ഫുട്ബോൾ വെറുമൊരു കളിയല്ല, അതൊരു വികാരമാണെന്ന് പറയുന്നവർ ചൂണ്ടിക്കാണിക്കുന്ന ഏറ്റവും വലിയ ഉദാഹരണമാണ് 'റെമോണ്ടഡ'. തോൽവി ഉറപ്പായ ഘട്ടത്തിൽ നിന്ന്, എല്ലാ കണക്കുകൂട്ടലുകളെയും കാറ്റിൽപ്പറത്തി ഒരു ടീം നടത്തുന്ന അവിശ്വസനീയമായ തിരിച്ചുവരവിനെയാണ് ഈ പദം സൂചിപ്പിക്കുന്നത്. അസാധ്യമെന്ന് ലോകം വിധിയെഴുതിയ നിമിഷങ്ങളിൽ നിന്ന് വിജയത്തിന്റെ സിംഹാസനത്തിലേക്കുള്ള ആ കുതിപ്പ് ഫുട്ബോൾ ചരിത്രത്തിലെ സുവർണ്ണ ലിപികളാൽ എഴുതപ്പെട്ട അധ്യായങ്ങളാണ്.

എന്താണ് റെമോണ്ടഡ? 

'റെമോണ്ടഡ' (Remontada) എന്നത് ഒരു സ്പാനിഷ് പദമാണ്. ഇതിന്റെ അർത്ഥം 'തിരിച്ചുവരവ്' (Comeback) എന്നാണ്. സ്പാനിഷ് പദമായ'Remontar' (മുകളിൽ കയറുക അല്ലെങ്കിൽ മറികടക്കുക) എന്നതിൽ നിന്നാണ് ഈ വാക്ക് ഉണ്ടായത്. സ്പാനിഷ് രാഷ്ട്രീയത്തിലും സൈനിക നീക്കങ്ങളിലും ഈ വാക്ക് പണ്ട് ഉപയോഗിച്ചിരുന്നെങ്കിലും, ഇന്ന് ലോകമെമ്പാടും ഈ പദം അറിയപ്പെടുന്നത് ഫുട്ബോളിലൂടെയാണ്. പ്രത്യേകിച്ച് സ്പാനിഷ് ക്ലബ്ബ് ഫുട്ബോളിന്റെ സ്വാധീനം ആഗോളതലത്തിൽ വളർന്നതോടെ, വലിയ ഗോൾ അന്തരങ്ങളെ മറികടന്ന് ജയിക്കുന്ന ഏത് മത്സരത്തെയും വിശേഷിപ്പിക്കാൻ ആരാധകർ ഈ പദം ഉപയോഗിച്ചു തുടങ്ങി.

ഫ്രഞ്ച് നിഘണ്ടുവായ 'Larousse'-ൽ പോലും ഈ വാക്ക് ഔദ്യോഗികമായി ഉൾപ്പെടുത്തിയിട്ടുണ്ട്. 2017-ൽ ബാഴ്സലോണ നടത്തിയ വിഖ്യാത തിരിച്ചുവരവിന് ശേഷമാണ് ഈ വാക്കിന് ഇത്രയധികം ആഗോള പ്രശസ്തി ലഭിച്ചത്.

ഫുട്ബോൾ ചരിത്രത്തിലെ അവിസ്മരണീയമായ റെമോണ്ടഡകൾ

ലോക ഫുട്ബോളിൽ ആരാധകരുടെ സിരകളിൽ ഇന്നും അഗ്നി പടർത്തുന്ന ചില പ്രധാന റെമോണ്ടഡകൾ കുറിച്ചറിയാം:

1. ബാഴ്സലോണ vs പി.എസ്.ജി (2017) – 'ദി ലാ റെമോണ്ടഡ'

ചരിത്രത്തിലെ ഏറ്റവും വലിയ തിരിച്ചുവരവ് ഏതെന്ന് ചോദിച്ചാൽ ഏതൊരു ഫുട്ബോൾ പ്രേമിയും പറയുന്ന പേരാണിത്. ചാമ്പ്യൻസ് ലീഗ് പ്രീ-ക്വാർട്ടറിന്റെ ഒന്നാം പാദത്തിൽ പാരീസിൽ വെച്ച് എതിരില്ലാത്ത 4 ഗോളുകൾക്ക് ബാഴ്സലോണ തോറ്റിരുന്നു. രണ്ടാം പാദത്തിൽ ബാഴ്സലോണയ്ക്ക് ക്വാർട്ടറിലെത്താൻ അഞ്ച് ഗോളുകളെങ്കിലും വേണമായിരുന്നു.

