അബുദാബി: ഈജിപ്ത്, ജോര്‍ദാന്‍, ലെബനന്‍ എന്നിവിടങ്ങളിലെ മുസ്‌ലിം ബ്രദര്‍ഹുഡിന്റെ (ഇഖ് വാനുല്‍ മുസ്ലിമീന്‍) വിവിധ ശാഖകളെ ഭീകരസംഘടനകളായി പ്രഖ്യാപിച്ച അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഭരണകൂടത്തിന്റെ തീരുമാനത്തെ യുണൈറ്റഡ് അറബ് എമിറേറ്റ്‌സ് സ്വാഗതം ചെയ്തു. യുഎഇ വിദേശകാര്യ മന്ത്രാലയം പുറത്തിറക്കിയ പ്രസ്താവനയിലാണ് ഇക്കാര്യം അറിയിച്ചത്. ലോകത്തിന്റെ വിവിധ ഭാഗങ്ങളില്‍ മുസ്‌ലിം ബ്രദര്‍ഹുഡ് ശാഖകള്‍ നടത്തുന്ന അക്രമങ്ങള്‍ക്കും അസ്ഥിരതയുണ്ടാകുന്ന പ്രവര്‍ത്തനങ്ങള്‍ക്കും എതിരെ ട്രംപ് ഭരണകൂടം നടത്തുന്ന വ്യവസ്ഥാപിതവും സുസ്ഥിരവുമായ നീക്കങ്ങളുടെ പ്രതിഫലനമാണ് ഈ തീരുമാനമെന്ന് മന്ത്രാലയം പറഞ്ഞു.
തീവ്രവാദം, വിദ്വേഷം, ഭീകരപ്രവര്‍ത്തനങ്ങള്‍ എന്നിവയെ പിന്തുണയ്ക്കാനോ ന്യായീകരിക്കാനോ ഇത്തരം സംഘടനകള്‍ ഉപയോഗിക്കുന്ന സാമ്പത്തികവും അല്ലാത്തതുമായ വിഭവങ്ങള്‍ ഇല്ലാതാക്കാന്‍ ഈ നടപടി സഹായിക്കുമെന്ന് മന്ത്രാലയം പറഞ്ഞു. തീവ്രവാദത്തെയും ഭീകരതയെയും ചെറുക്കുന്നതിനും പ്രാദേശികവും അന്തര്‍ദ്ദേശീയവുമായ സുരക്ഷയും സ്ഥിരതയും പ്രോത്സാഹിപ്പിക്കുന്നതിനുമുള്ള എല്ലാ ആഗോള ശ്രമങ്ങള്‍ക്കും യുഎഇയുടെ പൂര്‍ണ്ണ പിന്തുണ മന്ത്രാലയം ഉറപ്പുനല്‍കി.

ഈജിപ്ത്, ലബനാന്‍, ജോര്‍ദാന്‍ എന്നിവിടങ്ങളിലെ ബ്രദര്‍ഹുഡ് ശാഖകളെയാണ് യു.എസ് ഭീകര ഗ്രൂപ്പുകളില്‍ ഉള്‍പ്പെടുത്തിയത്. യു.എസ് സ്റ്റേറ്റ് സെക്രട്ടറി മാര്‍കോ റൂബിയോ ആണ് ഇക്കാര്യം വ്യക്തമാക്കിയത്. തങ്ങളുടെ എല്ലാ ശേഷിയും ഉപയോഗിച്ച് ബ്രദര്‍ഹുഡിനെതിരേ പോരാടുമെന്ന് റൂബിയോ പറഞ്ഞു. ഇസ്‌റാഈലിന്റെ ആഗോളതലത്തിലുള്ള പ്രതിയോഗികളെയെല്ലാം നേരിടുമെന്നും യു.എസ് പറഞ്ഞു. ചൊവ്വാഴ്ച ബ്രദര്‍ഹുഡിനെ ഭീകരപട്ടികയില്‍ ഉള്‍പ്പെടുത്തുന്ന എക്‌സിക്യൂട്ടീവ് ഉത്തരവില്‍ യു.എസ് പ്രസിഡന്റ് ഡൊണാള്‍ഡ് ട്രംപ് ഒപ്പുവച്ചു. 

The United Arab Emirates welcomed the announcement by the administration of US President Donald Trump designating several branches of the Muslim Brotherhood in Lebanon, Jordan, and Egypt as terrorist organisations.