കോഴിക്കോട്: സ്വർണമെന്നു കരുതി യാത്രക്കാരിയുടെ മാല കവർന്ന് ഓടുന്ന തീവണ്ടിയിൽനിന്ന് പുറത്തേക്ക് ചാടിയ ഉത്തർപ്രദേശ് സ്വദേശി പിടിയിലായി. യു.പി. ഷഹരൻപുർ സ്വദേശി ഷഹജാദ് മുഹമ്മദ് (28) ആണ് കോഴിക്കോട് റെയിൽവേ പൊലിസിന്റെ പിടിയിലായത്.

സംഭവം ഇങ്ങനെ:

കോയമ്പത്തൂർ - മംഗളൂരു ഇൻ്റർസിറ്റി എക്സ്പ്രസ് പരപ്പനങ്ങാടി സ്റ്റേഷൻ വിടുന്ന സമയത്താണ് പ്രതി യാത്രക്കാരിയുടെ മാല പൊട്ടിച്ചത്. തുടർന്ന് രക്ഷപ്പെടാനായി തീവണ്ടിയിൽനിന്ന് പുറത്തേക്ക് ചാടിയ പ്രതിക്ക് ഗുരുതരമായി പരിക്കേറ്റു.

മോഷണത്തിന് ശേഷം പരിക്കേറ്റ നിലയിൽ അടുത്തുള്ള ആശുപത്രിയിൽ ചികിത്സ തേടിയ ഇയാൾ, താൻ തെങ്ങിൽനിന്ന് വീണതാണെന്നാണ് ആശുപത്രി അധികൃതരോട് പറഞ്ഞത്. എന്നാൽ പ്രതിക്ക് പരിക്കേൽക്കാൻ സാധ്യതയുണ്ടെന്ന നിഗമനത്തിൽ റെയിൽവേ പൊലിസും ആർ.പി.എഫും നടത്തിയ ദ്രുതഗതിയിലുള്ള പരിശോധനയിലാണ് ഷഹജാദ് മുഹമ്മദ് കുടുങ്ങിയത്.

പ്രധാന വിവരങ്ങൾ:

പ്രതി സ്ത്രീയിൽ നിന്ന് കവർന്നത് മുക്കുപണ്ടമായിരുന്നു. സ്വർണമെന്നു തെറ്റിദ്ധരിച്ചാണ് ഇയാൾ മാല കവർന്നത്.ഷഹജാദ് മുഹമ്മദിനെതിരെ കേരളത്തിലെ വിവിധ സ്റ്റേഷനുകളിൽ മോഷണക്കേസുകൾ നിലവിലുണ്ടെന്ന് പൊലിസ് അറിയിച്ചു.റെയിൽവേ പോലീസ് എസ്.ഐ. സി. പ്രദീപ്‌കുമാർ, എ.എസ്.ഐ.മാരായ ഷമീർ, ഷൈജു പ്രശാന്ത്, സി.പി.ഒ. സഹീർ അഹമ്മദ് എന്നിവരുടെ നേതൃത്വത്തിലാണ് പ്രതിയെ കസ്റ്റഡിയിലെടുത്തത്.കോഴിക്കോട് കോടതിയിൽ ഹാജരാക്കിയ പ്രതിയെ നിലവിൽ റിമാൻഡ് ചെയ്തിരിക്കുകയാണ്.