കോഴിക്കോട്: ഓണം-പെരുന്നാള്‍ ആഘോഷിക്കാനുള്ള തിരക്കിനൊപ്പം ഗതാഗത സ്തംഭനത്തില്‍ വീര്‍പ്പുമുട്ടി നഗരം. തെരുവോര കച്ചവടവും ആഘോഷ മത്സരങ്ങളും ഒരുപോലെ വന്നപ്പോള്‍ നഗരത്തിലെ റോഡുകള്‍ വാഹനങ്ങള്‍ കൊണ്ടു നിറഞ്ഞിരിക്കുകയാണ്.
ആഘോഷങ്ങള്‍ക്കു മുന്‍പുള്ള അവസാന ഞായറാഴ്ച ആയതിനാല്‍ ഇന്നലെ എല്ലാ കടകളും തെരുവോര കച്ചവടങ്ങളും പതിവുപോലെ തുറന്നുപ്രവര്‍ത്തിച്ചു. പ്രധാന കച്ചവട കേന്ദ്രമായ മിഠായിത്തെരുവില്‍ ഇരുചക്ര വാഹനങ്ങള്‍ ഉള്‍പ്പെടെ കര്‍ശന നിയന്ത്രണം ഏര്‍പ്പെടുത്തി. കൊച്ചുകുട്ടികള്‍ മുതല്‍ സ്ത്രീകളുമായി വലിയനിര തന്നെ ആഘോഷ ചന്തകളില്‍ രാവിലെ മുതല്‍ എത്തിയിരുന്നു. പെരുന്നാള്‍ ആഘോഷങ്ങള്‍ക്കു മാറ്റുകൂട്ടാന്‍ മൈലാഞ്ചികള്‍ക്കും പുത്തനുടുപ്പുകള്‍ക്കുമായുള്ള നെട്ടോട്ടം രാത്രിവരെ തുടര്‍ന്നു.
ആഘോഷ സീസണില്‍ ഒരാള്‍ക്കുമാത്രമായി ഒരു വാഹനം നഗരത്തിലിറിക്കാന്‍ പാടില്ലെന്ന ഉത്തരവുണ്ടായിട്ടും ഇതു പാലിക്കാന്‍ യാത്രക്കാരോ നിയമം കര്‍ക്കശമായി നടപ്പാക്കാന്‍ നിയമപാലകരോ തയാറാകാത്തതും നഗരത്തിലെ ഗതാഗത സ്തംഭനത്തിന് ആക്കംകൂട്ടി. നഗരത്തിലെ മുഴുവന്‍ ഭാഗങ്ങളിലും റോഡ് കൈയേറിയുള്ള കച്ചവടവും അനധികൃത പാര്‍ക്കിങ്ങും വ്യാപകമായതോടെ കാല്‍നട യാത്രക്കാര്‍ യാത്ര റോഡിലൂടെയാക്കി. ഇതോടെ ഒരു വാഹനത്തിനു കഷ്ടിച്ചു പോകാനുള്ള സൗകര്യത്തില്‍ കാല്‍നടയാത്രയും വാഹനയാത്രയും ഒരു പോലെയായി. ഇരുചക്ര വാഹനങ്ങളാണു കൂടുതലായും റോഡ് കൈയേറി പാര്‍ക്ക് ചെയ്തത്.
നഗരത്തിലെ പ്രധാന ബൈപ്പാസുകളിലെ സിഗ്‌നല്‍ ലൈറ്റുകളും ദിവസങ്ങളിലായി കണ്ണടച്ചിരിക്കുന്നതും ഗതാഗതക്കുരുക്ക് മണിക്കൂറുകളോളം നീട്ടി. പുഷ്പ ജങ്ഷന്‍, അരയിടത്തുപ്പാലം, എരഞ്ഞിപ്പാലം, തൊണ്ടയാട് ബൈപ്പാസ്, മാവൂര്‍ റോഡ്, മാനാഞ്ചിറ ജങ്ഷനുകളില്‍ ഗതാഗത നിയന്ത്രണം കൈവിട്ട അവസ്ഥയാണ്. ഇവിടങ്ങളിലെല്ലാം തിരക്ക് നിയന്ത്രിക്കുന്നതിന് പൊലിസും ട്രാഫിക് ഉദ്യോഗസ്ഥരും ഏറെ പാടുപെടുന്നതു കാണാമായിരുന്നു.