കൊളംബോ: ഇന്ത്യൻ സമുദ്രമേഖലയിൽ യുദ്ധസമാനമായ സാഹചര്യം സൃഷ്ടിച്ചുകൊണ്ട് അമേരിക്ക നടത്തിയ ടോർപ്പിഡോ ആക്രമണത്തിൽ ഇറാന്റെ അത്യാധുനിക യുദ്ധക്കപ്പൽ ഐആർഐഎസ് ദേന (IRIS Dena) തകർന്നു. ശ്രീലങ്കൻ തീരത്തിന് സമീപം ബുധനാഴ്ച നടന്ന ആക്രമണത്തിൽ കപ്പലിലുണ്ടായിരുന്ന 87 പേരുടെ മൃതദേഹങ്ങൾ കണ്ടെടുത്തു. ലങ്കൻ നാവികസേന നടത്തിയ രക്ഷാപ്രവർത്തനത്തിൽ 32 പേരെ ജീവനോടെ രക്ഷപ്പെടുത്തി. 180 ഓളം പേരായിരുന്നു കപ്പലിൽ ഉണ്ടായിരുന്നത്.

1945-ലെ രണ്ടാം ലോകമഹായുദ്ധത്തിന് ശേഷം ആദ്യമായാണ് ഒരു വിദേശ യുദ്ധക്കപ്പലിനെ അമേരിക്ക ടോർപ്പിഡോ ഉപയോഗിച്ച് തകർക്കുന്നത്. വിശാഖപട്ടണത്ത് നടന്ന 'മിലാൻ 2026' ബഹുരാഷ്ട്ര നാവികാഭ്യാസത്തിൽ പങ്കെടുത്ത ശേഷം ഇറാനിലേക്ക് മടങ്ങുകയായിരുന്നു മൗഡ്ജ് ക്ലാസിൽപ്പെട്ട ഈ യുദ്ധക്കപ്പൽ. ഒരു അമേരിക്കൻ സൈനിക അന്തർവാഹിനിയിൽ നിന്നാണ് ആക്രമണമുണ്ടായതെന്നാണ് റിപ്പോർട്ടുകൾ.

പ്രധാന സംഭവവികാസങ്ങൾ

സംഘർഷം ലങ്കൻ തീരത്തേക്ക് വ്യാപിച്ചതിൽ ശ്രീലങ്കൻ രാഷ്ട്രീയ നേതാക്കൾ കടുത്ത ആശങ്ക രേഖപ്പെടുത്തി.പ്രസിഡന്റ് ഡൊണാൾഡ് ട്രംപിന്റെ യുദ്ധാധികാരങ്ങൾ പരിമിതപ്പെടുത്താനുള്ള പ്രമേയം യുഎസ് സെനറ്റ് വോട്ടിനിട്ട് തള്ളി. ഇതോടെ മേഖലയിൽ സൈനിക നീക്കം ശക്തമാകാനാണ് സാധ്യത.ഗൾഫ് മേഖലയിൽ ഇറാന്റെ മിസൈൽ-ഡ്രോൺ ആക്രമണങ്ങൾ ആറാം ദിവസവും തുടരുകയാണ്.

ഇന്ത്യയുടെ നിലപാട്

തങ്ങളുടെ അതിഥി കപ്പലായി എത്തിയ ഐറിസ് ദേന ആക്രമിക്കപ്പെട്ട സംഭവത്തിൽ ഇന്ത്യ ഇതുവരെ ഔദ്യോഗികമായി പ്രതികരിച്ചിട്ടില്ല.വിഷയത്തെക്കുറിച്ച് ഗൗരവകരമായ പരിശോധന നടക്കുകയാണെന്ന് സർക്കാർ വൃത്തങ്ങൾ സൂചിപ്പിച്ചു.ഇന്ത്യൻ സമുദ്രപരിധി പിന്നിട്ട ശേഷമാണ് ആക്രമണം നടന്നതെങ്കിലും, അയൽരാജ്യമായ ശ്രീലങ്കയുടെ തീരത്ത് നടന്ന സംഭവം ഇന്ത്യ നിരീക്ഷിച്ചുവരികയാണ്.അമേരിക്കൻ സൈന്യം ഇന്ത്യൻ തുറമുഖങ്ങൾ ഉപയോഗിക്കുന്നു എന്ന വാർത്തകൾ വ്യാജമാണെന്ന് വിദേശകാര്യ മന്ത്രാലയം വ്യക്തമാക്കി.

നയതന്ത്ര നീക്കങ്ങൾ

സംഭവത്തിന് പിന്നാലെ ഇന്ത്യൻ വിദേശകാര്യമന്ത്രി എസ്. ജയശങ്കർ സഊദി വിദേശകാര്യമന്ത്രിയുമായി ഫോണിൽ സംസാരിച്ചു. എന്നാൽ ഈ സംഭാഷണത്തിന്റെ വിശദാംശങ്ങൾ ഇന്ത്യ പുറത്തുവിട്ടിട്ടില്ല. ആക്രമിക്കപ്പെട്ട കപ്പലിനെക്കുറിച്ച് റോയിട്ടേഴ്‌സ് ഉൾപ്പെടെയുള്ള അന്താരാഷ്ട്ര ഏജൻസികൾ കൂടുതൽ വിവരങ്ങൾ പുറത്തുവിടുന്നുണ്ട്.