കൊച്ചി ന പറവൂര്‍: ഉത്രാടദിനമായ ഇന്നലെ ഓണാഘോഷങ്ങള്‍ക്ക് മുന്നൊരുക്കം നടത്താന്‍ കൊച്ചി നഗരത്തിലേക്ക് ജനം ഒഴുകിയെത്തിയതോടെ പട്ടണം വീര്‍പ്പുമുട്ടി. വസ്ത്രശാലകളിലും പച്ചക്കറി സ്റ്റാളുകളിലുമാണ് ഏറെയും ജനം എത്തിയത്. വഴിവാണിഭക്കാര്‍ക്കും ഉത്രാടനാളില്‍ ചാകരയായിരുന്നു. സാധാരണക്കാരന് പെട്ടെന്ന് ആശ്രയിക്കാന്‍ കഴിയുന്നതരത്തില്‍ വസ്ത്രങ്ങള്‍ക്കും പച്ചക്കറികളും വില കുറച്ച് നല്‍കിയാണ് വഴിവാണിഭക്കാര്‍ കൊയ്ത്ത് നടത്തിയത്.
ജില്ലയില്‍ തൃപ്പൂണിത്തുറയിലും തൃക്കാക്കരയിലും വന്‍ ജനാവലിയാണ് ആഘോഷങ്ങള്‍ക്ക് മാറ്റുക്കൂട്ടാന്‍ എത്തിയത്. അത്തചമയ ആഘോഷങ്ങള്‍ക്ക് കഴിഞ്ഞദിവസം തുടക്കമിട്ടതോടെ ഇവിടം ഉത്സവത്തിമിര്‍പ്പായിരുന്നു. ഉത്രാടമെത്തിയതോടെ അത് ഉച്ഛസ്ഥായിലെത്തി. നാടെങ്ങും ആഘോഷങ്ങള്‍ക്ക് നിറം പകരനായി വിവിധ സന്നദ്ധ സംഘടനകളും നഗരത്തില്‍ കലാപരിപാടികള്‍ സംഘടിപ്പിച്ച് ചന്തംക്കൂട്ടുന്നുണ്ടായിരുന്നു.
മാവേലി മന്നന്റെ എഴുന്നെളളത്തും വാമനന്റെ യാചനയും ഒക്കെ കലാരൂപങ്ങളായി അവതരിപ്പിക്കപ്പെട്ടപ്പോള്‍ നഗരം അക്ഷരാര്‍ത്ഥത്തില്‍ കളളവും ചതിയുമില്ലാത്ത മാവേലി മന്നന്റെ നാടായി. വിവിധ കമ്പനികള്‍ കൂടുതല്‍ ഇളവുകളും ആനുകൂല്യങ്ങളും പ്രഖ്യാപിച്ച് ഉപഭോക്താക്കളെ കൂടുതല്‍ ആകൃഷ്ടരാക്കിയപ്പോള്‍ വ്യാപാര കേന്ദ്രങ്ങളില്‍ പതിവില്‍ കവിഞ്ഞ തിരക്കായിരുന്നു.
ഉത്രാടപ്പാച്ചിലില്‍ പറവൂര്‍ നഗരം സ്തംഭിച്ചു. തിരുവോണം ആഘോഷമാക്കാന്‍ വിഭവങ്ങള്‍തേടി ഗ്രാമങ്ങളില്‍ നിന്നും ജനങ്ങള്‍ കൂട്ടം കൂട്ടമായി നഗരത്തില്‍ എത്തിയതോടെ പട്ടണം ജനബാഹുല്യത്തില്‍ വീര്‍പ്പുമുട്ടി. വസ്ത്രശാലകളിലും പച്ചക്കറി സ്റ്റാളുകളിലുമെല്ലാം വന്‍ തിരക്കായിരുന്നു. പച്ചക്കറിക്ക് പൊതുവിപണിയില്‍ വിലകുറവായിരുന്നത് ആളുകള്‍ക്ക് ആശ്വാസമായി.
സിവില്‍ സപ്ലൈസിന്റെയും ഹോര്‍ട്ടികോര്‍പ്പിന്റെയും വിവിധ സ്റ്റാളുകള്‍ അവധിയില്ലാതെ നഗരത്തില്‍ പ്രവര്‍ത്തിച്ചത് ജനങ്ങള്‍ പരമാവധി പ്രയോജനപ്പെടുത്തി. ഇതിനുപുറമെ കുടുംബശ്രീയൂണിറ്റുകളുടെയും താലൂക്ക് എന്‍.എസ്.എസ് കരയോഗത്തിന്റെയും വിവിധ സ്വാശ്രയ ഗ്രൂപ്പുകളുടെയും സ്‌കൂള്‍ എന്‍.എസ്.എസ് യൂണിറ്റുകളുടെയും സ്റ്റാളുകള്‍ നഗരത്തിന്റെ വിവിധ ഭാഗങ്ങളില്‍ സജ്ജമായിരുന്നു. ജൈവ പച്ചക്കറികള്‍ക്ക് വിലകൂടുതലായിരുന്നെങ്കിലും ഇത് വാങ്ങാന്‍ ആളുകള്‍ തിരക്ക് കൂട്ടി.
വഴിയോര വാണിഭക്കാര്‍ക്കും നല്ല കോളായിരുന്നു.ഗുണനിലവാരം അല്‍പ്പം കുറഞ്ഞാലും വിലക്കുറവില്‍ കിട്ടുമെന്നകാരണത്താല്‍ വഴിയോരത്ത് കുട്ടിയുടുപ്പുകള്‍ മുതല്‍ സാരികള്‍വരെ ധാരാളം വിറ്റഴിഞ്ഞു .പൂക്കച്ചവടത്തില്‍ താലൂക്ക് പുഷ്പ്പക്കൃഷി സംഘം വന്‍തോതില്‍ പൂക്കള്‍ പുറമെനിന്നെത്തിച്ചാണ് ആവശ്യക്കാരെ തൃപ്തിപ്പെടുത്തിയത്. പൂവിന് കഴിഞ്ഞ വര്‍ഷത്തേക്കാള്‍ വിലകൂടുതലായിരുന്നെങ്കിലും വില്‍പ്പനഏറെ വര്‍ധിച്ചു. വിവിധ സ്ഥാപനങ്ങളുടെയും സംഘടനകളുടെയും ഓണാഘോഷ പരിപാടികള്‍ സജീവമായിരുന്നു. നഗരസഭയുടെ കീഴിലുള്ള വൃദ്ധസദനത്തില്‍ ചെയര്‍മാന്‍ രമേഷ്ഡികുറുപ്പിന്റെ നേതൃത്വത്തില്‍ ഓണസദ്യ ഒരുക്കി.