ന്യൂഡല്‍ഹി: നരേന്ദ്രമോദി ഗുജറാത്ത് മുഖ്യമന്ത്രിയായിരിക്കെ 2003- 2006 കാലയളവിലുണ്ടായ 24 വ്യാജ ഏറ്റുമുട്ടല്‍ കേസുകള്‍ സംബന്ധിച്ച അന്വേഷണം മൂന്നുമാസത്തിനുള്ളില്‍ പൂര്‍ത്തിയാക്കണമെന്ന് സുപിംകോടതി.

കേസുകളില്‍ എത്രയും വേഗം അന്വേഷണം പൂര്‍ത്തിയാക്കി മൂന്നുമാസത്തിനുള്ളില്‍ റിപ്പോര്‍ട്ട് സമര്‍പ്പിക്കണമെന്ന് വിരമിച്ച സുപ്രിംകോടതി ജഡ്ജി ജസ്റ്റിസ് എച്ച്.എസ് ബേദിയുടെ നേതൃത്വത്തിലുള്ള പ്രത്യേക സംഘത്തി(എസ്.ടി.എഫ്)ന് ചീഫ് ജസ്റ്റിസ് ടി.എസ് താക്കൂര്‍, ജസ്റ്റിസുമാരായ എ.എം കന്‍വില്‍കര്‍ ഡി.വൈ ചന്ദ്രഹൂഡ് എന്നിവരടങ്ങിയ മൂന്നംഗബെഞ്ച് നിര്‍ദേശം നല്‍കി.

പ്രമുഖ സാമഹിക/ചലച്ചിത്രപ്രവര്‍ത്തകന്‍ ജാവേദ് അക്തര്‍, മഗ്‌സാസേ പുരസ്‌കാര ജേതാവും മുതിര്‍ന്ന മാധ്യമപ്രവര്‍ത്തകനുമായ ബി.ജി വര്‍ഗീസ് എന്നിവരുടേതുള്‍പ്പെടെയുള്ള ഒരുകൂട്ടം ഹരജികളിലാണ് മൂന്നംഗബെഞ്ചിന്റെ നടപടി. 2003- 06 കാലഘട്ടത്തില്‍ നടന്ന 24 ഏറ്റുമുട്ടല്‍ കൊലപതകക്കേസുകളും സി.ബി.ഐ അന്വേഷിക്കണമെന്നതുള്‍പ്പെടെയുള്ള ആവശ്യങ്ങളാണ് ഹരജിക്കാര്‍ ഉന്നയിക്കുന്നത്.

24 കേസുകളില്‍ 22 എണ്ണം അവസാനിച്ചതായാണ് വിവരമെന്ന് ഹരജിക്കാര്‍ക്കു വേണ്ടി ഹാജരായ പ്രശാന്ത് ഭൂഷണ്‍ കോടതിയെ അറിയിച്ചു. 2012 മാര്‍ച്ചിലാണ് എച്ച്.എസ് ബേദിയുടെ നേതൃത്വത്തിലുള്ള അന്വേഷണ സംഘത്തെ ഗുജറാത്ത് സര്‍ക്കാര്‍ നിയമിച്ചത്.

വ്യാജ ഏറ്റുമുട്ടലുകളും മനുഷ്യവകാശ ലംഘനങ്ങളും അവസാനിപ്പിക്കുന്നതിനും ഏറ്റുമുട്ടല്‍ കൊലപാതകങ്ങള്‍ എന്ന് ആരോപണമുയര്‍ന്ന കേസുകള്‍ അന്വേഷിക്കുന്നതിനുമായി ഗുജറാത്ത് സര്‍ക്കാര്‍ എസ്.ടി.എഫിനെ രൂപീകരിച്ചതായി സംസ്ഥാന സര്‍ക്കാരിനു വേണ്ടി ഹാജരായ അഡീഷനല്‍ സോളിസിറ്റര്‍ ജനറല്‍ തുഷാര്‍ മേത്ത പറഞ്ഞു.

വ്യാജ ഏറ്റുമുട്ടല്‍ സംഭവങ്ങളുടെ അന്വേഷണത്തില്‍ എസ്.ടി.എഫിന് സ്വയംഭരണാധികാരം നല്‍കിയിട്ടുണ്ട്. സംഘം നിഷ്പക്ഷമായി തന്ന കേസുകള്‍ അന്വേഷിച്ചുവരുന്നുണ്ടെന്നും അതുപൂര്‍ത്തിയാക്കാന്‍ മൂന്നുമാസം കൂടി വേണമെന്നും അഡീഷനല്‍ സോളിസിറ്റര്‍ ജനറല്‍ ആവശ്യപ്പെട്ടു. ഇതേത്തുടര്‍ന്നാണ് അന്വേഷണം പൂര്‍ത്തിയാക്കി മൂന്നുമാസത്തിനുള്ളില്‍ റിപ്പോര്‍ട്ട് സമര്‍പ്പിക്കാന്‍ എസ്.ടി.എഫിന് സുപ്രിംകോടതി നിര്‍ദേശം നല്‍കിയത്. അടുത്ത വര്‍ഷം ഫെബ്രുവരിയില്‍ കേസ് വീണ്ടും പരിഗണിക്കും.