ക്യാമ്പ് നൗവിൽ നടന്ന ആ മത്സരത്തിൽ കളിയുടെ 88-ാം മിനിറ്റ് വരെ ബാഴ്സലോണയ്ക്ക് വിജയിക്കാൻ 3 ഗോളുകൾ കൂടി വേണമായിരുന്നു. എന്നാൽ അവസാന ഏഴ് മിനിറ്റുകളിൽ നെയ്മറുടെ ഇരട്ട ഗോളുകളും ഇൻജുറി ടൈമിൽ സെർജി റോബർട്ടോ നേടിയ ആറാം ഗോളും ചേർന്ന് ബാഴ്സലോണയെ 6-1 എന്ന സ്കോറിന് വിജയം സ്വന്തമാക്കി (അഗ്രിഗേറ്റ് 6-5). ഫുട്ബോൾ ലോകം അന്ന് സ്തംഭിച്ചുപോയി. 'റെമോണ്ടഡ' എന്ന വാക്ക് ലോകം മുഴുവൻ ഏറ്റുപിടിച്ച നിമിഷമായിരുന്നു അത്.

2. ലിവർപൂൾ vs ബാഴ്സലോണ (2019) – ആൻഫീൽഡിലെ അത്ഭുതം

മുൻപ് റെമോണ്ടഡ നടത്തിയ ബാഴ്സലോണയ്ക്ക് തന്നെ 2019-ൽ മറ്റൊരു തിരിച്ചുവരവിന്റെ ഇരയാകേണ്ടി വന്നു. സെമി ഫൈനൽ ആദ്യ പാദത്തിൽ ലയണൽ മെസ്സിയുടെ മികവിൽ ബാഴ്സലോണ 3-0 ന് ജയിച്ചിരുന്നു. രണ്ടാം പാദത്തിൽ ലിവർപൂളിന്റെ തട്ടകമായ ആൻഫീൽഡിൽ വെച്ച് മുഹമ്മദ് സലായും റോബർട്ടോ ഫിർമിനോയും ഇല്ലാതെ ഇറങ്ങിയ ലിവർപൂൾ എതിരില്ലാത്ത 4 ഗോളുകൾക്ക് ബാഴ്സയെ തകർത്തു. ഡിവോക്ക് ഒറിഗിയും വൈനാൾഡവും ഇരട്ട ഗോളുകൾ നേടി ലിവർപൂളിനെ ഫൈനലിലെത്തിച്ചു.

3. ലിവർപൂൾ vs എ.സി മിലാൻ (2005) – ദി ​ഗ്രേറ്റ് ഇസ്താംബൂൾ മിറാക്കിൾ

ചാമ്പ്യൻസ് ലീഗ് ഫൈനൽ ചരിത്രത്തിലെ ഏറ്റവും വലിയ തിരിച്ചുവരവാണിത്. ആദ്യ പകുതി അവസാനിക്കുമ്പോൾ എ.സി മിലാൻ 3-0 ന് മുന്നിലായിരുന്നു. എന്നാൽ രണ്ടാം പകുതിയിൽ വെറും ആറ് മിനിറ്റിനിടെ മൂന്ന് ഗോളുകൾ തിരിച്ചടിച്ച് ലിവർപൂൾ സമനില പിടിച്ചു. ഒടുവിൽ പെനാൽറ്റി ഷൂട്ടൗട്ടിൽ ലിവർപൂൾ കിരീടം ചൂടി.

