കോട്ടയം: കാവേരി സംഘര്‍ഷത്തെ തുടര്‍ന്ന് യാത്രാസൗകര്യം കിട്ടാതെ കുടുങ്ങിയ മലയാളികളിലേറെയും കോട്ടയം സ്വദേശികള്‍ .കെ.എസ്.ആര്‍.ടി.സി സര്‍വീസുകള്‍ മുടങ്ങുകയും സ്വകാര്യ ബസുകള്‍ വഴിതിരിച്ചു വിടുകയും ചെയ്തതോടെയാണ് ഓണത്തിന് നാട്ടിലെത്താവാനാവാതെ മലയാളികള്‍ ദുരിതത്തിലായത്. കാവേരി പ്രശ്‌നത്തിന്റെ പേരില്‍ തമിഴ്‌നാട് വിരുദ്ധ വികാരം കര്‍ണാടകയില്‍ കലാപ സമാന സാഹചര്യമുണ്ടാക്കിയതാണ് ബസ് സര്‍വീസുകള്‍ മുടങ്ങാന്‍ കാരണം.
കെ.എസ്.ആര്‍.ടി.സി. ബംഗളുരുവിലേക്കും തിരികെയുമുള്ള സര്‍വീസുകള്‍ കെ.എസ്.ആര്‍.ടി.സി റദ്ദാക്കിയിരുന്നു.
കോട്ടയം ഡിപ്പോയില്‍നിന്നു രണ്ടും കോട്ടയം വഴി കടന്നു പോകുന്നതും ഉള്‍പ്പെടെ മൂന്നു കെ.എസ്.ആര്‍.ടി.സി. ബസുകള്‍ കോട്ടയത്തുനിന്നു ബംഗളൂരുവിലേക്ക് സര്‍വീസ് നടത്തുന്നുണ്ട്. ഇവയില്‍ ഒന്ന് വോള്‍വോയാണ്.
സ്വകാര്യ ബസുകള്‍ സര്‍വീസ് റദ്ദാക്കിയിട്ടില്ലെങ്കിലും സര്‍വീസുകള്‍ വഴിമാറ്റി വിട്ടിരിക്കുകയാണ്. നിലവില്‍ കോട്ടയം വരെയോ, കോട്ടയം വഴി കടന്നു പോകുന്നതോ ആയ പത്തിലേറെ സ്വകാര്യ ബംഗളുരു സര്‍വീസുകളാണുള്ളത്. ഇവയിലേറെയും കോയമ്പത്തൂര്‍ - സേലം വഴിയാണു കടന്നുപോയിരുന്നത്.
ഇന്നലെ സംഘര്‍ഷ സാധ്യത കണ്ടതോടെ, സര്‍വീസുകള്‍ ഏറെയും മംഗലാപുരം വഴിയാക്കി. ഇതു യാത്രാസമയം വര്‍ധിപ്പിക്കുന്നതിനു കാരണമാകും. കെ.എസ്.ആര്‍.ടി.സി സര്‍വീസുകള്‍ റദ്ദാക്കിയതോടെ സ്വകാര്യ ബസുകള്‍ തീവെട്ടിക്കൊള്ള നടത്തുകയാണെന്ന് ആരോപണമുണ്ട്. കെ.എസ്.ആര്‍.ടി.സി. സര്‍വീസ് മുടങ്ങിയതോടെ ട്രെയിനിലും ഇന്നലെ വന്‍ തിരക്കാണ് അനുഭവപ്പെട്ടത്.