ദുബൈ: വിശുദ്ധ റമദാൻ മാസത്തോടനുബന്ധിച്ച് ദുബൈയിലെ സാലിക് ടോൾ (Salik Toll Gate ) നിരക്കുകളിലും സമയക്രമത്തിലും മാറ്റം പ്രഖ്യാപിച്ചു. റമദാനിലെ പുതുക്കിയ ജോലി സമയവും യാത്രാ രീതികളും പരിഗണിച്ച് ഗതാഗത തിരക്ക് നിയന്ത്രിക്കുന്നതിന്റെ ഭാഗമായാണ് ഈ നടപടി.

പുതിയ ക്രമീകരണമനുസരിച്ച്, പുലർച്ചെ 2 മണി മുതൽ രാവിലെ 7 മണി വരെ സാലിക് ഗേറ്റുകളിലൂടെയുള്ള യാത്ര പൂർണ്ണമായും സൗജന്യമായിരിക്കും.

പുതുക്കിയ നിരക്കുകൾ:

തിങ്കൾ മുതൽ ശനി വരെയുള്ള ദിവസങ്ങളിൽ താഴെ പറയുന്ന നിരക്കുകളായിരിക്കും ഈടാക്കുക:

* രാവിലെ 9 മുതൽ വൈകുന്നേരം 5 വരെ (Peak Hours): 6 ദിർഹം.

* രാവിലെ 7 മുതൽ 9 വരെയും, വൈകുന്നേരം 5 മുതൽ പുലർച്ചെ 2 വരെയും: 4 ദിർഹം.

* പുലർച്ചെ 2 മുതൽ രാവിലെ 7 വരെ: സൗജന്യം.

ഞായറാഴ്ചകളിലെ നിരക്ക്:

ഞായറാഴ്ചകളിൽ രാവിലെ 7 മണി മുതൽ പുലർച്ചെ 2 മണി വരെ 4 ദിർഹം എന്ന നിരക്കായിരിക്കും ഈടാക്കുക. ഈ ദിവസവും പുലർച്ചെ 2 മുതൽ 7 വരെ സൗജന്യ യാത്ര അനുവദിക്കും.

'പീക്ക് ഹവേഴ്സ്'

റമദാൻ മാസത്തിൽ ഉച്ചസമയങ്ങളിൽ അനുഭവപ്പെടാറുള്ള തിരക്ക് കണക്കിലെടുത്താണ് രാവിലെ 9 മുതൽ വൈകുന്നേരം 5 വരെയുള്ള സമയം 'പീക്ക് ഹവേഴ്സ്' ആയി നിശ്ചയിച്ചിരിക്കുന്നത്. 2026 ഫെബ്രുവരി 19-ന് റമദാൻ ആരംഭിക്കുമെന്നാണ് പ്രതീക്ഷിക്കുന്നത്.

യുഎഇയിൽ എന്നാണ് ഒന്നാം നോമ്പ്

യുഎഇയിലെ മാസപ്പിറവി നിരീക്ഷണ സമിതിയും നാളെ വൈകുന്നേരം യോഗം ചേരുന്നുണ്ട്. എന്നാൽ അബുദാബി ആസ്ഥാനമായുള്ള ഇന്റർനാഷണൽ അസ്‌ട്രോണമിക്കൽ സെന്റർ (IAC), ചൊവ്വാഴ്ച മാസപ്പിറവി കാണാൻ സാധ്യതയില്ലെന്ന് അറിയിച്ചിട്ടുണ്ട്. കൂടാതെ, സൂര്യനോട് വളരെ അടുത്തായതിനാൽ ടെലിസ്കോപ്പോ ബൈനോക്കുലറോ ഉപയോഗിച്ച് ചന്ദ്രനെ നിരീക്ഷിക്കുന്നത് കാഴ്ചശക്തിയെ ബാധിക്കുമെന്ന സുരക്ഷാ മുന്നറിയിപ്പും യുഎഇയിലെ ജ്യോതിശാസ്ത്രജ്ഞർ നൽകിയിട്ടുണ്ട്.

Summary : Salik has announced revised toll fees for the holy month of Ramadan.Dubai's toll gate operator adjusted the rate in line with expected changes in traffic patterns, as well as revised office and school timings across the city, to help improve overall traffic flow.