4. റയൽ മാഡ്രിഡ് vs മാഞ്ചസ്റ്റർ സിറ്റി (2022) – ബെർണബ്യൂവിലെ രാജകീയ തിരിച്ചുവരവ്

റയൽ മാഡ്രിഡിന്റെ ഡി.എൻ.എയിൽ തന്നെയുള്ളതാണ് റെമോണ്ടഡകൾ. 2022 സെമിയിൽ മാഞ്ചസ്റ്റർ സിറ്റിക്കെതിരെ രണ്ടാം പാദത്തിന്റെ 89-ാം മിനിറ്റിലും റയൽ പിന്നിലായിരുന്നു. എന്നാൽ 90, 91 മിനിറ്റുകളിലായി റോഡ്രിഗോ നേടിയ രണ്ട് ഗോളുകൾ കളി എക്സ്ട്രാ ടൈമിലേക്ക് നീട്ടുകയും ബെൻസേമയുടെ ഗോളിലൂടെ റയൽ ഫൈനലിലേക്ക് മുന്നേറുകയും ചെയ്തു.

5.സ്പോർട്ടിങ്ങ് ലിസ്ബൺ vs ബോഡോ ഗിഫ്ലിറ്റ്(2026) ചരിത്രം തിരുത്തി സ്പോർട്ടിങ്ങ് ലിസ്ബൺ

യൂറോപ്യൻ ഫുട്ബോൾ ചരിത്രത്തിലെ ഏറ്റവും വലിയ തിരിച്ചുവരവുകളിലൊന്നിന് സാക്ഷ്യം വഹിച്ച് ലിസ്ബണിലെ എസ്റ്റാഡിയോ ജോസ് അൽവാലഡെ സ്റ്റേഡിയം. ചാമ്പ്യൻസ് ലീഗ് പ്രീ-ക്വാർട്ടറിൽ നോർവീജിയൻ ക്ലബ്ബായ ബോഡോ ഗിഫ്ലിറ്റിനെതിരെ ആദ്യ പാദത്തിലേറ്റ മൂന്ന് ഗോളിന്റെ കനത്ത തോൽവി മറികടന്നാണ് സ്പോർട്ടിങ്ങ് ലിസ്ബൺ ക്വാർട്ടറിൽ പ്രവേശിച്ചത്. രണ്ടാം പാദത്തിൽ എതിരില്ലാത്ത അഞ്ച് ഗോളുകൾക്ക് (അഗ്രിഗേറ്റ് 5-3) ജയിച്ചുകയറിയ പോർച്ചുഗീസ് വമ്പന്മാർ ഫുട്ബോൾ ലോകത്തെ വീണ്ടും അതിശയിപ്പിച്ചു.

നോർവേയിൽ നടന്ന ആദ്യ പാദ മത്സരത്തിൽ മറുപടിയില്ലാത്ത മൂന്ന് ഗോളുകൾക്കായിരുന്നു സ്പോർട്ടിങ്ങ് പരാജയപ്പെട്ടത്. ഇതോടെ രണ്ടാം പാദത്തിൽ മൂന്ന് ഗോൾ കടമ്പ മറികടന്നാൽ മാത്രമേ ലിസ്ബണിന് ക്വാർട്ടർ പ്രതീക്ഷകൾ നിലനിർത്താൻ കഴിയുമായിരുന്നുള്ളൂ. സ്വന്തം തട്ടകത്തിൽ പതറാതെ പോരാടിയ അവർ നിശ്ചിത സമയത്ത് മൂന്ന് ഗോളുകൾ തിരിച്ചടിച്ച് കളി എക്സ്ട്രാ ടൈമിലേക്ക് നീട്ടുകയായിരുന്നു.

മത്സരത്തിന്റെ അവസാന നിമിഷം ലഭിച്ച നിർണ്ണായകമായ പെനാൽറ്റിയാണ് കളിയെ എക്സ്ട്രാ ടൈമിലേക്ക് എത്തിച്ചത്. തുടർന്ന് എക്സ്ട്രാ ടൈമിൽ മാക്സിമിലിയാനോ അരൗജോ, റാഫേൽ നെൽ എന്നിവർ നേടിയ ഗോളുകൾ സ്പോർട്ടിങ്ങിന്റെ വിജയം ഉറപ്പിച്ചു. 2019-ന് ശേഷം ചാമ്പ്യൻസ് ലീഗിൽ മൂന്ന് ഗോൾ കടമ്പ മറികടന്ന് മുന്നേറുന്ന ആദ്യ ടീമായി ഇതോടെ സ്പോർട്ടിങ്ങ് ലിസ്ബൺ മാറി.

