ആലുവ: ടൗണ്‍ ഭാഗത്ത് കഞ്ചാവ് വില്‍പ്പന നടത്തി വന്നിരുന്ന നാലുപേര്‍ പിടിയില്‍. പറവൂര്‍ മന്നം ജാറപ്പടി കംബിവേലിക്കകം വീട്ടില്‍ സംഗീത് (29), മരട് ശോഭ നിവാസില്‍ അരുണ്‍ ഗോപി(28), ഉളിയന്നൂര്‍ കാട്ടുംപറമ്പില്‍ വീട്ടില്‍ അരുണ്‍ ബാബു (21), തായിക്കാട്ടുക്കര വാരിയത്ത് വീട്ടില്‍ ഷഫീക്ക് വി.എം (24) എന്നിവരെ 19 പൊതി കഞ്ചാവുമായി ആലുവ എക്‌സൈസ് റേഞ്ച് ഇന്‍സ്‌പെക്ടര്‍ ആര്‍ പ്രശാന്തും സംഘവും ചേര്‍ന്ന് അറസ്റ്റ് ചെയ്തു.
പ്രതികളായ അരുണ്‍ ഗോപി, ഷെഫീക് എന്നിവരില്‍ നിന്നും കഞ്ചാവ് കടത്താന്‍ ഉപയോഗിച്ച രണ്ട് ബൈക്കുകളും കസ്റ്റഡിയില്‍ എടുത്തു. തമിഴ്‌നാട്ടില്‍ നിന്നും കിലോയ്ക്ക് 12000 രൂപ നിരക്കി ല്‍വാങ്ങുന്ന കഞ്ചാവ് സ്‌ക്കൂള്‍ കോളേജ് വിദ്യാര്‍ഥികള്‍ക്ക് 10 ഗ്രാം വീതം വരുന്ന പൊതികളിലാക്കി 500 രൂപ നിരക്കില്‍ 'പോപ്പിന്‍സ് ' എന്ന കോഡ് ഭാഷയിലാണ് വില്‍പന നടത്തി വന്നിരുന്നത്.
എക്‌സൈസ് നടത്തിയ റെയ്ഡില്‍ അസിസ്റ്റന്റ് എക്‌സൈസ് ഇന്‌സ്പകടര്‍ സന്തോഷ് കുമാര്‍, സിവില്‍ എക്‌സൈസ് ഓഫിസര്‍മ്മാരായ എം.യു സാജു, എ.ഇ സിദ്ധിക്, കെ.ആര്‍ രതീഷ് , സി.എം നവാസ്, കെ.എ മനോജ്, എസ്.സിദ്ധാര്‍ഥ്, എ സിയാദ്, ഡ്രൈവര്‍ സക്കീര്‍ഹുസൈന്‍ എന്നിവര്‍ പങ്കെടുത്തു. അറസ്റ്റ് ചെയ്ത പ്രതികളെ ആലുവ ജുഡീഷ്യ ല്‍ ഒന്നാംക്ലാസ്സ് മജിസ്‌ട്രേറ്റ് കോടതി മുമ്പാകെ ഹാജരാക്കി.