ജിദ്ദ: അധിനിവേശ വെസ്റ്റ് ബാങ്കിന്റെ ഭാഗങ്ങൾ കൂട്ടിച്ചേർക്കാനുള്ള ഇസ്‌റാഈൽ നീക്കങ്ങൾ ചർച്ച ചെയ്യുന്നതിനായി മുസ്‌ലിം രാജ്യങ്ങളുടെ കൂട്ടായ്മ ആയ ഓർഗനൈസേഷൻ ഓഫ് ഇസ്‌ലാമിക് കോപ്പറേഷൻ (ഒ.ഐ.സി) വിദേശകാര്യ മന്ത്രിമാരുടെ അടിയന്തര യോഗം ചേർന്നു. സഊദി അറേബ്യയിലെ ജിദ്ദയിലുള്ള ഒ.ഐ.സി ജനറൽ സെക്രട്ടേറിയറ്റ് ആസ്ഥാനത്താണ് ഇന്നലെ വൈകുന്നേരം യോഗം നടന്നത്.

പലസ്തീൻ പ്രദേശങ്ങളിൽ ഇസ്‌റാഈൽ നടത്തുന്ന പുതിയ നീക്കങ്ങൾ അന്താരാഷ്ട്ര നിയമങ്ങളുടെ നഗ്നമായ ലംഘനമാണെന്ന് യോഗത്തിൽ അധ്യക്ഷത വഹിച്ച ഗാംബിയൻ വിദേശകാര്യ മന്ത്രി സെറിംഗ് മോഡൗ എൻജി പറഞ്ഞു. വെസ്റ്റ് ബാങ്കിലും കിഴക്കൻ ജറുസലേമിലും ഇസ്‌റാഈൽ നടത്തുന്ന കുടിയേറ്റ വ്യാപനം നിയമവിരുദ്ധമാണെന്നും അദ്ദേഹം ഓർമ്മിപ്പിച്ചു.

ഫലസ്തീൻ പ്രദേശങ്ങളിൽ ഇസ്‌റാഈലിന് യാതൊരു പരമാധികാരവുമില്ലെന്ന് ഒ.ഐ.സി അസിസ്റ്റന്റ് സെക്രട്ടറി ജനറൽ സമീർ ബകർ ദിയാബ് വ്യക്തമാക്കി. ഗസ്സയിലും വെസ്റ്റ് ബാങ്കിലും തുടരുന്ന ഇസ്‌റാഈൽ സാന്നിധ്യം അന്താരാഷ്ട്ര നിയമപ്രകാരം നിയമവിരുദ്ധമാണെന്നും അത് എത്രയും വേഗം അവസാനിപ്പിക്കണമെന്നും അദ്ദേഹം ആവശ്യപ്പെട്ടു.

2025 ഒക്ടോബർ 11-ലെ വെടിനിർത്തൽ കരാറിന് ശേഷം 600-ലധികം ഫലസ്തീനികൾ കൊല്ലപ്പെടുകയും 1,600 പേർക്ക് പരിക്കേൽക്കുകയും ചെയ്തതായി യോഗത്തിൽ റിപ്പോർട്ട് ചെയ്യപ്പെട്ടു. ഇസ്‌റാഈലിന്റെ കൊളോണിയൽ നയങ്ങൾ അവസാനിപ്പിക്കാൻ പ്രായോഗികമായ കൂട്ടായ നടപടികൾ വേണമെന്ന് ഫലസ്തീൻ വിദേശകാര്യ മന്ത്രി വർസെൻ അഘബേക്കിയൻ യോഗത്തിൽ ആഹ്വാനം ചെയ്തു. അംഗരാജ്യങ്ങളിൽ നിന്നുള്ള നിരവധി വിദേശകാര്യ മന്ത്രിമാരും അംബാസഡർമാരും യോഗത്തിൽ പങ്കെടുത്തു.

Summary : The Executive Committee of the Organisation of Islamic Cooperation (OIC) convened an emergency meeting of foreign ministers at its headquarters in Jeddah, Saudi Arabia, to discuss the serious repercussions of Israel's measures aimed at annexing parts of the occupied West Bank.