിട്ടുണ്ട്. പാലായിലെ ഏറ്റവും വലിയ ഒറ്റകക്ഷി കേരള കോണ്‍ഗ്രസാണ്. രണ്ടില കരിഞ്ഞെന്ന പ്രചാരണം തെറ്റാണെന്നും കണക്കുകള്‍ നിരത്തി അദ്ദേഹം വിശദീകരിച്ചു. 

പാലാ നഗരസഭയില്‍ രണ്ടില ചിഹ്നത്തില്‍ കഴിഞ്ഞ പ്രാവശ്യത്തേതു പോലെ ഇപ്രാവശ്യവും കേരള കോണ്‍ഗ്രസ് പത്ത് സീറ്റ് നേടി. പാലാ നിയമസഭാ മണ്ഡലത്തില്‍ 2,198 വോട്ടിന്റെ ലീഡ് എല്‍.ഡി.എഫിനാണ്. തൊടുപുഴ നഗരസഭയില്‍ ജോസഫ് ഗ്രൂപ്പ് 38 വാര്‍ഡുകളില്‍ മത്സരിച്ചപ്പോള്‍ വിജയിച്ചത് രണ്ടിടത്ത് മാത്രമാണ്. തൊടുപുഴ നഗരസഭയുടെ ചരിത്രത്തില്‍ ഒരുവട്ടംപോലും ചെയര്‍മാനായി ജോസഫ് ഗ്രൂപ്പ് വന്നിട്ടില്ല. പക്ഷേ, കേരള കോണ്‍ഗ്രസ് മൂന്നുതവണ വന്നെന്നും അദ്ദേഹം പറഞ്ഞു.

തൊടുപുഴയില്‍ ജോസഫ് വിഭാഗം ജയിച്ചത് രണ്ടിടത്താണ്. പരുന്തിന്റെ പുറത്തിരിക്കുന്ന കുരുവിയുടെ അവസ്ഥയാണ് ജോസഫ് വിഭാഗത്തിനുള്ളത്. പാലയില്‍ തിരിച്ചടിയുണ്ടായിട്ടുണ്ടെന്നും ജോസ് കെ മാണി പറഞ്ഞു. സംസ്ഥാനത്ത് കുറച്ച് വോട്ടുകള്‍ യു.ഡി.എഫിലേക്ക് പോയിട്ടുണ്ട്. എങ്കിലും 14 ജില്ലാ പഞ്ചായത്തുകളില്‍ ഏഴ് ജില്ലാ പഞ്ചായത്തുകള്‍ ഇപ്പോഴും എല്‍.ഡി.എഫിന്റെ കൈയിലാണെന്നും അദ്ദേഹം പറഞ്ഞു.