മസ്‌കത്ത്: ഒമാനിലെ ഡയറക്ടറേറ്റ് ജനറല്‍ ഓഫ് കസ്റ്റംസ്, രാജ്യത്തെ കസ്റ്റംസ് യാര്‍ഡുകള്‍, വെയര്‍ഹൗസുകള്‍, ബന്ധപ്പെട്ട വകുപ്പുകള്‍ എന്നിവിടങ്ങളില്‍ സൂക്ഷിക്കുന്ന ഇറക്കുമതി ചരക്കുകളുടെ സംഭരണ കാലാവധി കുറയ്ക്കുന്ന പുതിയ നിയമങ്ങള്‍ പ്രഖ്യാപിച്ചു. വ്യാപാര നടപടികള്‍ കൂടുതല്‍ വേഗത്തിലാക്കുകയും ലോജിസ്റ്റിക് സംവിധാനങ്ങളുടെ കാര്യക്ഷമത ഉയര്‍ത്തുകയും ചെയ്യുന്നതിനായാണ് ഈ തീരുമാനം സ്വീകരിച്ചതെന്ന് അധികൃതര്‍ വ്യക്തമാക്കി.

പുതിയ നടപടിക്രമപ്രകാരം, സീപ്പോര്‍ട്ടുകളിലൂടെയും കരമാര്‍ഗ്ഗ അതിര്‍ത്തികളിലൂടെയും എത്തുന്ന ഇറക്കുമതി ചരക്കുകളുടെ സംഭരണ കാലാവധി മുന്‍പ് 180 ദിവസമായിരുന്നതിനെ 90 ദിവസമായി കുറച്ചു. അതുപോലെ, വായുമാര്‍ഗ്ഗം എത്തുന്ന ചരക്കുകള്‍ക്ക് മുന്‍പ് അനുവദിച്ചിരുന്ന 90 ദിവസത്തെ സംഭരണ സമയം 45 ദിവസമായി ചുരുക്കി. ശേഖരിക്കാതെയോ കൈപ്പറ്റാതെയോ കിടക്കുന്ന ചരക്കുകള്‍ മുന്‍പ് 90 ദിവസം വരെ സൂക്ഷിക്കാനാകുമായിരുന്നു,ഇനി അവ 60 ദിവസത്തിനകം നീക്കം ചെയ്യേണ്ടതാണ്.

ചരക്കുകളുടെ സഞ്ചാരം വേഗത്തിലാക്കുകയും, തുറമുഖങ്ങളിലെയും വെയര്‍ഹൗസുകളിലെയും തിരക്ക് കുറയ്ക്കുകയും ചെയ്യുന്നതിന് ഈ മാറ്റം സഹായകമാകുമെന്ന് കസ്റ്റംസ് അധികൃതര്‍ വ്യക്തമാക്കി. ഇറക്കുമതി-കയറ്റുമതി നടപടികള്‍ കൂടുതല്‍ കാര്യക്ഷമമാക്കുന്നതിലൂടെ വ്യാപാര മേഖലയ്ക്ക് ഗുണകരമായ അന്തരീക്ഷം സൃഷ്ടിക്കാനാണ് ലക്ഷ്യമെന്ന് അധികൃതര്‍ അറിയിച്ചു.

ALSO READ: ഒമാനില്‍ ടെലഗ്രാം ചാറ്റ് സേവനങ്ങള്‍ക്ക് പൂര്‍ണ സ്വാതന്ത്ര്യം; നിയന്ത്രണങ്ങള്‍ നീക്കി ടി.ആര്‍.എ

സംഭരണ കാലാവധി കുറയ്ക്കുന്നത് വ്യാപാര വേഗതയെ നേരിട്ട് സ്വാധീനിക്കുന്ന നിര്‍ണായക തീരുമാനമാണെന്നതാണ്. മുന്‍പ് ചരക്കുകള്‍ നീണ്ടകാലം കസ്റ്റംസ് യാര്‍ഡുകളില്‍ കിടന്നതിനാല്‍ ലോജിസ്റ്റിക് ചെലവുകളും അതിര്‍ത്തി തിരക്കുകളും വര്‍ധിച്ചിരുന്നു. പുതിയ നടപടികള്‍ ഈ പ്രശ്‌നങ്ങള്‍ കുറയ്ക്കുകയും രാജ്യത്തിന്റെ വ്യാപാര പരിസ്ഥിതി കൂടുതല്‍ കാര്യക്ഷമമാക്കുകയും ചെയ്യും എന്നാണ് വിലയിരുത്തല്‍.

ഈ തീരുമാനം രാജ്യത്തെ വ്യാപാര സൗകര്യങ്ങള്‍ മെച്ചപ്പെടുത്തുന്നതിനും, നിക്ഷേപ സൗഹൃദ അന്തരീക്ഷം ശക്തിപ്പെടുത്തുന്നതിനും ലക്ഷ്യമിട്ടുള്ള വ്യാപകമായ പരിഷ്‌കരണ നടപടികളുടെ ഭാഗമാണെന്ന് കസ്റ്റംസ് വിഭാഗം വ്യക്തമാക്കി.

Oman Customs has reduced storage deadlines for imported goods at seaports, land borders and airports to improve trade efficiency and reduce congestion.