തിരുവനന്തപുരം: ശബരിമല സ്വര്‍ണക്കൊള്ള കേസില്‍ അന്വേഷണം പുരോഗമിക്കവെ കഴിഞ്ഞ ദിവസം ചോദ്യം ചെയ്തവരില്‍ നിന്ന് നിര്‍ണായക വിവരങ്ങള്‍ ലഭിച്ചതായി സൂചന.ഉണ്ണികൃഷ്ണന്‍ പോറ്റി, പങ്കജ് ഭണ്ഡാരി, ഗോവര്‍ധന്‍ എന്നിവരെയായിരുന്നു കഴിഞ്ഞ ദിവസം ചോദ്യം ചെയ്തത്. അന്വേഷണ പുരോഗതി റിപ്പോര്‍ട്ട് സമര്‍പ്പിക്കുന്നതിന് മുന്നോടിയായി കൂടുതല്‍ തെളിവുകള്‍ കണ്ടെത്താനുള്ള ശ്രമത്തിലാണ് എസ്‌ഐടി. 

തന്റെ ജ്വല്ലറിയില്‍ നിന്നും പിടിച്ചെടുത്തത് ശബരിമലയില്‍ നിന്ന് കൊണ്ടുപോയതിന് തത്തുല്യമായ സ്വര്‍ണ്ണമാണെന്നാണ് ഗോവര്‍ധന്‍ വ്യക്തമാക്കിയിരുന്നത് മുന്‍ ദേവസ്വം മന്ത്രി കടകംപള്ളി സുരേന്ദ്രന്‍, ദേവസ്വം ബോര്‍ഡ് പ്രസിഡന്റായിരുന്ന പി എസ് പ്രശാന്ത് എന്നിവരെ ചോദ്യം ചെയ്തതില്‍ നിന്ന് ലഭിച്ച വിവരങ്ങളും സംഘം കോടതിയെ അറിയിക്കും.

പി എസ് പ്രശാന്തിനെ വൈകാതെ വീണ്ടും വിളിച്ചു വരുത്താനും അന്വേഷണസംഘം തീരുമാനിച്ചിട്ടുണ്ട്. ശബരിമലയില്‍ നിന്ന് വിഗ്രഹം കടത്തിയെന്ന വെളിപ്പെടുത്തലിലും അന്വേഷണം പുരോഗമിക്കുകയാണ്. ശബരിമലയില്‍ നിന്നും ശേഖരിച്ച സാമ്പിളുകള്‍ പങ്കജ് ഭണ്ഡാരിയില്‍ നിന്നും ഗോവര്‍ദ്ധനില്‍ നിന്നും പിടിച്ചെടുത്ത സ്വര്‍ണ്ണവുമായി നടത്തുന്ന ശാസ്ത്രീയ പരിശോധന ഫലം നിര്‍ണ്ണായകമാകും. പാളികളില്‍ നിന്നും രാസ ലായിനി ഉപയോഗിച്ച് സ്വര്‍ണ്ണം വേര്‍ തിരിച്ചെടുത്താല്‍ പാളി രാസ ലായിനിയില്‍ നശിക്കുകയാണ് ചെയ്യുക. അങ്ങനെയെങ്കില്‍ പഴയ പാളിയുടെ അളവിലുള്ള പുതിയ ചെമ്പ് പാളികളില്‍ വീണ്ടും സ്വര്‍ണ്ണം പൂശി ശബരിമലയില്‍ സ്ഥാപിച്ചുവെന്നാണ് എസ്‌ഐടിയുടെ പ്രധാന സംശയം.