മട്ടാഞ്ചേരി: കുടിവെള്ളം ലഭ്യമല്ലാതായതോടെ നാട്ടുകാര്‍ പൗരസമിതി രൂപീകരിച്ച് ഉപരോധ സമരം നടത്തി. അധികൃതരോട് അറിയിച്ചിട്ടും ഒരാഴ്ചയായി കുടിവെള്ളം ലഭിക്കാതിരിന്നതിനെ തുടര്‍ന്ന് തുരുത്തി പൗരസമിതിയുടെ ആഭിമുഖ്യത്തില്‍ ഇന്നലെ രാവിലെ ഒന്‍പത് മണിയോടെ ഫോര്‍ട്ട് കൊച്ചി ബോട്ട് ജെട്ടി ഉപരോധിച്ചത്.
ജനപ്രതിനിധികളോ അധികൃതരോ സംഭവ സ്ഥലത്ത് എത്താതിരിന്നതിനെ തുടര്‍ന്ന് പിന്നിട് സമരക്കാര്‍ റോഡ് ഉപരോധിച്ചു. പെരുന്നാള്‍ തലേന്ന് പോലും ടാങ്കര്‍ ലോറികളില്‍ കുടിവെള്ളം എത്തിക്കാന്‍ തയ്യാറാകാതിരിന്നതിനെ തുടര്‍ന്നാണ് ജനങ്ങള്‍ രോഷാകുലരായത്.
തുരുത്തി, കോഞ്ചേരി ,നെല്ല് കടവ്, ഈരവേലി തുടങ്ങിയ ഭാഗങ്ങളിലാണ് കഴിഞ്ഞ ഒരാഴ്ചയായി കുടിവെള്ളം കിട്ടാതായത്. പൗരസമിതിയുടെ നേതൃത്വത്തില്‍ നടന്ന സമരത്തില്‍ അബ്ദുക്കോയ, മജീദ്, സൈനുദ്ധീന്‍, മുഹമ്മദാലി എന്നിവര്‍ സംസാരിച്ചു.
കൊച്ചി മണ്ഡലത്തിലെ കഴിഞ്ഞ നിയമസഭാ തിരഞെടുപ്പിലെ പ്രധാന വിഷയം തന്നെ കുടിവെള്ള പ്രശ്‌നമായിരിന്നു. വിജയിച്ചാല്‍ കുടിവെള്ള പ്രശ്‌നത്തിനായിരിക്കും മുന്‍ഗണന കൊടുക്കുന്നതെന്നാണ് ജനപ്രതിനിധികള്‍ വാക്ക് കൊടുത്തിരിന്നത്. എന്നാല്‍ കുടിവെള്ള ക്ഷാമം പരിഹരിക്കാന്‍ കഴിഞ്ഞതുമില്ല. നിലവില്‍ നാമമാത്രമായി ലഭിച്ച് കൊണ്ടിരിക്കുന്ന കുടിവെള്ളം മാലിന്യം നിറഞതാണ്.