റെമോണ്ടഡയുടെ മനഃശാസ്ത്രം

എന്തുകൊണ്ടാണ് ഇത്തരം തിരിച്ചുവരവുകൾ സംഭവിക്കുന്നത്? വിദഗ്ധരുടെ അഭിപ്രായത്തിൽ ഇത് കേവലം സാങ്കേതിക മികവ് മാത്രമല്ല, മറിച്ച് മാനസികമായ കരുത്താണ്.

മൊമെന്റം (Momentum): ഒരു ഗോൾ അടിച്ചു കഴിയുമ്പോൾ പിന്നിൽ നിൽക്കുന്ന ടീമിന് ലഭിക്കുന്ന ഊർജ്ജവും മുന്നിൽ നിൽക്കുന്ന ടീമിനുണ്ടാകുന്ന പരിഭ്രാന്തിയും കളി മാറ്റുന്നു.

ആരാധകരുടെ പിന്തുണ: ലിവർപൂളിന്റെ ആൻഫീൽഡിലോ റയലിന്റെ ബെർണബ്യൂവിലോ നടക്കുന്ന മത്സരങ്ങളിൽ കാണികളുടെ ഇരമ്പൽ കളിക്കാർക്ക് 'പന്ത്രണ്ടാമത്തെ കളിക്കാരന്റെ' കരുത്ത് നൽകുന്നു.

ഒടുങ്ങാത്ത പോരാട്ടവീര്യം: തോൽവി സമ്മതിക്കാൻ തയ്യാറാകാത്ത മാനസികാവസ്ഥയാണ് റെമോണ്ടഡകളുടെ അടിസ്ഥാനം.

റെമോണ്ടഡകൾ ഫുട്ബോളിനെ ലോകത്തിലെ ഏറ്റവും മനോഹരമായ കളിയായി നിലനിർത്തുന്നു. അവസാന വിസിൽ മുഴങ്ങുന്നത് വരെ ഒന്നും അവസാനിച്ചിട്ടില്ലെന്ന വലിയ പാഠമാണ് ഓരോ റെമോണ്ടഡയും നൽകുന്നത്.

 പ്രവചനങ്ങളെ കാറ്റിൽപ്പറത്തി, യുക്തിക്ക് നിരക്കാത്ത വിജയങ്ങൾ തേടി ടീമുകൾ നടത്തുന്ന ഈ യാത്രകൾ ഇനിയും ഫുട്ബോൾ മൈതാനങ്ങളിൽ ആവർത്തിച്ചുകൊണ്ടേയിരിക്കും. കാരണം, ഫുട്ബോളിൽ 'അസാധ്യം' എന്ന വാക്കിന് സ്ഥാനമില്ല.

ഫുട്ബോൾ മൈതാനങ്ങളിൽ മനോഹരമായ ഗോളുകളുണ്ട്, തന്ത്രപരമായ നീക്കങ്ങളുണ്ട്, കണ്ണഞ്ചിപ്പിക്കുന്ന വേഗതയുണ്ട്. എന്നാൽ ഇതിനെയെല്ലാം അതിശയിപ്പിക്കുന്ന ഒന്നാണ് 'റെമോണ്ടഡ' (Remontada). തോൽവി ഉറപ്പായ നിമിഷത്തിൽ നിന്ന്, കണക്കുകൂട്ടലുകളെല്ലാം പിഴച്ച ഇടത്തുനിന്ന്, ഒരു ടീം ഫീനിക്സ് പക്ഷിയെപ്പോലെ ഉയർത്തെഴുന്നേൽക്കുന്ന ആ വിസ്മയത്തെയാണ് ലോകം റെമോണ്ടഡ എന്ന് വിളിക്കുന്നത്.

ഫുട്ബോളിനെ ലോകത്തെ ഏറ്റവും ജനപ്രിയ കായിക വിനോദമായി നിലനിർത്തുന്നതും അവസാന വിസിൽ വരെ ശ്വാസമടക്കിപ്പിടിക്കാൻ ആരാധകരെ പ്രേരിപ്പിക്കുന്നതും ഈ അവിശ്വസനീയമായ തിരിച്ചുവരവുകളാണ്.