മലപ്പുറം: ന്യായമായ ചികിത്സാ ആനുകൂല്യം നിഷേധിച്ച ഇൻഷുറൻസ് കമ്പനിക്ക് ജില്ലാ ഉപഭോക്തൃ തർക്ക പരിഹാര കമ്മിഷന്റെ കനത്ത പിഴ. പരാതിക്കാരന് ചികിത്സാ തുകയും നഷ്ടപരിഹാരവും ഉൾപ്പെടെ 5.30 ലക്ഷം രൂപ നൽകാനാണ് കോടതി ഉത്തരവിട്ടിരിക്കുന്നത്.

പറപ്പൂർ സൂപ്പി ബസാർ സ്വദേശി സമർപ്പിച്ച പരാതിയിലാണ് മലപ്പുറം ജില്ലാ ഉപഭോക്തൃ കമ്മിഷൻ ഈ സുപ്രധാന വിധി പുറപ്പെടുവിച്ചത്. ഇൻഷുറൻസ് കമ്പനികളുടെ ഏകപക്ഷീയമായ നടപടികൾക്കുള്ള തിരിച്ചടിയായാണ് ഈ വിധി.

ALSO READ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ചു; ദൃശ്യങ്ങൾ പകർത്തി സുഹൃത്തിന് അയച്ചു, ഭീഷണിപ്പെടുത്തി സുഹൃത്തും പീഡനത്തിനിരയാക്കി; യുവാക്കൾ അറസ്റ്റിൽ

പരാതിക്കാരന്റെ മാതാവിന്റെ ചികിത്സയുമായി ബന്ധപ്പെട്ടാണ് കേസിനാസ്പദമായ സംഭവങ്ങൾ തുടങ്ങുന്നത്. കരൾ സംബന്ധമായ ഗുരുതരമായ അസുഖത്തെ തുടർന്ന് ഇവർ വിവിധ ആശുപത്രികളിൽ ദീർഘകാലം ചികിത്സയിലായിരുന്നു. പെരിന്തൽമണ്ണ ഇ.എം.എസ് ആശുപത്രിയിലും തുടർന്ന് കോഴിക്കോട് മിംസ് ആശുപത്രിയിലുമായിരുന്നു വിദഗ്ധ ചികിത്സ തേടിയത്. രോഗാവസ്ഥ സങ്കീർണ്ണമായതിനെ തുടർന്ന് വലിയൊരു തുക ചികിത്സയ്ക്കായി ചെലവാക്കേണ്ടി വന്നു.

ഏകദേശം 19,89,104 രൂപയാണ് ആശുപത്രി ചെലവുകൾക്കായി കുടുംബത്തിന് ചിലവായത്. ഇതിനു പിന്നാലെയാണ് പോളിസി പ്രകാരമുള്ള തുക ലഭിക്കുന്നതിനായി ഇൻഷുറൻസ് കമ്പനിയെ ഇവർ സമീപിച്ചത്. എന്നാൽ, സാങ്കേതിക കാരണങ്ങൾ നിരത്തി ഇൻഷുറൻസ് കമ്പനി ക്ലെയിം നിരസിക്കുകയായിരുന്നു.

രോഗിക്ക് പോളിസി എടുക്കുന്നതിന് മുൻപേ അസുഖമുണ്ടായിരുന്നു എന്ന വാദമാണ് കമ്പനി പ്രധാനമായും ഉയർത്തിയത്. രോഗവിവരം മറച്ചുവെച്ചാണ് പോളിസി എടുത്തതെന്ന് ആരോപിച്ച് കമ്പനി തുക നൽകാൻ തയ്യാറായില്ല. ഇതോടെയാണ് നീതി തേടി പരാതിക്കാരൻ മലപ്പുറം ജില്ലാ ഉപഭോക്തൃ കമ്മിഷനെ സമീപിച്ചത്.

ആശുപത്രി രേഖകളിൽ അസുഖത്തിന് മൂന്ന് വർഷത്തെ പഴക്കമുണ്ടെന്ന് സൂചിപ്പിച്ചിട്ടുണ്ടെന്നായിരുന്നു കമ്പനിയുടെ കോടതിയിലെ വാദം. എന്നാൽ ഈ വാദത്തെ സാധൂകരിക്കുന്ന തെളിവുകൾ ഹാജരാക്കാൻ കമ്പനിക്കായില്ല. രോഗിക്ക് മൂന്ന് വർഷം മുൻപേ അസുഖമുണ്ടായിരുന്നുവെന്നോ അതിനായി ചികിത്സ തേടിയിരുന്നുവെന്നോ തെളിയിക്കുന്ന കൃത്യമായ രേഖകൾ ഹാജരാക്കുന്നതിൽ ഇൻഷുറൻസ് കമ്പനി പരാജയപ്പെട്ടു.

ചികിത്സാ രേഖകളിലെ കേവലമായ പരാമർശങ്ങൾ മാത്രം മുൻനിർത്തി ഇൻഷുറൻസ് ആനുകൂല്യം നിഷേധിക്കാനാവില്ലെന്ന് കമ്മിഷൻ വ്യക്തമാക്കി. കൃത്യമായ തെളിവുകളുടെ അഭാവത്തിൽ കമ്പനിയുടെ വാദം കോടതി തള്ളി. കെ. മോഹൻദാസ് പ്രസിഡന്റായ കമ്മിഷനാണ് കേസിൽ വിധി പ്രസ്താവിച്ചത്. പരാതിക്കാരൻ ഇൻഷുറൻസ് ക്ലെയിമിന് പൂർണ്ണമായും അർഹനാണെന്ന് നിരീക്ഷിച്ച കോടതി, തുക കൈമാറാൻ ഉത്തരവിടുകയായിരുന്നു.

പോളിസി തുകയായ 5,00,000 രൂപയും, മാനസിക പ്രയാസങ്ങൾക്കുള്ള നഷ്ടപരിഹാരമായി 25,000 രൂപയും കോടതി ചെലവിലേക്ക് 5,000 രൂപയും ഉൾപ്പെടെ ആകെ 5,30,000 രൂപയാണ് കമ്പനി നൽകേണ്ടത്. വിധി വന്ന് 45 ദിവസത്തിനകം തുക കൈമാറണം. നിശ്ചിത സമയത്തിനകം തുക നൽകിയില്ലെങ്കിൽ 9 ശതമാനം പലിശ സഹിതം പരാതിക്കാരന് നൽകണമെന്നും കമ്മിഷൻ ഉത്തരവിൽ പ്രത്യേകം പരാമർശിച്ചിട്ടുണ്ട്.

the malappuram district consumer commission has ordered an insurance company to pay 5,30,000 rupees to a complainant from parappur after his mother's liver disease claim was wrongfully denied.