മസ്‌കത്ത്: 2025ല്‍ ഒമാന്‍ എയറിന്റെ യാത്രക്കാരുടെ എണ്ണത്തില്‍ വന്‍ വര്‍ധന രേഖപ്പെടുത്തി. കഴിഞ്ഞ വര്‍ഷം 58 ലക്ഷം യാത്രക്കാരെയാണ് ഒമാന്‍ എയര്‍ സര്‍വീസ് ചെയ്തതെന്ന് കമ്പനി വ്യക്തമാക്കി. ഇത് 2024നെ അപേക്ഷിച്ച് 8 ശതമാനം വര്‍ധനവാണ്.

കമ്പനി നടപ്പിലാക്കി വരുന്ന പ്രവര്‍ത്തനപരിഷ്‌കാരങ്ങളുടെയും പുതിയ സര്‍വീസ് സമീപനങ്ങളുടെയും ഫലമായാണ് ഈ മുന്നേറ്റമെന്ന് ഒമാന്‍ എയര്‍ വ്യക്തമാക്കി. വിമാനങ്ങളുടെ കാര്യക്ഷമമായ ഉപയോഗവും യാത്രക്കാരുടെ ആവശ്യം കണക്കിലെടുത്തുള്ള സര്‍വീസുകളും യാത്രക്കാരുടെ എണ്ണം കൂട്ടാന്‍ സഹായകമായി.

2025ല്‍ ഒമാന്‍ എയറിന്റെ സീറ്റുകള്‍ നിറയുന്ന തോത് 82 ശതമാനമായി ഉയര്‍ന്നു. 2024ല്‍ ഇത് 76 ശതമാനമായിരുന്നു. ഒമാനിലേക്ക് നേരിട്ടുള്ള യാത്രകള്‍ തിരഞ്ഞെടുക്കുന്ന യാത്രക്കാരുടെ എണ്ണവും വലിയ തോതില്‍ വര്‍ധിച്ചതായി റിപ്പോര്‍ട്ടില്‍ പറയുന്നു.

പുതിയ അന്താരാഷ്ട്ര റൂട്ടുകള്‍ ആരംഭിച്ചതും യാത്രക്കാരുടെ വളര്‍ച്ചയ്ക്ക് കാരണമായി. ആംസ്റ്റര്‍ഡാം, സിംഗപ്പൂര്‍, ബാഗ്ദാദ്, കോപ്പന്‍ഹേഗന്‍, തായിഫ് തുടങ്ങിയ നഗരങ്ങളിലേക്കുള്ള സര്‍വീസുകള്‍ ഒമാന്‍ എയറിന്റെ നെറ്റ്‌വര്‍ക്ക് വര്‍ധിപ്പിച്ചു.

ALSO READ: ഒമാനിലെ മുസന്ദം എയര്‍പോര്‍ട്ട്: സാങ്കേതിക പഠനങ്ങള്‍ പൂര്‍ത്തിയായി; നിര്‍മ്മാണം ഉടന്‍ ആരംഭിക്കും

ആഭ്യന്തര റൂട്ടുകളിലും മികച്ച പ്രതികരണമാണ് ലഭിച്ചത്. മസ്‌കത്ത്-സലാല റൂട്ടില്‍ യാത്രക്കാരുടെ എണ്ണം 19 ശതമാനം ഉയര്‍ന്നു. ഒമാന്‍ പൗരന്മാര്‍ക്കായി ഈ റൂട്ടില്‍ നിശ്ചിത നിരക്കുകള്‍ തുടരുന്നതും ആഭ്യന്തര യാത്രയ്ക്ക് പ്രോത്സാഹനമായി.

വണ്‍വേള്‍ഡ് എയര്‍ലൈന്‍സിലെ അംഗത്വം വഴി ഒമാന്‍ എയറിന്റെ ആഗോള ബന്ധങ്ങള്‍ കൂടുതല്‍ ശക്തമായതോടെ, വരും വര്‍ഷങ്ങളില്‍ യാത്രക്കാരുടെ എണ്ണം ഇനിയും ഉയരുമെന്ന പ്രതീക്ഷയിലാണ് കമ്പനി.

Oman Air recorded an 8 percent increase in passenger numbers in 2025, carrying 5.8 million travellers, supported by new routes, improved load factor and expanded global connectivity.