തിരുവനന്തപുരം: ശബരിമല സ്വര്‍ണക്കൊള്ള കേസില്‍ നടന്‍ ജയറാം എന്‍ഫോഴ്‌സ്‌മെന്റ് ഡയരക്ടറേറ്റിന് മുന്നില്‍ ഹാജരായി. ശബരിമല എല്ലാവരുടെയും വികാരമാണ്. തെറ്റുചെയ്തവരെ പുറത്തുകൊണ്ടുവരണമെന്നും ജയറാം പറഞ്ഞു. കള്ളത്തരം കാണിച്ചവരെ അയ്യപ്പന്‍ വെറുതെവിടുമോ എന്നും ജയറാം ചോദിച്ചു. തനിക്ക് അറിയുന്നതെല്ലാം ഇഡിക്ക് മുന്നില്‍ പറയുമെന്നും ജയറാം പറഞ്ഞു. ചോദ്യംചെയ്യലിന് ഹാജരാകാന്‍ ഇഡി നേരത്തേ ജയറാമിന് സമന്‍സ് നല്‍കിയിരുന്നു. ഇതുപ്രകാരമാണ് ഇഡിയുടെ കൊച്ചി ഓഫീസില്‍ ജയറാം ഇന്ന് ഹാജരായത്.

'എത്രയോ ക്ഷേത്രങ്ങള്‍ ഉണ്ടെങ്കിലും ശബരിമല ഓരോ ഭാരതീയനേയും സംബന്ധിച്ച് പുണ്യ സ്ഥലമാണ്. ഇത്തരം തട്ടിപ്പ് നടന്നിട്ടുണ്ടെങ്കില്‍ അതില്‍ സത്യം 100 ശതമാനം വെളിച്ചത്തു കൊണ്ടുവരണം. അതില്‍ ബന്ധപ്പെട്ടിട്ടുള്ളവരെ വെളിച്ചത്തു കൊണ്ടുവരാന്‍ ഓരോ മലയാളിയും ബാധ്യസ്ഥരാണ്. ആ മലയാളികളുടെ കൂട്ടത്തില്‍ പെട്ട ആളാണ് താനും എന്ന് ജയറാം. കഴിഞ്ഞ 38 വര്‍ഷമായി കേരളത്തില്‍ അങ്ങോളമിങ്ങോളം ക്ഷേത്രങ്ങളില്‍ പല പരിപാടികളില്‍ ആദ്യം ക്ഷണിക്കുന്നത് തന്നെയാണ്. താന്‍ പോകാറുമുണ്ട്. അത്തരത്തിലാണ് ഇതിനും പോയത്. തന്നില്‍ നിന്ന് ഉപകാരപ്പെട്ട വല്ലതും കിട്ടിയാല്‍ അത് നല്ലതല്ലേ. ഇനിയും ആരെങ്കിലും കുടുങ്ങാന്‍ ഉണ്ടെങ്കില്‍ അവരും കുടുങ്ങട്ടെ . അയ്യപ്പന്‍ അവരെ വെറുതെ വിടില്ല. 50 വര്‍ഷമായി ശബരിമലയില്‍ പോകുന്ന ഭക്തനാണ്. എന്റെ കടമയാണ് ഇത്'' ജയറാം പറഞ്ഞു.

ശബരിമലയിലെ സ്വര്‍ണം ഉപയോഗിച്ച് പ്രതികള്‍ ഏതെങ്കിലും തരത്തിലുള്ള സാമ്പത്തിക നേട്ടം ഉണ്ടാക്കിയിട്ടുണ്ടോ എന്നതിലാണ് ഇഡിയുടെ പരിശോധന നടക്കുന്നത്. ഇതില്‍ പോറ്റിയുമായുള്ള സാമ്പത്തിക ഇടപാടുകളിലാണ് ഇഡിയുടെ സമന്‍സ് ജയറാമിന് ലഭിച്ചിരിക്കുന്നത്.