കണ്ണൂര്‍: ആലപ്പുഴയ്ക്ക് പിന്നാലെ കണ്ണൂര്‍ ജില്ലയിലെ ഇരിട്ടിയിലും പക്ഷിപ്പനി (H5 N1) സ്ഥിരീകരിച്ചു. ഇരിട്ടി നഗരസഭയിലെ എടക്കാനത്ത് ചത്തുവീണ കാക്കകളിലാണ് രോഗബാധ കണ്ടെത്തിയത്. നിലവില്‍ വളര്‍ത്തുപക്ഷികളില്‍ രോഗം സ്ഥിരീകരിച്ചിട്ടില്ലെങ്കിലും മേഖലയില്‍ കനത്ത ജാഗ്രതാനിര്‍ദേശം പുറപ്പെടുവിച്ചു.

കാക്കകളില്‍ രോഗബാധ; റിപോര്‍ട്ട് പുറത്ത്

കണ്ണൂര്‍ റീജണല്‍ ഡയഗ്‌നോസ്റ്റിക് ലബോറട്ടറി ഡെപ്യൂട്ടി ഡയറക്ടര്‍ സമര്‍പ്പിച്ച റിപ്പോര്‍ട്ടിലാണ് പക്ഷിപ്പനി സ്ഥിരീകരിച്ചത്. രോഗം സ്ഥിരീകരിച്ചത് കാക്കകളിലായതിനാല്‍ കൃത്യമായ ഒരു പ്രഭവകേന്ദ്രം (Epicenter) നിശ്ചയിച്ചിട്ടില്ല. എന്നിരുന്നാലും വൈറസ് വ്യാപനം തടയാന്‍ ആവശ്യമായ നടപടികള്‍ സ്വീകരിക്കാന്‍ ജില്ലാ കലക്ടര്‍ നിര്‍ദേശം നല്‍കി.

ആരോഗ്യവകുപ്പിന്റെ നടപടികള്‍

രോഗബാധയുടെ പശ്ചാത്തലത്തില്‍ ഇരിട്ടി നഗരസഭയിലും സമീപ പ്രദേശങ്ങളിലും പ്രതിരോധ പ്രവര്‍ത്തനങ്ങള്‍ ശക്തമാക്കി.
പ്രദേശവാസികളില്‍ പനി, ശ്വാസകോശ സംബന്ധമായ അണുബാധകള്‍ എന്നിവ റിപ്പോര്‍ട്ട് ചെയ്യുന്നുണ്ടോ എന്ന് നിരീക്ഷിക്കാന്‍ ആരോഗ്യവകുപ്പിന് നിര്‍ദേശം നല്‍കി.

ALSO READ: കണ്ണൂരോ, തൃശൂരോ? ആര് സ്വർണക്കപ്പടിക്കും? എട്ട് ഇനങ്ങള്‍ നിര്‍ണായകം

ചത്തു വീഴുന്ന പക്ഷികളെ ആഴത്തില്‍ കുഴിയെടുത്ത് കാല്‍സ്യം കാര്‍ബണേറ്റ് ഉപയോഗിച്ച് നഗരസഭയുടെ പൊതുജനാരോഗ്യ വിഭാഗം ശാസ്ത്രീയമായി സംസ്‌കരിക്കും. വൈറസ് വ്യാപനം നിയന്ത്രിക്കാന്‍ ഡി.എം.ഒ (DMO), തദ്ദേശ സ്വയംഭരണ വകുപ്പ് ജോയിന്റ് ഡയറക്ടര്‍ എന്നിവര്‍ക്ക് കലക്ടര്‍ പ്രത്യേക ചുമതല നല്‍കി.

സംസ്ഥാനത്ത് പക്ഷിപ്പനി വ്യാപിക്കുന്നു

സംസ്ഥാനത്തിന്റെ വിവിധ ഭാഗങ്ങളില്‍ പക്ഷിപ്പനി റിപോര്‍ട്ട് ചെയ്യുന്നത് ആശങ്ക വര്‍ധിപ്പിക്കുന്നുണ്ട്.
മുഹമ്മ, കോടംതുരുത്ത് എന്നിവിടങ്ങളില്‍ പതിനാറോളം കാക്കകള്‍ ചത്തുവീണത് പക്ഷിപ്പനി മൂലമാണെന്ന് ഭോപ്പാലിലെ ലബോറട്ടറിയില്‍ നടത്തിയ പരിശോധനയില്‍ നേരത്തെ കണ്ടെത്തിയിരുന്നു.
കോട്ടയത്ത് കോഴികളിലും എറണാകുളത്ത് ദേശാടനപ്പക്ഷികളിലും നേരത്തെ രോഗബാധ സ്ഥിരീകരിച്ചിരുന്നു.

പക്ഷിപ്പനി പടരുന്ന സാഹചര്യത്തില്‍ പക്ഷികളുമായി നേരിട്ട് ഇടപഴകുന്നവര്‍ ജാഗ്രത പാലിക്കണമെന്നും ചത്ത പക്ഷികളെ കണ്ടാല്‍ ഉടന്‍ അധികൃതരെ വിവരം അറിയിക്കണമെന്നും ആരോഗ്യവകുപ്പ് നിര്‍ദേശിച്ചു.

Bird flu (H5N1) has been confirmed in crows found dead in Iritty municipality of Kannur district, prompting heightened surveillance and preventive measures despite no cases reported in domestic birds so far.